සුන්දර ඉංගිරිසි: බාටා දාගෙන ඇස්ලෝන් බට ගන්න ගිහින්

වෙළඳ නාම කියන්නේ භාණ්ඩයක් නිපදවන සමාගමක් හෝ සේවාවක් සපයන සමාගමක් ඒ භාණ්ඩයට හෝ සේවාවට සපයා තිබෙන නාමයයි. හැබැයි මේ වෙළඳ නාම ඇතැම් විට භාණ්ඩය හා සේවාවේ නම විධියට ම භාවිතා කරන ආකාරය දකින්න ලැබෙනවා.

මෙය ලෝකය පුරා ම වගේ දකින්නට ලැබෙන දෙයක්. නිදසුනක් ලෙස අන්තර්ජා‍ලයේ සෙවීම් කරන්න තිබෙන සෙවුම් යන්ත්‍ර අතරින් බහුලවම භාවිතා කරන සෙවුම් යන්ත්‍රය වන ගූගල් නිසා ගූගල් කරනවා වැනි ක්‍රියාපදත් සෑදී තිබෙනවා. ගූගල් කරනවා කියන්නේ අන්තර්ජාලයෙන් යම් තොරතුරක් සොයනවාටයි.

ලංකාවේ මිනිස්සුත් මෙවැනි වචන රැසක් සිංහල කරගෙන භාවිතා කරනවා. අද අපි සාකච්ඡා කරන්නේ එවැනි උදාහරණ කීපයක් ගැනයි.

ඇතැම් අය සෙරෙප්පුවලට කියන්නේ බාටා කියලායි. වැසිකිළි යනකොට බාටා දෙකක් දාගෙන යන්න දැන් මිනිස්සු පුරුදු වෙලා. ඇතැම් දුරබැහැර පාසල්වල විදුහල්පතිවරුත් පාසලට බාටා දැමීම තහනම් කරන ආකාරය ගැන රැස්වීම්වල කියනවා මම අසා තිබෙනවා.

ස්විට්සර්ලන්තය පදනම් කර ගත් බහු ජාතික පාවහන් සමාගමක් වන බාටා සමාගම ලංකාවේ වෙළඳ ප්‍රචාරණයේදී භාවිතා කළ වෙළඳ පාඨයක් වුණේ ‘පළමුව බාටා - දෙවනුව පාසල’ යන්නයි.

බාටා කොම්පැනිය හදන්නේ සෙරෙප්පු පමණක් නො වුණාට ලංකාවේ ගැමියෝ බාටා කියන්නේ සෙරෙප්පුවලටයි. වෙනත් වෙළඳ නාම යටතේ නිෂ්පාදනය කරන සෙරෙප්පු පවා ඔවුන්ට බාටා.

පසුගිය දිනෙක මම දැක්කා යුනිලීවර් සමාගමේ ලොක්කෙක් පම්පෝරියක් ගහනවා රින්සෝවල නම රින් කියලා වෙනස් කළේ තමන්ගේ කාලේ කියා. සමහරවිට මෙය ජාත්‍යන්තරව කළ දෙයක් වෙන්නත් පුළුවන්. ඒත්, රෙදි සෝදන්නට පෙර සබන් කුඩු දමා තබන එකට රින්සෝ දානවා කියා ව්‍යවහාර කරන හැටි මම ඊයේත් ඇහුවා. එය භාවිතා කළේ සරසවි සිසුවෙක්.

ලංකාවේ මිනිස්සු තවමත් සබන් කුඩු දමා රෙදි පොඟවන එකට රින්සෝ දානවා කියනවා. ලංකාවේ ජන මනස හඳුනා නො ගත් ලාංකික යයි කියන නිලධාරීන් තම නිෂ්පාදනයේ නම මුග්ධ ලෙස වෙනස් කර ගත්තත්, රින්සෝ දානවා කියන භාෂාත්මක යෙදුම පරම්පරාවෙන් පරම්පරාවට හුවමාරු වෙලා.

