ලංකාවේ සිටින පකිස්තාන් සරණගතයෝ කවුරුද?

ලංකාවට පැමිණි පසු වීසා ලබා ගැනීම සඳහා ලක් රජය විසින් විදෙස් සංචාරකයන්ට ලබා දී තිබෙන පහසුකම පකිස්තාන ජාතිකයන්ට තව දුරටත් ලබා නො දීමට ගිය සතියේ ආණ්ඩුව තීරණය කළා. පකිස්තාන ජාතිකයන් වෙනුවෙන් ඔන් එරයිවල් වීසා නම් වූ මෙම පහසුකම අවලංගු කිරීමට හේතු වුණ කාරණා කීපයක් තිබෙනවා. 

පසුගිය දිනෙක ඉන්දීය ආණ්ඩුව චෙන්නයිහිදී ෂකීර් හුසේන් නම් ලාංකිකයකු අත් අඩංගුවට ගත්තා. ඔහු පකිස්තානු ත්‍රස්ත කණ්ඩායම් වෙනුවෙන් ඔත්තු බැලූවකු බව ඉන්දීය ආරක්ෂක අංශ චෝදනා කරනවා. 

ඉන්දීය විරෝධී කාශ්මීර ත්‍රස්ත සංවිධානයක් වන ලෂ්කාර්-ඉ-ටයිබා වැනි අන්තවාදී සංවිධාන ලංකාව පදනම් කරගෙන ක්‍රියාත්මක වන්නට තිබෙන ඉඩකඩ ගැන ඉන්දියාව සිටින්නේ අවදියෙන්. මේ පිළිබඳව ඉන්දියාව ලංකාවේ ආණ්ඩුවට අනතුරු අඟවා තිබෙනවා. 

ලංකාව පකිස්තානුවන්ට 'පැමිණි පසු වීසා' ලබා දීම අත්හිටුවීමට තවත් හේතුවක් වුණේ ලංකාවේ මේ වන විට සිටින පකිස්තානු සරණාගතයෝයි. 1500කට වැඩි පකිස්තානු සරණාගතයින් පිරිසක් ලංකාවේ ඉන්නවා. ඔවුන් සංචාරකයින් ලෙස මෙරටට පැමිණි අයයි. ඔවුන් පසුව ලංකාවේ එක්සත් ජාතීන්ගේ සරණාගතයන් පිළිබඳ මහ කොමසාරිස් කාර්යාලයේ ලියාපදිංචිය ලබාගෙන තිබෙනවා. ඔවුන්ගේ දේශපාලන රැකවරණ ඉල්ලීම් සලකා බැලෙමින් තිබෙනවා. තවම දේශපාලන සරණාගතභාවය පිළි ගනු ලැබ තිබෙන්නේ දෙසීයක පමණ පිරිසකගේ පමණයි. සංවර්ධිත බටහිර රටක දේශපාලන රැකවරණ ලැබෙන තෙක් මේ පකිස්තානුවන් ඇතැම් විට වසර ගණනක් ලංකාවේ රැඳී සිටිනවා. ඔවුන් පවුල් පිටින්, කුලී නිවාසවල දුක සේ ජීවත් වෙනවා. ඔවුන්ට එතරම් කලක් ලංකාවේ ඉන්නට සිදු වී තිබෙන්නේ මෙරට එක්සත් ජාතීන්ගේ සරණාගත කොමසාරිස් කාර්යාලයට එතරම් විශාල පුද්ගලයන් ප්‍රමාණයක් පිළිබඳ කටයුතු කිරීමට පහසුකම් නැති නිසායි.

ලංකාව සරණාගතයන්ට රැකවරණ දීමේ සම්මුති අත්සන් කර නැති වුණත්, සරණාගතයන් සම්බන්ධයෙන් සානුකම්පිත වීමේ ජාත්‍යන්තර වගකීමක් ලංකාවට තිබෙනවා. ඒත්, පසුගිය දිනවල ආගමන හා විගමන දෙපාර්තමේන්තුව විසින් මේ සරණාගතයන් අත්අඩංගුවට ගන්නට පටන් ගත්තා. මේ වන විට 250ක පමණ පකිස්තානු සරණාගතයන් පිරිසක් අත්අඩංගුවට ගෙන ඇති බව වාර්තා වෙනවා.

