රටේ සාමය වෙනුවෙන් අනේ මේ පල්ලි කඩන සාදුලාව පාර්ලිමේන්තුවේ තියා ගන්න

(2009 නොවැම්බර් 07 - W3Lanka) 2004 පාර්ලිමේන්තු මැතිවරණයේදී යම් යම් උප්පරවැට්ටි මගින් පාර්ලිමේන්තුව ආක්‍රමණය කළ, දැන් මහින්ද රාජපක්ෂ ජනාධිපතිතුමාගේ ජනප්‍රියත්වයේ එල්ලීවත් ඊළඟ පාර්ලිමේන්තු මැතිවරණය ගොඩ ඒමට බැරි ව සිටින ජාතික හෙළ උරුමයේ පාර්ලිමේන්තු මන්ත්‍රී හිමිවරු ඊළඟ ඡන්දය ඉලක්ක කරගෙන වැඩට බැස ඇත.

කොටි සංවිධානය නමැති බිල්ලා දැන් නොමැති බැවින් දැන් ඔවුන් යළිත් ක්‍රිස්තියානි ශුභාරංචි ආගමික කණ්ඩායම් අල්ලාගෙන ඇති අතර පසුගිය දිනෙක කොළඹ විහාර මහා‍ ‍දේවි එළිමහන් රංග පීඨයේ පැවති යාඥා මෙහෙයකදී පුද්ගලයන් දෙදෙනෙකු මිය යාම ඔවුන්ට කදිම අවස්ථාවක් සපයා දී තිබේ. මෙසේ මිය ගිය එක් කාන්තාවක් මාතලේ ප්‍රදේශයේ බෞද්ධ ගුරුවරියක වේ. මෙම යාඥා මෙහෙය අතරතුරදී ඇය ගිලන්ව ඇති අතර ඇයට ප්‍රතිකාර ලබා දී නැත. ජීවිත හානි සිදු කරන මෙවැනි මිථ්‍යා පතුරුවා හරින්නන්ට එරෙහිව නීතිය ක්‍රියාත්මක කිරීම අත්‍යවශ්‍ය ය. එහෙත්, නීතිය ක්‍රියාත්මක කිරීමට වගකිව යුතු ආයතන තිබියදී වෙනත් බලවේගවලට නීතිය අතට ගැනීමට ඉඩ නො තැබිය යුතු ය.


නොවැම්බර් 05දා හෙළ උරුමයේ නායක එල්ලාවල මේධානන්ද හිමි විසින් මෙහෙයවන ලද පිරිසක් තලංගම කොස්වත්ත ප්‍රදේශයේ  ජේසුස් වහන්සේගේ ශුභාරංචි මධ්‍යස්ථානය නම් ස්ථානයකට කඩා වැදී, පහර දී එහි දේපලවලට අලාභ හානි සිදු කළහ. 

යාඥා මෙහෙයේදී පුද්ගලයන් දෙදෙනෙකු මිය යාමේ සිද්ධිය අල්ලාගෙන හෙළ උරුමයට සම්බන්ධ සංවිධාන තම තමන්ට පුළු පුළුවන් තැන්වල පෝස්ටර් අලවා ඇති අතර ඉදිරියේදී පල්ලි කැඩීම් තවත් ව්‍යාප්ත විය හැකි බව පෙනේ.

හෙළ උරුමයට දැන් යළි පසුගිය කාලයේ අමතක කර දමා සිටි ගංගොඩවිල සෝම හිමියන් ද මතක් වී තිබේ. අමා මහ නිර්වාන සම්පත්තිය ලබා ගැනීමට පෙර ලබන දෙව් මිනිස් සැප අතරට අලුතින් එක් වී තිබෙන මහජන මුදලින් ලබන පාර්ලිමේන්තු සැප තව වරක් ලබා ගැනීම පිණිස මේ සාදුලාට යම් මාර්ගයක් පාදා දීම මේ රටේ පශ්චාත් යුද කාලීන සාමය සාක්ෂාත් කර ගැනීම සඳහා මහෝපකාරී වනු ඇත.

ප්‍රෝඩාකාරී සුවකරන්නන් ඇතුළු මිනිස් අසරණකම ගසා කන්නන් සෑම ආගමක ම සිටිති. ඔවුන්ගේ මතු වීම වැළැක්වීම සඳහා නීති මෙන් ම සමාජය සබුද්ධික වීම ද අවශ්‍ය ය. තමන්ගේ ආගම විකුණාගෙන කන මෙවැනි ජාවාරම් කරනවුන් ආරක්ෂා කරමින් සෙසු ආගම්වල එවැනි පුද්ගලයන්ට හා සංවිධානවලට පහර දීම පිටුපස ඇත්තේ වෙනත් උවමනාවන් ය.