ආණ්ඩුවේ කොළඹ දිනීමේ සටනේ නියමුවා සජිත් ප්‍රේමදාස

එක්සත් ජාතික පක්ෂයේ සජිත් ප්‍රේමදාසට හිටිහැටියේ කරු ජයසූරියව ද ඉස්සරහට දමාගෙන රනිල් වික්‍රමසිංහ කොහොම හරි එළවන ගායක් ඇති වී තිබෙන්නේ ඇයි ද යන්න විමසා බැලිය යුතු ය.


ඔක්තෝබරයේ දිවයිනේ ප්‍රධාන පෙළේ පළාත් පාලන ආයතන 23ක ඡන්ද පැවැත්වේ. ඒ අතරින් එක්සත් ජනතා නිදහස් සන්ධානයට මොනවා කළත් දිනන්නට අසීරු ම පළාත් පාලන ආයනයක් වන්නේ කොළඹ මහ නගර සභාවයි.


තමන් සංවිධානය කරන හම්බන්තොට දිස්ත්‍රික්කයේ ආණ්ඩුවට කිසිදු තරගයක් දෙන්නට අසමත් සජිත් ප්‍රේමදාස දැන් සැරසෙන්නේ කරුවත් අල්ලාගෙන කොළඹ දිනවා වැඩකාරයා වන්නට ය. මේ වනාහි රූපවාහිනියෙන් කෑම හදන මල්ලිකා ජෝසප් පන්නයේ වැඩකි. මල්ලිකා ජෝසප් කෑම හදද්දී ලෝකේ තිබෙන සියලු ම රසවත් දේ එයට එකතු කරයි. ඒ ජාති එකතු කර නීරස කෑමක් හැදීම අතිශය අමාරු කාර්යයකි.


එක්සත් ජාතික පක්ෂය කොළඹ දිනීම ද එවැනි ය. ව්‍යවස්ථාවට එරෙහිව පවා යමින් රනිල් වික්‍රමසිංහට එරෙහිව සජිත් ප්‍රේමදාස මරාගෙන මැරෙන සටනක් කරන්නේ කොළඹ දිනීමේ සටන මෙහෙයවීමට ය.


මේ පිටුපස පැහැදිලිව ම ආණ්ඩුව ඇත. සජිත් සටනින් දිනුවත්, පැරදුණත් ආණ්ඩුව දිනුම් ය. මෙයින් අනිවාර්යයෙන් ම එජාපය දෙකඩ වනු ඇත. එය සිදු වන්නේ කොළඹ මහ නගර සභා ඡන්දය අබියසදී වීම ය. ආණ්ඩුව කොළඹ දිනා ගත්තොත් එය ‍මිළ කළ නො හැකි ජයග්‍රහණයක් වනු ඇත.


මෙය නො තේරෙන කරුට රනිල් පැන්නූ පසු සජිත් තමන්ට ද ඒ හැන්දෙන් ම බෙදන බව තේරෙන්නේ නැත.


සමහර විට, එක්සත් ජනතා නිදහස් සන්ධානය වෙනුවෙන් කොළඹ මහ නගර සභා ඡන්දය මෙහෙයවන්නා සජිත් ප්‍රේමදාස වීමට බොහෝ දුරට ඉඩ තිබේ.

මේ ලිපියට ඔබ කැමති නම් වෙන අයත් එක්කත් බෙදා ගන්න