පශ්චාත් සරත් නන්ද සිල්වා යුගය: පී. බී. ජයසුන්දර රජයේ තනතුරු භාර නොගන්නා බවට කළ ප්රකාශය ඉල්ලා අස් කරගන්න යයි
අලුත්ම සිද්ධියේදී රජයේ කිසිදු තනතුරක් භාර නොගන්නා බවට පොරොන්දු වෙමින් තමන් ඉදිරිපත් කළ දිවුරුම් ප්රකාශය බලරහිත කරන ලෙස ඉල්ලා මුදල් අමාත්‍යංශයේ හිටපු ලේකම් ආචාර්ය පී. බී. ජයසුන්දර ඉදිරිපත් කළ මෝසම ජූලි මස 14 වැනි අඟහරුවාදා අගවිනිසුරු අශෝක ද සිල්වා ප‍්‍රමුඛ ති‍්‍රපුද්ගල විනිසුරු මඬුල්ලක් ඉදිරියේ සලකා බැලීමට ශ්‍රේෂ්ඨාධිකරණය තීරණය කැර ඇත.
මැරයින් සර්විසස් නඩු තීන්දුවෙන් අනතුරුව දුන් අධිකරණ නියෝගයක් මත රජයේ තනතුරු භාරනොගන්නා බවට පී. බී. ජයසුන්දර ශ්‍රේෂ්ඨාධිකරණයට පොරොන්දු වෙමින් දිවුරුම් ප‍්‍රකාශයක් ඉදිරිපත් කළේය.
මුදල් අමාත්‍යංශයේ සහ භාණ්ඩාගාරයේ ලේකම් ධූර භාරගන්නා ලෙස ජනාධිපතිවරයා කළ ඉල්ලීම පිළිගැනීමට බාධාවක් වන බැවින් එම දිවුරුම් ප්රකාශය ඉවත් කරන ලෙස ඉල්ලා ජයසුන්දර ශ්‍රේෂ්ඨාධිකරණයට මෙම මෝසම ඉදිරිපත් කර ඇත.
ශ්‍රේෂ්ඨාධිකරණය 2008 ජුලි 21දා තීන්දු කළේ ලංකා මැරයින් සර්විසස් සමාගමේ කොටස්වලින් 90%ක් ජෝන් කීල්ස් හෝල්ඩිංස් සමාගමට පැවරීමේ හා තක්සේරුවකින් හා කැබිනට් අනුමැතියකින් තොරව බ්ලූමැන්ඩල් පෙදෙසේ ඉඩමක් එම සමාගමට විකිණීම නිසි අධිකාරයකින් තොරව කරන ලද නීති විරෝධී ක්‍රියා බවයි.
විනිසුරු එන්. ජී. අමරතුංගගේ හා ජගත් බාලපටබැඳිගේ අනුමැතියෙන් යුතුව අග විනිසුරු සරත් එන්. සිල්වා විසින් දෙන ලද නඩු තීන්දුව ප්‍රකාරව මෙම ගනුදෙනුව විසින් ජනාධිපති උපදේශක වාසුදේව නානායක්කාරගේ සමානත්වය හා නීතියේ සමාන සුරක්ෂිතභාවය සඳහා ඇති අයිතිය උල්ලංඝනය වී තිබේ. මෙම දූෂිත ගනුදෙනුව සඳහා එවකට රාජ්‍ය ව්‍යවසාය ප්‍රතිසංස්කරණ කොමිෂමේ සභාපති පී. බී. ජයසුන්දර ඍජුවම සම්බන්ධ බව අධිකරණය විසින් සටහන් කරන ලදී.
Comments
Post a Comment
මාතෘකාවට අදාළ නැති හා වෛරී අදහස් ඉවත් කිරීමට ඉඩ ඇති බව කරුණාවෙන් සලකන්න.