නිවට සිවලුනේ තොපට කාලයයි සිහසුනෙන් බැස යන්න


(2010 ජනවාරි 25 -W3Lanka) දෙමළ හා සිංහල සමාජයන් අතර යුද්ධයෙන් පසු කිසියම් සංහිඳියාවක් ඇති වෙමින් තිබුණේ නම් එය ද නැති කර දැමීමට මහින්ද රාජපක්ෂගේ ජාතිවාදී ජනාධිපතිවරණ ප්‍රචාරක ව්‍යාපාරය ඉවහල් වී ඇති බව නිසැක ය. 


ෆොන්සේකා හා සම්බන්ධන් අතර ඇතැයි කියන 'හොර ගිවිසුමේ' ආණ්ඩුව විසින් ඉදිරිපත් කරන ලද පිටපතේ සම්බන්ධන් අත්සන් කර ඇත්තේ සිංහලෙන් යයි වාර්තා වේ. මෙය ඉතිහාසයේ ලොකු ම හාස්‍යය විය හැකිමුත්, එමගින් සිංහල සමාජ මනස තුළ ඇති කරන ලද භීෂණය හා දෙමළ ජනයා කෙරෙහි ඇති කරන ලද වෛරය ඉතිහාසයේ පාපතර ම දේශපාලන උපායමාර්ගයකි. 


එල්.ටී.ටී.ඊ. සංවිධානය යුදමය වශයෙන් පරාජය කිරීමෙන් පසු දෙමළ-සිංහල සමාජයන් අතර සංහිඳියාව ඇති කිරීමේ හා ජාතික ප්‍රශ්නයට විසඳුමක් සෙවීමේ හැකියාව මහින්ද රාජපක්ෂගේ ජාතිවාදී ව්‍යාපාරය විසින් මුළුමනින් ම අවුල් කර දමා ඇත. මහින්ද බලයට පැමිණියහොත් සිදු වනු ඇත්තේ ලංකාවේ සමාජය තව තවත් භේද භින්න වීමයි.


මෙය පරාජය වී විදේශයන්ට පසු බැස සිටින දෙමළ ජාතිවාදීන්ට මහත් වාසියක් වන අතර, ඔවුන් මහින්ද රාජපක්ෂගේ ජයග්‍රහණය ඉත සිතින් පතන බවට සැකයක් නැත. මන්ද, පරාජිත දෙමළ ඊලාම් රාජ්‍ය අරගලය යළි පණ ගැන්විය හැක්කේ මෙවැනි ජාතිවාදීන්ගේ සෙවණේ වන හෙයිනි. ජාතීන්ගේ ප්‍රශ්නයට විසඳුම් සොයන්නට උත්සාහ කරන්නකු බලයට පැමිණියහොත් එය දෙමළ රාජ්‍ය ඉල්ලීම ජාත්‍යන්තර දේශපාලනයේදී යුක්ති යුක්ත කිරීමට බාධාවක් වනු ඇත. 


සරත් ෆොන්සේකා සාමය, ජාතික සමගිය, ප්‍රජාතන්ත්‍රවාදය, යහපාලනය, නීතියේ ආධිපත්‍යය, මානව හිමිකම්, නිදහස හා  සමාජ සංවර්ධනය වෙනුවෙන් කිසිවක් කරනු ඇද්දැයි අපි නො දනිමු. ඒ පිළිබඳ වගකීමක් දැරීමට අපට තබා එජාපෙට හෝ ජවිපෙට හෝ පුළුවන්දැයි අපි නො දනිමු. එහෙත්, ජාතිවාදයේ හා දූෂණයේ කර වටක් එරී සිටින මහින්ද රාජපක්ෂගෙන් සුබ අනාගතයක් පැතීම ඉබ්බකුගෙන් පිහාටු ඉල්ලීමකි.



සිංහල සමාජය මහින්ද රාජපක්ෂ හා ඔහුගේ ජාතිවාදී සන්ධානය බලයට පත් කිරීමෙන් අපේක්ෂා කළ කාර්යය ඔහු දැන් හමාර කර තිබේ. ඔහු හා සමාන ජාතිවාදී යුදකාමියකු වූ ද දේශපාලන විසඳුමකට එකඟ නො වන්නකු වූ ද ප්‍රභාකරන් සමග කරන ලද කෲර යුද්ධයේදී ප්‍රභාකරන් හා ඔහුගේ සටන් කරුවන් පමණක් නොව බාල වයස්කාර පුත්‍ර බාලචන්ද්‍රන් පවා මරා දමා ජය තහවුරු කර ගන්නට මහින්ද රාජපක්ෂ සමත් විය.



