ලංකාවේ නාවික හමුදාව සමග චීනුන් ඇතැයි කතාවකට ඉන්දීය අවධානය
(2009 නොවැම්බර් 03 - W3Lanka) ලංකාවේ නාවික හමුදාවත් සමග චීන ජාතිකයන් සිටින බවට දකුණු ඉන්දියාවේ රාමනාදපුරම් ධීවරයන් කර ඇති ප්රකාශත් සමග ඉන්දීය මාධ්ය අවධානය ඒ කෙරෙහි යොමු වී තිබේ.
ලංකාවේ නාවික හමුදාව ගැඹුරු මුහුදේදී තමනට පහර දුන් බව පවසන මෙම ධීවරයෝ එහිදී ලංකාවේ නාවික හමුදාව සමග එම නිල ඇඳුමෙන් සැරසුණු චීන හැඩරුව ඇති අය සිටින බව ද පවසා තිබේ.
මෙම ප්රකාශ තහවුරු වී නැතිමුත් ජනමාධ්ය විසින් මෙම තත්වය ඉන්දීය ජාතික ආරක්ෂාවට තර්ජනයක් විය හැකි බව පෙන්වා දී තිබේ. චීනයත් ඉන්දියාවත් අතර කලාපීය ආධිපත්යය වෙනුවෙන් බල අරගලයක් ඇත.
1962දී දේශසීමා ප්රශ්නයක් මත චීනය ඉන්දියාව සමග යුද වැදුණේය. ඉන්දීය උපායික විශේෂඥයන් වර්තමානයේදී පෙන්වා දෙන්නේ අනාගත ගැටුම්වල සැබෑ රණබිම වන්නේ ඉන්දීය උප මහාද්වීපය වටා ඇති මුහුද බවයි.
මේ අතර ඉන්දීය නාවික හමුදාව ද සිය බලය නවීකරණය කරගන්නට පටන් ගෙන තිබේ. ජුලි මාසයේදී ප්රථම න්යෂ්ඨික සබ්මැරීනය දියත් කළ ඉන්දියාව රුසියාවෙන් හා එක්සත් ජනපදයෙන් අලූත් ප්රහාරක යාත්රා මිළ දී ගත්තේය. එහෙත්, චීනයට ඇත්තේ ගුවන් යානා ගෙන යා හැකි යාත්රා තැනීම හා සබ්මැරීන් බලකාය වැඩිදියුණු කිරීම වැනි ඉන්දියාවට වඩා බොහෝ දුර ගිය සැලසුම්ය.
මුරුසිය, සීෂෙල්ස්, මැඩගස්කරය, මාලදිවයින වැනි දූපත් රාජ්ය සමග ආරක්ෂක සබඳතා වර්ධනය කර ගත් ඉන්දියාව චීනයේ වර්ධනය නොරුස්සන ජපානය හා වියට්නාමය වැනි රටවල් සමග නාවික අභ්යාස පවත්වා තිබේ. එහෙත්, චීනය ද මේ බොහෝ රටවල් සමග දැඩි සබඳතා පවත්වන අතර දුප්පත් ඉන්දියාවට සැපයිය හැකි දේවලට වඩා එම රටවලට පිරිනමයි.
Comments
Post a Comment
මාතෘකාවට අදාළ නැති හා වෛරී අදහස් ඉවත් කිරීමට ඉඩ ඇති බව කරුණාවෙන් සලකන්න.