ඒකොන් මාලේට; සංචාරකයින් මාලදිවයිනට | Akon to Male; tourists to Maldives

(2010 අප්‍රේල් 02-W3Lanka )  සිරසට ගල් ගැසූ සිංහල බෞද්ධ මූලධර්මවාදී පක්ෂයකට සම්බන්ධ පිරිස් සමග එක්ව ආණ්ඩුව ඒකොන්ගේ කොළඹ සංදර්ශනය කඩාකප්පල් කිරීමෙන් පසු මාලදිවයින එම සංදර්ශනය මාලේහිදී පැවැත්වීමට සැරසෙන බව දැනගන්නට තිබේ. මෙයින් වඩාත් ම කලකිරීමට පත්ව තිබෙන්නේ යන්තම් හිස ඔසවමින් සිටි සංචාරක කර්මාන්තයයි.


මාලදිවයිනට සංචාරක කර්මාන්තයෙන් හරි ගියේ ප්‍රධාන වශයෙන් ම ලංකාවේ යුද්ධය නිසා ය. ලංකාවේ යුද්ධය නැති වීම සංචාරක කර්මාන්තයේදී මාලදිවයිනට පහරකි. මන්ද එරටට එන්නට සිටි සංචාරකයන් අතරින් පිරිසක් ලංකාවට යන හෙයිනි.


අනෙක් පැත්තෙන් මාලදිවයින මුස්ලිම් රටක් වන අතර ලංකාවේ බහුතරයක් බෞද්ධ පිරිමි පෝයටවත් පන්සල් යන්නේ නැත. එහෙත් මාලදිවයිනේ වාසනාවට එරට ලංකාවේ තරම් තක්කඩි දේශපාලන පක්ෂ නැත.


ඒකොන්ගේ සංදර්ශනය මාලදිවයිනේ තැබීමෙන් ඒ රට ලංකාවට එල්ල කරන්නේ කණේ පාරකි. සංචාරක කර්මාන්තය ප්‍රවර්ධනය කරන්නේ සංචාරකයන් වෙනුවෙන් මිස හොරෙන් නිල් චිත්‍රපට බලන ලංකාවේ හොර උපාසකයන් වෙනුවෙන් නොවේ. 


අනෙක ඒකොන්ගේ සංදර්ශනය සංවිධානය කරන්නට මුල් වූයේ සංචාරක ප්‍රවර්ධන කාර්යාංශය හා ශ්‍රී ලංකන් ගුවන් සේවය වැනි රජයේ ආයතන හා සිංහල ක්‍රීඩා සමාජය වැනි බෞද්ධ සංවිධානයි. මෙය සංවිධානය කරන්නට පෙර ආණ්ඩුව දුර දිග බැලිය යුතුව තිබිණි. එසේම, තමන්ගේ ඇම්බැට්ටයන් සිරසට ගල් ගැසීමට යාම වැළැක්වීමේ හැකියාව ද ආණ්ඩුවට තිබිණි. අඩු තරමේ තල් ගැසූ එවුන්ට එරෙහිව නීතිය ක්‍රියාත්මක කරන්නට හෝ තිබිණි. 


'එකක් කඩතොලු වසන්නට ගොස් අනේ මට වූ කාරියා
දෙකක් කඩතොලු හදා ගත්තයි කම්මලේ ආචාරියා' යි ජන කවියක් තිබේ. 


ආණ්ඩුව ද කර ගත්තේ සංචාරක කර්මාන්තය ප්‍රවර්ධනය කරන්නට ඒකොන්ගේ සංදර්ශනය සංවිධානය කර හදා ගත් කඩතොල්ල වසන්නට ගල්කාරයන් සමග එක් වී රජය මාධ්‍ය මර්දනය කරන හැටි ද ලෝකයට පෙන්නා සංචාරක කර්මාන්තයට ද හානි සිදු වන ප්‍රචාරයක් ජාත්‍යන්තරව ලබා ගැනීමයි. 


මේ පිළිබඳ ඇත්ත තත්වය සංචාරක ඇමති හා පංචායුධ විමල කුමාරයාගේ ප්‍රාණසම මිත්‍ර අචල සුරංග ජාගොඩ ප්‍රංශ පුවත් සේවයට කියා තිබිණි. ඔහු කියා තිබුණේ ලංකාවට අහිමි වන්නේ මුදලින් මිළ කළ නොහැකි අවස්ථාවක් බවයි. මේ සංදර්ශනය සඳහා ආසියා පැසිෆික් කලාපයේ සංචාරකයන් 5000ක් 6000ක් පමණ ගෙන්වා ගැනීමට ආණ්ඩුවේ සංචාරක ප්‍රවර්ධන කාර්යාංශය සැලසුම් කර තිබිණි.


හඩ්සන්ගේ පත්තර පෝරියල් එකේ කියන විදියට නම් මේ වෙනුවට පැවැත්විය යුතුව තිබෙන්නේ අමරදේවගේ ෂෝ එකකි. අම‍රදේවයන් මේ බිස්නස්වලට පටලවා ගත යුතු නැත. රු. 2500 සිට 25,000 දක්වා ටිකට් මිළ දී ගෙන ආසියා පැසිෆික් කලාපයේ සංචාරකයන් 5000ක් 6000ක් අමරදේවයන්ගේ සංදර්ශනයක් බලන්නට එතැයි සිතන්නා වහා මානසික රෝහලට ඇතුළත් කළ යුතු බව අප කියන්නේ අමරදේවයන්ට අපහාස මුඛයෙන් නොවේ.


ලංකාවේ අනාගත පරම්පරා ලෝකෙට ණය කරමින් යටිතල පහසුකම් සංවර්ධනය කළේ ආයෝජකයන්, සංචාරකයන් ගෙන්වාගෙන එයින් ආදායම් උපයන්නට හෝ නොවේ නම් ලංකාවේ වර්තමාන ධනේශ්වර ආර්ථිකයට කිසිදු මූලෝපායික අරමුණක් නැත.


ගත් ණය ගෙවිය යුත්තේ තව දුරටත් පිටරටවලට කුණු කොල්ලෙට ශ්‍රමය විකිණීමෙන් නම් මේ බෞද්ධ මූලධර්මවාදී පක්ෂවල ගල් සෙල්ලම්කාරයන් වහා ඉදිකිරීම් කම්කරුවන් හා කසල ශෝධකයන් ලෙස මැද පෙරදිගට යැවිය යුතු ය. දේශප්‍රේමය වෙනුවෙන් කක්කුස්සි හේදිය යුත්තේ දේශප්‍රේමීන් මිස අසරණ දුප්පතුන් නොවේ.