වැලිඔය සම්පත්නුවර, මිහින්තලේ රේල් පාර හා හම්බන්තොට | Sampathnuwara of Welioya, Mihinthale rail track and Hambanthota

(2010 නොවැම්බර් 14, W3Lanka) සංවර්ධනය කියන්නේ ඇලඩින්ගේ පුදුම පහන නෙවෙයි කියා කියන්නේ රෙජිනෝල්ඩ් කුරේ අධිකරණ නියෝජ්‍ය ඇමැතිවරයා ය. "සංවර්ධනය කියන්නේ සිතූ පැතුම් ඉටුවන ඇලඩින්ගේ පුදුම පහනක් නොවෙයි. මතුපිටින් අර්ථ ගැන්වීම අනුව ලාභය හා සුඛවිහරණය පමණක්ම නොවෙයි. අප පිළිගත යුතු තිත්ත ඇත්තක් තිබෙනවා. සංවර්ධනයේ මූලික අවදියේදී අප විශාල කැප කිරීම් සිදු කළ යුතුයි. අඟහිඟකම් අඩුපාඩු තිබෙන්න පුළුවන් ඒ සියල්ලම තාවකාලිකයි. අප දුක් වින්දොත් තමයි ඊළඟට සැප විඳීමට පුළුවන්කම ලැබෙන්නෙ," යි ඔහු දිනමිණට පවසයි.


එහෙත්, කලක් වරාය කෑ ඇමති කෙනෙකු වූ මංගල සමරවීර කියන පරිදි හම්බන්තොට වරාය ලංකාවේ මෙතෙක් ඉදිවූ විශාලතම සුදුඅලියා ය.


ලබන 18 දාට මේ වරායට ජාත්‍යන්තර මට්ටමේ වාණිජ නැවක් ඇතුළුවන බව ආණ්ඩුව කියනවා නම්, දෙවන ජාත්‍යන්තර වාණිජ නැව හම්බන්තොට වරායට සේන්දු වන්නේ කවදාදැයි ප‍්‍රකාශ කරන ලෙස අභියෝග කරන සමරවීර, මෙය මහින්ද රාජපක්ෂ හෙවත් මායාරත්නගේ තවත් මායාවක් පමණක් බවත් ඔහු ලංකා ඊ නිව්ස් වෙබ් අඩවියට සඳහන් කරයි.


තමා වරාය ඇමැති ලෙස සිටියදී එම සියලූ ශක්‍යතා වාර්තා සලකා බලා අවසානයේ උපදෙස් ලැබුණේ නැව්වලට තෙල් සැපයීමේ වරායක් ලෙස හම්බන්තොට වරාය පවත්වාගෙන යාමට බවත් සමරවීර කියයි.


කොළඹ වරාය උපයන ආදායම හම්බන්තොට වරාය ඉදිකරන්නට යොදන නිසා ලෝකයේ හොඳම වරායවලින් එකක්වූ, කොළඹ වරායද ඉදිරියේදී බංකොලොත් වරායක් බවට පත්වනු ඇතැයි ද ඔහු කීවේය.


හම්බන්තොට වරාය මුහුණ දෙන අභියෝග පිළිබඳව අප මීට පෙර ලියන ලද ලිපියට සබඳතා පුරුක මෙම ලිපියේ අග ඇත. 


පසුගිය දිනෙක රජයේ ඉහළ නිලධාරියකු ම රාජපක්ෂ පාලනය විසින් හම්බන්තොට දිස්ත්‍රික්කයේ මත්තල ඉදි කරන ගුවන් තොටුපළ සන්සන්දනය කර තිබුණේ ආර්. ප්‍රේමදාස ජනාධිපති සමයේ ඉදි කරන ලද අනුරාධපුර - මිහින්තලේ රේල් පාරටයි. විශාල වියදමක් කර ඉදි කරන ලද මෙම දුම්රිය පාරේ කෝච්චි දුවන්නේ අවුරුද්දට දින දෙක තුනක් පොසොන් උත්සව කාලයේ පමණි. එහි කවුරු හෝ ගමන් කරනවා නම් ඒ අබලන් රේල් පාරක සෙමින් ගමනෙන් ජොලියක් ලැබීමට හෝ පොසොන් දින දෙක තුනේ අනුරාධපුර - මිහින්තලේ මහා මාර්ගයේ ඇති තදබදය හෝ නිසා පමණි.


හම්බන්තොට දිස්ත්‍රික්කයේ රජය විසින් කරනු ලබන දැවැන්ත ඉදිකිරීම් සත්තකින් ම මහින්ද රාජපක්ෂ පවුල් පාලනයට දැවැන්ත අභියෝගයක් ද නිර්මානය කරයි. 