රාජපක්ෂවරුන්ගේ දේශපාලනය එතැනින් අවසන් විය. එතැනින් එහාට කළ යුතුව තිබුණු ප්‍රජාතන්ත්‍රවාදය, යහපාලනය, නීතියේ ආධිපත්‍යය හා මානව හිමිකම් යළි පිහිටුවීම හා ජාතික සමගිය ඇති කිරීම වැනි කිසිවක් කිරීමට ඔවුහු අසමත් වූහ.යුද්ධයේ ආනුභාවයෙන් සදාකාලිකව බලයේ සිටිය හැකි යයි සිතූ ඔවුහු සිත් සේ දූෂණයේ යෙදුණහ. එහෙත්, සමාජයකට මෙවැනි තත්වයක් දරා ගත හැකි සීමාවක් තිබේ. රාජපක්ෂ කඳවුරේ ම සිටි සරත් ෆොන්සේකා නම් හමුදා නිලධාරියා වෙතින් අභියෝගාත්මක දේශපාලන නායකත්වයක් රූපාන්තරණය වීම එහි ප්‍රතිඵලයයි. 

2010 ජනාධිපතිවරණය රාජපක්ෂ දූෂණයේ සුරතාන්තයයි. කවුරු දිනුවත්, පැරදුණත් මෙම ප්‍රතිඵලය පිළි ගත නො හැකි තරමට ජනාධිපතිවරණය දූෂිත වේ. මහජන දේපල සියල්ල ජනාධිපතිවරයාගේ ඡන්ද ප්‍රචාරය සඳහා යොදා ගන්නා පසුබිමක පවත්වන ජනාධිපතිවරණයක් කුමන අන්දමකින්වත් සාධාරණ එකක් නොවේ. 


කෙසේ වෙතත්, එකක් පැහැදිලි ය. සමස්ත ලාංකික සමාජයට ම මහින්ද රාජපක්ෂ පාලනය එපා වී තිබේ. එපා වීම කෙතරම් ද කිවහොත් ඡන්ද දූෂණවලින් පවා එය වසා ගැනීම දුෂ්කර වී තිබේ. මහින්දට ඡන්දය දෙන අය පවා ඡන්දය දෙන්නේ කළගුණ සලකන්නැයි කරන සිඟමන් යැදීම නිසා මිස දූෂණය අනුමත කිරීම‍ට නොවේ. කළ ගුණ සැලකීම යනු කෝටි දෙකක ජනතාවගේ අනාගතය උගසට තැබීම නොවේ.

Comments

  1. ෆොන්සේකා හා සම්බන්ධන් අතර ඇතැයි කියන 'හොර ගිවිසුමේ' ආණ්ඩුව විසින් ඉදිරිපත් කරන ලදැයි පවසන පිටපත සබැවින් අපි නොදැක්කෙමු. මෙය ලියන ඔබද එය දැක නැතුවාට කිසිම සැකයක් නැත.ඒ පිලිබද ආරංචියක් හෝ පැමිණයේ ෆොන්සේකාගේ වේදීකාවෙනි. ඔබටත් වාර්ථා වෙන්න ඇත්තේද එලෙසමයි. සම්බන්ධන් පාර්ෂවයේ සාමාජිකයින් ප්‍රසිද්ධියේම ගිවිසුම ගැන සත්‍ය හෙලි කිරීමෙන් අනතුරුවද තවත් එහි පිටපත් සකසන්නේ කුමකට දැයි අපි නොදනිමු. කෙසේ වෙතත් ඉතිහාසයේ පාපතර ම දේශපාලන උපායමාර්ගය ක්‍රියාත්මක කරන්නේ කවුරුන්ද, යන්න තවත් එක් පැනයක් මිස ඇගිලි දිගුකොට පෙන්වියහැකි පාර්ෂවයක් නොමැත.

    ReplyDelete
  2. රහසිගත ගිවිසුම් හරහා රටවල් පාවා දීම් සිදු වූයේ රටවල් රජවරුන්ගේ පෞද්ගලික බූදල් වී තිබුණු යුගයේ පමණි.

    දියුණු ප්‍රජාතන්ත්‍රවාදයක එවැනි හොර ගිවිසුම්වල කිසිදු වලංගුභාවයක් නැත.

    මෙම ප්‍රබන්ධ ගොතන්නේ මිනිසුන් බිය වැද්දීමටයි. ජනතාව සාමාන්‍යයෙන් ගත් කල බුද්ධිමත් නොවෙති. ප්‍රබන්ධ කතාවල එන ආකාරයේ කුමන්ත්‍රණ කතාවලට ඔවුන් ප්‍රිය කරන්නේ එබවිනි.

    ReplyDelete
  3. Moda Jeppo...
    Ubalagei apei politics

    ReplyDelete

Post a Comment

මාතෘකාවට අදාළ නැති හා වෛරී අදහස් ඉවත් කිරීමට ඉඩ ඇති බව කරුණාවෙන් සලකන්න.

Popular posts from this blog

තේරවිලි: සුපුන් සඳක් ඇත. මැදින් හිලක් ඇත.

පාසල් අධ්‍යාපනය ගැන කතා තුනක්

හමුදා කුමන්ත්‍රණ ගැන ලෝකෙට දුරකථනයෙන් කිව්වෙ බීලා වෙන්න ඇති -ෆොන්සේකා