සුන්දර ඉංග්‍රීසි: මයි හන්ඩ්‍රඩ් යෙලෝ යෙලෝ ස්ලීපිං ඔන් ද ඩොන්කි බෙඩ්

ඉංග්‍රීසි භාෂාව සම්බන්ධ විහිළු කතා ගොඩක් සමාජයේ පැතිර තිබෙනවා.  මේ කතාවලින් කෙරෙන්නේ භාෂාවේ පුංචි පුංචි කාරණා අරගෙන සිනා වීමයි. සමහර විට මේ විහිළු සම්බන්ධ වන්නේ ඉංග්‍රීසි භාෂාවේ ඇතැම් වචනවල උච්චාරණයන් එක්කයි. 

එක දවසක් එක් ඉංග්‍රීසි පංතියක සිසුවෙකුට හදිසි අවශ්‍යතාවක් ඇති වෙලා. මේ පන්තියේ ගුරුවරයා අවධාරණය කර තිබෙන්නේ හැකි තරම් ඉංග්‍රීසියෙන් කතා කරන්නටයි. සිසුවාටත් අවශ්‍ය ඉංග්‍රීසියෙන් ම කතා කරන්නයි. 

"Sir, may I render?" කියා සිසුවා ගුරුවරයාගෙන් ඇසුවාලු. 

ඉංග්‍රීසි බසින් රෙන්ඩර් කියන්නේ යමක් පිරිනැමීමයි. ගුරුවරයා සතුටින් මෙහෙම කීවාලු. "Yes son, you may." 

ඒත්, සිසුවාට අවශ්‍ය වෙලා තිබෙන්නේ කිසියම් ශරීර කෘත්‍යයක් ගැන කියන්නයි.

ලංකාවේ ඉංග්‍රීසි අධ්‍යාපනයේ තිබෙන විශේෂ ලක්ෂණයක් තමයි, වැසිකිළිය, ලිංගිකත්වය හා අසභ්‍ය යයි කියන වචනපිළිබඳව කොතැනකින්වත් සිසුන්ට අධ්‍යාපනයක් නො ලැබීම. මෙය හරියට taboo එකක් තහංචියක් වගෙයි. ලංකාවේ වැඩි දෙනෙක් ශාරීරික අවශ්‍යතාවන් පිළිබඳව ඉංග්‍රීසියෙන් කතා කරන්නට දන්නේ නැහැ. 

පාසල්වලදී ළමයින්ට පුහුණු කරන භාවිතාවක් තමයි,"May I go to toilet?" කියන එක. ඒත්, එය ටිකක් අවිනීත යයි සලකන්නත් පුළුවන්. ඒ නිසා ඇතැමෙක් ටොයිලට් වෙනුව‍ට washroom වැනි වදනක් භාවිතා කරනවා. 

පිස් (piss) කරනවා කියා මුත්‍රා කිරීමට වෙනුවෙන් භාවිතා කරන අයත් ඉන්නවා. ඒත් piss කියන්නේ අසභ්‍ය වදනක්. පී කරනවා කියන්නේ (pee) කතා ව්‍යවහාරයේ මුත්‍රා කිරීම වෙනුවෙන් යොදන වදනක්. 

ලංකාවේ ඇතැමෙක් සිතන්නේ ඉංග්‍රීසියෙන් මුත්‍රා කරනවාට කියන්නේ පම්ප් කියායි. ඒ නිසා පම්ප් එකක් දාන්න යන කට්ටිය ඉන්නවා. 

මළ පහ කිරීමට ව්‍යක්ත ඉංග්‍රීසියෙන් භාවිතා කරන්නේ defecation, excretion වැනි වදන් ය. Shit නම් ක්‍රියාපදය හා නාමපදය සැලකෙන්නේ අසභ්‍ය වදනක් ලෙසයි.

බොග දානවා කියන වදන හදාගෙන තිබෙන්නේ bog (මඩ වගුර) යන ඉංග්‍රීසි වදනින්.

