ආණ්ඩුව ජාතිවාදය වැළඳ ගනියි; ෆොන්සේකා ලිට්මස් පරීක්ෂාවක
මේ වෙනුවෙන් රජයේ මාධ්‍යවලට අමතරව පෞද්ගලික මාධ්‍ය ආයතනවල සිටින සිය ඉත්තන් ද යෙදවීමට රජය පියවර ගෙන තිබේ. වෙළඳපොළ වෙනුවෙන් මධ්‍යස්ථභාවයක් පෙන්වමින් සිටි ඇමති සරත් අමුණුගමගේ දියණියට අයත් දෙරණ රූපවාහිනිය වැනි මාධ්‍යවලට මෙහිදී ප්‍රමුඛතාව දී තිබේ. සෙනසුරාදා දෙරණ ප්‍රධාන ප්‍රවෘත්ති විකාශයේ විනාඩි පහක් පමණ දීර්ඝ ප්‍රධාන 'පුවත' දෙමළ ජාතික සන්ධානය සරත් ෆොන්සේකාට සහාය දෙන්නේ අප්‍රකාශිත ගිවිසුමකට අනුව බව ඒත්තු ගැන්වීම සඳහා පෙළගස්වනු ලැබූ විශ්ලේෂණයක් විය.
ආණ්ඩුවේ උපායමාර්ගය වී තිබෙන්නේ සරත් ෆොන්සේකා සහ දෙමළ ජාතික සන්ධානයේ නායක ආර්. සම්බන්ධන් අතර රහස් ගිවිසුමක් ඇති බව ප්‍රචාරය කිරීමයි. මෙවැනි උපායමාර්ගයක් ජනතා විමුක්ති පෙරමුණේ මෙහෙයවීමෙන් 2005 ඡන්දයේදී රනිල් වික්‍රමසිංහට එරෙහිව ද එක්සත් ජනතා නිදහස් සන්ධානය විසින් උපයෝගී කර ගන්නා ලද අතර එහිදී ප්‍රසිද්ධියට පත් කෙරුණු අලි-කොටි ගිවිසුමේ පිටපතක් කිසි දිනෙක එළියට ආවේ නැත. එදා ප්‍රචාරය කෙරුණේ රනිල් කොටින්ට ඊලම දීම සඳහා ගිවිසුමකට අත්සන් කර ඇති බවයි. එම ප්‍රබන්ධයම නව ස්වරූපයකින් අර්ථකථනය කරමින් සරත් ෆොන්සේකා දෙමළ ජාතික සන්ධානයට ස්වයං පාලනයක් දෙන්නට එකඟ වී ඇතැයි ප්‍රචාරය කිරීම ආණ්ඩුවේ උපායමාර්ගය වී තිබේ. මේ ඔස්සේ සිංහල ජනතාව අතර භීතියක් ඇති කර ඡන්ද කඩා ගැනීම මහින්ද රාජපක්ෂගේ ඉලක්කය වි තිබේ. මෙය කරන්නේ සුළුතර ඡන්ද පිළිබඳ බලාපොරොත්තු මුළුමනින්ම අත්හැර දමමින් වීම විශේෂ ලක්ෂණයකි.
සරත් ෆොන්සේකාට තමන් සහාය දෙන්නේ ජාතික ප්‍රශ්නයට තිරසාර විසඳුමක් දීමට, උතුරු-නැගෙනහිර පළාත් යළි ඒකාබද්ධ කිරීමට හා අධි ආරක්ෂක කලාප ඉවත් කිරීමට ඔහු එකඟ වීතිබෙන හෙයිනැයි අද ලංකාදීප පුවත්පතේ මුල් පිටුවේ පළ වූ පුවත ආරියනන්ද දොඹගහවත්ත හා රංජිත් ආනන්ද ජයසිංහ විසින් ප්‍රබන්ධ කර දයාසීලි ලියනගේගේ නමින් පළ කරන ලද්දක් බව විපක්ෂ නායක රනිල් වික්‍රමසිංහ ඊයේ පැවසීය. 15%ක් පමණ ඡන්දදායක ප්‍රමාණයක් ඡන්දය දෙන්නේ කාටදැයි තවම තීරණය කර නැති බව මෑත කාලීන ජනමත විමසුමකින් සොයාගෙන ඇති බව ලංකාදීප පුවත්පත විසින් වාර්තා කර තිබෙන්නේ ආණ්ඩුවේ උවමනාව පරිදි විය හැකිය.
ජාතීන්ගේ ප්‍රශ්නයට තිරසාර විසඳුමක් ලබා දීම පිණිස13වන ආණ්ඩුක්‍රම ව්‍යවස්ථා සංශෝධනයේ ප්‍රතිපාදන ඉක්මවා යාමට තමන් සූදානම් බව සරත් ෆොන්සේකා ජනාධිපතිවරණ අපේක්ෂකත්වය නිවේදනය කළ පළමු නිල පුවත්පත් සාකච්ඡාවේදීම පැවසීය. තමන් සහ සන්ධානයේ හවුල්කාර පක්ෂයක් වන කොමියුනිස්ට් පක්ෂය ද 13වන ආණ්ඩුක්‍රම ව්‍යවස්ථා සංශෝධනය ඉක්මවා යන විසඳුමකට කැමති බව ජනවාරි 02දා යාපනයේ වීරසිංහම් ශාලාවේ පැවති රැස්වීමකදී ව්‍යවස්ථා කටයුතු හා ජාතික ඒකාබද්ධතා ඇමති ඩිව් ගුණසේකර පැවසීය. එම රැස්වීමට ද සහභාගි වූ ඇමති ඩග්ලස් දේවානන්ද හා ඇමති ඩිලාන් පෙරේරා, ඇමති තිස්ස විතාරණ වැනි බොහෝ දෙනෙක් ද මෙම අදහස බොහෝ වාර ගණනක් පළ කර තිබේ.
