මැරවරයන් ඡන්ද වැඩට යොදා අවුල් නිර්මානය කරන්නන් පරදවමු

පසුගියදා කොටහේන ප්‍රදේශයේදී සිදු වූ වෙඩිතැබීම සාමකාමීව සිදු වූ මැතිවරණ ව්‍යාපාරය නම කිරි කලයට ගොම බිංදුවක් දැමීම නම් විය. සිදුවීමෙන් දිළින්දෝ දෙදෙනෙක් මිය ගිය හ.

බ්ලූමැන්ඩල් ප්‍රහාරය සඳහා පාතාල සාමාජිකයන් පැමිණි හයිබ්‍රිඩ් වර්ගයේ මෝටර් රථය මෙවර එක්‌සත් ජනතා නිදහස්‌ සන්ධානයෙන් කොළඹ දිස්‌ත්‍රික්‌කයට තරග කරන අපේක්‍ෂකයන් දෙදෙනකුට අයත් වැල්ලම්පිටිය ප්‍රදේශයේ කාර්යාලයක සඟවා තිබියදී අපරාධ පරීක්‍ෂණ දෙපාර්තමේන්තුව විසින් අත්අඩංගුවට ගෙන ඇත.

පාතාල සාමාජිකයන් ඡන්ද ප්‍රචාරය සඳහා යොදා ගැනීම ගැන එජාප අපේක්ෂක රවි කරුණානායක ද දෝෂාරෝපණයට ලක් වී තිබේ.

ඇත්තෙන් ම මේ පාතාල ලෝකය යනු මාධ්‍ය නිර්මානයකි. එහි අමුතු මිනිස්සු කොට්ඨාසයක් නැත. එදිනෙදා ඔබට හමු වන සාමාන්‍ය මිනිස්සු ම යම්, යම් සංදර්භයන්හිදී කුඩු ගහන්නෝ, කුඩු විකුණන්නෝ, මංකොල්ලකන්නෝ, කුලියට මිනීමරන්නෝ ආදීහු බවට ද පත් වෙති. මේ අය දේශපාලකයන්ගේ ඇසුරට ද පත් වෙති. එයින් බලවත් වී අපරාධ හා වැරදි අඛණ්ඩව කරගෙන යති. දේශපාලන හා ධන බලය පාවිච්චි කර පොලිසියෙන් හා නීතියෙන් ගැලවෙති.

පාතාල ලෝකය බවට පත් වන මෙම මැරවරයන් දේශපාලකයන්ට කප්පම් ගෙවති. ඔවුන්ට බැලමෙහෙ කරති. දේශපාලකයෝ ඔවුන්ට මුක්තිය තහවුරු කර දෙති. දේශපාලනයත්, පාතාල ලෝකයත් අතර සම්බන්ධය නිර්මානය වන්නේ එසේ ය. මෙය කලක සිට ම තිබුණු සංසිද්ධියක් වන අතර මහින්ද රාජපක්ෂ පාලන සමයේ උපරිමයට ම නැග්ගේ ය.

කෙසේ වෙතත්, මෙම මහ මැතිවරණයේදී කුමන පැත්තේ සිටියත්, මැරවරයන් ඇසුරු කර අවුල් නිර්මානය කරන දේශපාලකයන් ඡන්දයෙන් පැරදවීමට ජනතාව කටයුතු කළ යුතු ය. එය අනිවාර්යයෙන් ම උගැන්විය යුතුව තිබෙන පාඩමකි.

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.