පඩ නම් වචනය හැදී තිබෙන්නේ ඉංග්‍රීසි fart ඇසුරිනුයි. 

බොහෝ සංස්කෘතීන් තුළ ශරීර කෘත්‍යයන් සම්බන්ධ වදන් තරමක් දුරට තහංචි (taboo) ස්වරූපයක් ගන්නවා. ශරීර කෘත්‍යයන් සම්බන්ධ ඉංග්‍රීසි අව්‍යක්ත යෙදුම් ලැයිස්තුවක් http://en.wiktionary.org/wiki/Appendix:English_toilet_slang කියන වෙබ් ලිපිනයේ හමු වුණා.

සිංහලයාගේ භාෂා භාවිතාව තුළ 'ගිහින් එන්නම්' කියා කියමනක් තිබෙනවා. ඒ නිසා සමහරු "I'll go to the toilet and come," යි කියනු අසන්නට ලැබෙනවා. හැබැයි මෙය අසන විදේශිකයෙක් එය අසභ්‍ය ප්‍රකාශයක් ලෙස සලකන්නට ඉඩ තිබෙනවා. එහි තේරුම "මම වැසිකිළි යනවා, ඔබත් එන්න," යි තේරුම් යාම එයට හේතුවක්. 

සමුගැනීමකදී සිංහලයින් බොහෝ විට 'මම / අපි ගිහින් එන්නං' කියා කියනවා. මෙය මුල් ඉංග්‍රීසි සංස්කෘතියේ නැති, සිංහලයන්ගේ සුවිශේෂ ලක්ෂණයක්. ඒ නිසා "Good bye" වෙනුවට "I'll go and come" කියා කියන සිංහලයන් ඉන්නවා.

ලිපිය පටන් ගත්තේ ඉංග්‍රීසි සම්බන්ධ විහිළු කතා මාතෘකා කරගෙන නේ. 'ට්‍රැක් පැන්නද' මන්දා.

ඉංග්‍රීසි පංති ගිහින් ටිකක් ඉංග්‍රීසි ඉගෙන ගත්ත සිසුවෙක් දවසක් බස් නැවතුමේ ඉන්නකොට වැස්සක් වැස්සා. මිනිහා අත කුඩයක් තිබුණා. කුඩයක් අත නො තිබුණු, තෙමෙමින් හිටි ගැහැනු ළමයකු ළඟට ගිහින් ඔහු මෙහෙම කිව්වා. "Why are you outstanding? Come and understand my umbrella." ඔහු අදහස් කළේ "ඇයි ඔයා එළියේ හිටගෙන ඉන්නේ? ඇවිත් මගේ කුඩේ යටින් හිටගන්න" කියායි. 

මේ තවත් එවැනි සංවාදයක්.

Are you Christmas? (ඔයා ක්‍රිස්තියානිද?)

No.

Then why are you hanging a church? (එහෙනම් ඔයා කුරුසයක් එල්ලගෙන ඉන්නේ ඇයි?)

ක්‍රිකට් තරගයකට සහභාගි වන්න පිටින් ආපු කණ්ඩායමක නායකයෙක් සත්කාරක කණ්ඩායමෙන් මෙහෙම ඇහුවාලු. 

Who is the captain?

I is the captain?

Oh, you are the captain?

Yes I are the captain. 

සමහර විහිළු හැදිලා තිබෙන්නේ සිංහල වචනවල ඉංග්‍රීසි පරිවර්තනවලින්. 

Black fat rice flies very mathematics යි කිව්වේ කලුතර හාල්මැස්සන් හරි ගණන් ය කියන්නයි. 

Village water came to my salary යනු ගංවතුර මගේ පඩිය ළඟටම ආවාය කියන එකලු. 

My hundred yellow yellow sleeping on the donkey bed  - මගේ සීයා කහ කහ බූරු ඇඳ උඩ බුදි. 

ලංකාවේ සමහරු හිතනවා අඹයාළුවන්ට ඉංග්‍රීසියෙන් mango friends යි කියනවා කියලා.

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු. Read in English blog.parakum.com