ත්‍රස්ත විමර්ශන කාර්යාංශය විසින් ඔවුන්ගෙන් ප්‍රශ්න කරමින් තිබෙනවා. වීසා නැති මේ පකිස්තානුවන් පිටුවහල් කිරීමට සූදානමකුත් තිබෙන බව වාර්තා වෙනවා. එහෙත් එක්සත් ජාතීන්ගේ සරණාගතයන් පිළිබඳ මහ කොමසාරිස් කාර්යාලය එයට විරෝධය පළ කර තිබෙනවා. 

පසුගිය කාලයේ අගමැතිතුමාගේ නමත් ඈඳුණු මහා පරිමාණ හෙරොයින් ජාවාරමක මහ මොළකරුවන් පකිස්තානු ජාතිකයෝයි. ඔවුන් ග්‍රීස් ටින් තුළ සැඟවූ හෙරොයින් කිලෝ 150කට අධික ප්‍රමාණයක් පකිස්තානයේ සිට ලංකාවට හොරෙන් ගෙන ඒමට උත්සාහ කරද්දී රේගුව විසින් අල්ලා ගනු ලැබුවා. පකිස්තානුවන් මෙවැනි ජාවාරම් සමග සම්බන්ධ වීම නිසා පකිස්තාන සරණාගතයන් සම්බන්ධයෙන් සැකමුසු වීම සාධාරණීකරණය වෙනවා. 

ඒත්, මේ පකිස්තාන් සරණාගතයන් කියන්නේ තමන් ලංකාවට පැමිණ සිටින්නේ එරට සුන්නි මුස්ලිම් අන්තවාදීන්ගෙන් බේ‍රෙන්නට ය කියායි. මේ පකිස්තානුවන්ගෙන් වැඩි දෙනෙක් අයත් වන්නේ අහමඩදියා නම් ඉස්ලාම් නිකායකටයි. පකිස්තාන ක්‍රිස්තියානි බැතිමතුන් ද සරණාගතයන් අතර සිටිනවා.

අහමදියා මුස්ලිම්වරු කියන්නේ දහනමවන සියවස අගභාගයේදී බ්‍රිතාන්‍යයට යටත් ඉන්දියාවේ විසූ මිර්සා ගුලාම් අහමඩ් (1835–1908), විසින් කරන ලද දේශනාව අනුගමනය කරන ප්‍රජාවක්. අහමඩ් දේශනා කළ පරිදි ඔහු තමයි මුස්ලිම්වරුන් බලාපොරොත්තුවෙන් සිටින ගැලවුම්කාර මහ්දිවරයා. අහමදියාවරුන් විශ්වාස කරන පරිදි ගුලාම් අහමඩ් යනු ආගමික යුද්ධ හා ලේ හැලීම් අවසන් කර සාමය, යුක්තිය හා සදාචාරය ප්‍රතිෂ්ඨාපනය කිරීම සඳහා දෙවියන් විසින් එවන ලද දූතයෙකි. 

තමන් ඉස්ලාම් ආගම එහි සැබෑ අරුතින් පිළිපදින පිරිසක් බව අහමදියා මුස්ලිම්වරු විශ්වාස කරනවා. ඔවුන් සාමකාමී ප්‍රජාවක්. එහෙත්, ඔවුන්ගේ ඇතැම් භාවිතාවන් සම්ප්‍රදායික ඉස්ලාම් දහම සමග නො පෑහීම නිසා ඔවුන් නිරතුරුව ම සම්ප්‍රදායික ඉස්ලාම් බැතිමතුන්ගේ විරෝධයට ලක් වී තිබෙනවා.

අහමඩ්ගේ මරණින් පසු අහමදියා ව්‍යාපාරය කොටස් දෙකකට බෙදුණා. එක් පිරිසක් අහමඩ් යනු මහමත්තුමාගේ අනුප්‍රාප්තිකයකු ලෙස පිළි ගනිද්දී අනෙක් පිරිස කියන්නේ මහමත්තුමාට අනුප්‍රාප්තිකයකු සිටිය නො හැකි බවයි. 

