වත්මන් ආරක්ෂක ඇමති මහින්ද රාජපක්ෂ යටතේ පොලිස් අත්අඩංගුවේ සිටින සැකකරුවන් මිය යාම වසරින් වසර වැඩි වෙලා

(2009 සැප්තැම්බර් 10 - W3Lanka) ජනාධිපති මහින්ද රාජපක්ෂ ආරක්ෂක ඇමති ධුරය දැරූ 2005 නොවැම්බර් සිට මේ වසරේ අගෝස්තු 16 දක්වා පුද්ගලයන් 91දෙනෙක් පොලිස් අත්අඩංගුවේදී මිය ගොස් ඇති බව ජනතා විමුක්‌ති පෙරමුණේ මන්ත්‍රී ලක්‍ෂ්මන් නිපුණආරච්චිගේ ප්‍රශ්නයකට පිළිතුරු ලෙස සභානායක දිනේෂ් ගුණවර්ධන ප්‍රශ්නයකට පිළිතුරු ලෙස ඊයේ පාර්ලිමේන්තුවේදී පැවසීය. 

2005 වසරේදී පුද්ගලයන් දෙදෙනෙක්‌ 2006 දී එකොළොස්‌ දෙනෙක්‌, 2007 දී විසි දෙනෙක්‌, 2008 දී විසි හය දෙනෙක්‌ සහ 2009 දී තිස්‌ දෙදෙනෙක්‌ වශයෙන් පොලිස්‌ අත්අඩංගුවේදී  සිදු වන මරණ සංඛ්‍යාව වසරින් වසර ඉහළ යමින් තිබේ. 

මෑතක සිට පොලිස් අත්අඩංගුවේ සිටින සැකකරුවන් වැඩි පිරිසක් මිය යන්නට පටන් ගෙන ඇත්තේ අපරාධවලට සම්බන්ධ ආයුධ මහ රෑ පොලිසියට  පෙන්නන්නට ගොස් පොලිසිය සමග ගැටුම් ඇති කරගෙන පොලිස් වෙඩි පහරට ලක් වීමෙනි. මෙම මරණ පිළිබඳ පොලිසිය ඉදිරිපත් කරන හේතු හැම විටම එක හා සමාන ඒවා වන අතර, ඒවා නීතියට පිටින් කරන මනුෂ්‍ය ඝාතන බවට ‍මානව හිම්කම් සංවිධාන චෝදනා කරයි.