දැන් ආණ්ඩුවේ සිටින සිංහල ජාතිවාදී බලවේග ඉදිරියට පැන කෑ ගසමින් පවසන්නේ උතුරු නැගෙනහිර පළාත් යළි ඒකාබද්ධ කරන්නට සරත් ෆොන්සේකා සම්බන්ධන් සමග ගිවිසුමකට එළඹ ඇති බවයි. උතුරු නැගෙනහිර පළාත් ඒකාබද්ධ කරනු ලැබුවේ 13වන ආණ්ඩුක්‍රම ව්‍යවස්ථාව යටතේ ය. 13වන ආණ්ඩුක්‍රම ව්‍යවස්ථා සංශෝධනය ඉක්මවා යාම යනු අනිවාර්යයෙන් ම උතුරු නැගෙනහිර පළාත් යළි ඒකාබද්ධ කිරීමටත් එහා යන තීරණයකි. අප ඉහත කී ඇමතිවරුන් ඉන්නේ එම ස්ථාවරයේ ය. සරත් ෆොන්සේකා ද පැමිණ තිබෙන්නේ ඔවුන් බොහෝ කලක සිට දරන මෙම ස්ථාවරයටයි. ලංකාවේ ජනවාර්ගික සමගිය යළි ඇති කිරීම සදහා මෙවැනි නිර්භීත පියවර අවශ්‍ය ය. බලය බෙදීම යනු රට බෙදීමට කිසි ලෙසකින්වත් කිට්ටු ක්‍රියාවක් නොවේ. සරත් ෆොන්සේකා සහ දෙමළ ජාතික සන්ධානය අතර යම් අවබෝධයක් ඇති වී තිබේ නම් එය සාධනීය එකකි. ජාතීන් අතර තිරසාර සාමය හා සංහිඳියාව ඇති කිරීමට ද ලාංකික ජාතියක් ගොඩනැගීමට ද මෙම තත්වය ඉවහල් කර ගත යුතු ය.
සිංහල ජාතිවාදය නෝනා පැත්ත වන කාසියේ ම පොල්ල පැත්ත වන දෙමළ ජාතිවාදය යුදමය වශයෙන් පරාජය වී සිටින මේ මොහොතේ ජාතීන් අතර සමගිය ගොඩනැඟීම හා ලාංකීය ජාතියක් ගොඩනැඟීම සඳහා ඉවහල් වන පියවර ගැනෙමින් තිබියදී ඒවා කඩාකප්පල් කිරීමට හේතු වන අන්දමින් නැති ගිවිසුමක් පිළිබඳ බොරු ප්‍රචාර කරමින් ජනතා සිත් සතන් තුළ භීතිය නිර්මානය කිරීම හා ජාතීන් භේද භින්න කිරීමට කටයුතු කිරීම ඉතා පැහැදිලිව ම ත්‍රස්ත ක්‍රියාවකි. තිස්සනායගම් විසි වසරකට සිරගත කළේ ද මෙවැනි චෝදනාවක් එල්ල කරමිනි. ආණ්ඩුවේ ප්‍රබලයින් ඉදිරියට නො පැමිණ මෙම ජාතිවාදී ප්‍රචාරය මෙහෙයවීම වලව්වල ඉඳුල් හෝදා යැපෙන පිංගුත්තරයන් පිරිසකට පවරා ඇත්තේ මෙම ක්‍රියාවෙහි බරපතලකම ඔවුන් දන්නා බැවිනි. තමන්ගේ අවිනිශ්චිත දේශපාලන අනාගතය හේතුවෙන් තම අනුග්‍රාහකයන් විසින් දෙන ඕනෑම අසූචි මුට්ටියක් මල් වට්ටියක් සේ දෝතින් ගන්නා මේ බැලයන් තමන්ගේ ජීවිත පවා අනතුරට ලක් කර ගෙන ඇත.
මෙම අභියෝගයට නිර්භයව මුහුණ දීමේ ආත්ම ශක්තිය විපක්ෂයට නැති වුවහොත් ඔවුන් ද මෙම ජාතිවාදී රැල්ලට යට වනු ඇත. සරත් ෆොන්සේකාගේ දිරිමත්කම ද මෙම ලිට්මස් පරීක්ෂාව සමත් විය යුතුව තිබේ. ජවිපෙ ජාතීන්ගේ ප්‍රශ්නය සඳහා සමාජවාදය ලෙස ඔවුන් හඳුන්වන ජවිපෙ පාලනයක් යටතේ ස්වයං පාලන විසඳුම පිළි ගත්තේ 1986 තරම් ඈත සමයක රෝහණ විජේවීර විසින් දෙමළ ඊලාම් ගැටළුවට විසඳුම කුමක්ද යන මධ්‍යම කාරක සභාව වෙත ඉදිරිපත් කරන ලද තිසීසයෙනි.
Comments
Post a Comment
මාතෘකාවට අදාළ නැති හා වෛරී අදහස් ඉවත් කිරීමට ඉඩ ඇති බව කරුණාවෙන් සලකන්න.