කෙසේ වෙතත්, අහමදියා ව්‍යාපාරය ලොව පුරා පැතිර තිබෙනවා. හියුමන් රයිට්ස් වොච් සංවිධානය පවසන පරිදි ලොව පුරා අහමදියා අනුගාමිකයන් මිලියන 10ක් සිටිනවා. 

පකිස්තානයේදී හා සවුදි අරාබියේදී අහමදියාවරුන් නීත්‍යානුකූලව මුස්ලිම්වරුන් ලෙස සලකන්නේ නැහැ. ඔවුන්ට හජ් වන්දනාව සඳහා අවස්ථාව ලැබෙන්නේ නැහැ. 

පකිස්තානයේ අහමදියා ජනගහණය මිලියන දෙකත් පහත් අතර වෙනවා. පකිස්තාන පාර්ලිමේන්තුව 1974දී සමමත කළ නීතියක් අනුව මහමත්තුමා අවසාන නබිවරයා ලෙස නො පිළිගන්නා අය මුස්ලිම්වරුන් ලෙස සැලකෙන්නේ නැහැ. සියා උල් හක් හමුදා පාලකයාගේ සමයේ ගෙන එන ලද නීති අනුව අහමදියාවරුන්ට ආගම ඇදහීමේ නිදහස අහිමි කර තිබෙනවා. ඔවුන්ට කුරාන් පාඨ කීම, යාඥා කිරීම පවා තහනම්. පකිස්තානුවන් ජාතික හැඳුනුම්පත් හා විදෙස් ගමන් බලපත්‍ර අයදුම් කිරීමේදී අහමද් යනු නබිවරයකු යයි නො පිළිගන්නා බවට හා අහමදියා යනු මුස්ලිම්වරුන් නො වන බවට දිවුරුමක් දිය යුතුයි.   

භෞතික විද්‍යාව සඳහා නොබෙල් තෑග්ග දිනූ අබ්දුස් සලාම් නොබෙල් තෑග්ග දිනූ පළමු මුස්ලිම් ජාතිකයා සේ ම පකිස්තානුවාත් වෙනවා. ඒත්, පකිස්තානය ඔහුගේ සොහොන් කොතේ ඔහු මුස්ලිම්වරයකු ලෙස තිබූ සඳහන ඉවත් කළා. එසේ කළේ ඔහු අහමදියා බැතිමතකු නිසායි.

අහමදියා මුස්ලිම්වරුන්ට එරෙහි ප්‍රහාර පකිස්තානයේ ඉතා සුලබයි. 2010 මැයි 28දා සිකුරාදා යාඥා මෙහෙයන් අතරතුරදී අන්තවාදීන් පිරිසක් විසින් අහමදියා මුස්ලිම් පල්ලිවලට එල්ල කරන ලද ප්‍රහාරවලින් 94දෙනෙකු මිය ගොස් 100කට අධික පිරිසක් තුවාල ලැබුවා. පකිස්තානයේ ඇතැම් මද්රසා ආගමික පාසල්වල අහමදියාවරුන් දුටු තැන මරා දැමිය යුතු බවට ඉගැන්වෙන්නේ යයි ලංකාවේ ජීවත් වන අහමදියා සරණාගතයෝ පවසනවා.

ලංකාවේත් 1915 සිට අහමදියා මුස්ලිම් ප්‍රජාවක් තිබෙනවා. කොළඹ හා මීගමුවේ ඔවුන්ගේ පල්ලි ද පිහිටා තිබෙනවා. ලංකාවේත් සම්ප්‍රදායික ඉස්ලාම්වරු අහමදියාවරුන්ව මුස්ලිමුන් ලෙස සලකන්නේ නැහැ.

ලංකාවේ රැඳී සිටිමින් සංවර්ධිත රටවල දේශපාලන රැකවරණ අපේක්ෂා කරන අහමදියා මුස්ලිම්වරුන් හා ක්‍රිස්තියානි බැතිමතුන් ව්‍යාජ හේතු ඉදිරිපත් කරන ආර්ථික සංක්‍රමණිකයන් පිරිසක් බවයි පකිස්තාන රජය පවසන්නේ.

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු. Read in English blog.parakum.com