හම්බන්තොට වරායට නැව් ගෙන ඒම, මත්තල ගුවන් තොටට ගුවන් යානා ගෙන ඒම ආදී කාර්යයන් ඒවා ඉදි කිරීම තරම් ම හෝ ඊටත් වඩා දුෂ්කර ය. 


මහින්ද රාජපක්ෂ පාලනය සමග තරහා අයට මේවා අසාර්ථක වේවා යි ප්‍රාර්ථනා කළ හැකි ය. එහෙත්, ඒවා අසාර්ථක වුණොත් අනාගත පරම්පරා බොහෝ ගණනාවකට ගොඩ එන්නට බැරි ණය බරක රට එරෙනු ඇත. රාජපක්ෂලා කෙළවා ගත්තා යයි සතුටු වන අපගේ සිනාව ඔවුන්ට කෙසේ වෙතත් අපේ දරු මුණුබුරන්ගේ ජීවිතවලට නම් දුක් අ‍‍ඳෝනාවක් වනු ඇත. 


‍කොළඹින් දිනපතා පිටත් වන එක් බස් රථයක් තිබේ. අනුරාධපුරය, මැදවච්චිය, කැබිතිගොල්ලෑව, පදවිය හරහා මෙම බස් රථය දිවෙන්නේ සම්පත්නුවර නම් නගරයකටයි. ඔබ මේ සම්පත්නුවර ගැන අසා තිබේ ද?  


මේ වනාහි මහවැලිය සමග කිසිදු සම්බන්ධයක් නැතත්, මහවැලි එල් කලාපය ලෙස නම් කර 'සංවර්ධනය' කරන ලද වැලිඔය හෙවත් මනල් ආරු ආශ්‍රිත ආරක්ෂක ජනපදය මධ්‍යයේ ඉදි කරන ලද සැලසුම් සහගත නගරයයි. මේ නගරය 1980 දශකයේ අගභාගයේදී පුළුල් මං මාවත්, බස් නැවතුම්පොළ, මධ්‍ය මහා විද්‍යාල, පොලිස් ස්ථාන, හමුදා කඳවුරු, රජයේ කාර්යාල, ක්‍රීඩාංගන, තානායම් ආදී නාගරික පහසුකම් සහිතව ඉදි කරන ලදී. 


එහෙත්, යුද්ධය හේතුවෙන් මෙම ආරක්ෂක ජනපදයේ ජන ජීවිතය අවුල් විය. බලාපො‍රොත්තු වූ පරිදි සිංහල ජනයා මෙම ප්‍රදේශවල පදිංචි කිරීමට බැරි වූ අතර, අවසානයේදී මේ නගරය වල් බිහි වී අවතාර නුවරක් බවට පත් විය. යුද්ධයෙන් පසු කුමක් සිදු වනු ඇද්ද යන්න මෙම ලේඛකයා නො දනී. එහෙත්, ජන විකාශනය හා ආර්ථික සංවර්ධනයේ ශඛ්‍යතා පිළිබඳ නො තකා හරිමින් කරන ලද මහජන මුදල් නාස්ති කිරීම් පිළිබඳව වැලිඔය සම්පත්නුවර කදිම සාක්ෂියකි. සම්පත්නුවර බසය නැතිනම් මේ නුවර ගැන මතකය කැළෑවෙන් ම වැසී යන්නට ඉඩ තිබිණි. 


පසුගිය සටන් විරාම සමයේ මෙම ලේඛකයා පුවත්පත් කලාවේදියකු ලෙස මෙම ප්‍රදේශයේ සංචාරයක නිරත වූ අතර, වල් බිහි වී තිබුණු සම්පත්නුවර ක්‍රීඩාංගනයේ දැවැන්ත ක්‍රීඩාගාර අතරින් එකක් අසල සිට ඡායාරූපයක් ද ගත්තේ ය. එහෙත්, දැන් එය ඔහු ළග නැත. 


හම්බන්තොට තවත් සම්පත්නුවරක් නො වේවා යි ලේඛකයා අවංකව ම ප්‍රාර්ථනා කරයි. 


මෙම ලිපියත් කියවන්න: 

හම්බන්තොටින් ගලන 'සංවර්ධනය' දිළින්දන්ගේ ජීවිත වෙත කාන්දු වන්නට තව 'බොහෝ කල්' අවශ්‍ය ය

Bookmark, remember easily and come again  www.w3lanka.com