ලංකාවට මුලින් ම ජංගම දුරකථන හඳුන්වා දුන් සෙල්ටෙල් සමාගමත් මුග්ධ ලෙස තමන්ගේ නම කීප වතාවක් වෙනස් කළා. ඒත්, බොහෝ කාලයක් යන තෙක් අපේ ර‍ටේ මිනිස්සු ජංගම දුරකථනයට කීවේ සෙල්ටෙල් එක කියලායි.

භාණ්ඩ හිඟයක් තිබුණු හැත්තෑගණන්වලදී ලංකාවේ මිනිස්සු ඇ‍ඟේ ගාන සබන්වලට කිව්වේ ලයිස්බෝයි කියලායි. රෙදි සෝදන සබන්වලට කිව්වේ සල්ලයිට් කියලායි. ඒ කාලේ පුසුඹ සබන් තරමක සුඛෝපභෝගී භාණ්ඩයක්.

පී.වි.සී.වලින් හදපු වතුර බටවලට ඇස්ලෝන් බට කියන එකත් මෙවැනි ම යෙදුමක්. ඇස්ලෝන් කියන්නේ මේ ජල නල ප්‍රචලිත කළ සමාගමක් විසින් ඒවාට යෙදූ වෙළඳ නාමයයි.

මෙවැනි වෙළඳ නාම භාවිතය ඖෂධ සම්බන්ධයෙන් නම් ඉතා සුලබයි. ඇස්පිරින් යන වේදනා නාශක ඖෂධය කාලයක් තිස්සේ ප්‍රසිද්ධ වෙලා තිබුණේ ඩිස්ප්‍රින් කියන නමින්. පසු කලෙක මෙය පැරසිටමෝල් වර්ගයක වෙළඳ නමක් වන පැනඩෝල්වලින් ආදේශ වුණා.

අලුත් භාණ්ඩයක් වන ඡායා පිටපත් යන්ත්‍රය ඇතැම් රටවල තවමත් හැඳින්වෙන්නේ වෙළඳ නාමවලින්. ඒ වගේ ම අංකිත අනු පිටපත් යන්ත්‍රය ලංකාවේ හැඳින්වෙන්නේ ඩුප්ලෝ කියන වෙළඳ නාමයකින්. ඩුප්ලෝ කරනවා වැනි ක්‍රියා පදත් හැදිලා තිබෙනවා.

ටින් මාළුවලට අපේ රටේ සැමන් හා සාඩින් කියන නම් ව්‍යවහාර කරනවා. ඒත්, ඇත්තෙන් ම සැමන්, සාඩින් කියන්නේ මාළු වර්ග දෙකක්. තදබද වුණ බස් ගැන කතා කරනකොටත් සැමන් ටින් එකක් වගේ කියා උපමාවක් භාවිතා කරනවා.

අජිනොමොටෝ කියන්නේ තවත් සුලබව භාවිතා වන වෙළඳ නාමයක්. මේ මොනෝ සෝඩියම් ග්ලූටමේට් හෙවත් එම්.එස්.ජී. වෙනුවෙන් ලංකාවේ අජිනොමොටෝ කියන නම සුලභව භාවිතා වෙනවා.

හැත්තෑගණන්වල අපේ මිනිස්සු කිරිපිටිවලට ලක්ස්ප්‍රේ කියා ව්‍යවහාර කරමින් සිටියා.

පැණි බීමවලට ඔරේන්ජ් බාර්ලි කියන ව්‍යවහාරයත් මෙවැනිම එකක්. ගැමියන්ගේ අවමංගල්‍යයන්වලදි එක් කාලෙක බාර්ලි ‍බෝතලය අනිවාර්ය අංගයක් වුණා. වන්නියේ දෙමළ ගැමියන් පැණි බීමවලට සෝඩා යයි කියනු මම අසා තිබෙනවා.

ඕනෑ මාගරින් වර්ගයක් ඇස්ට්‍රා කියා හැඳින්වීමත් මෙවැනි ම තත්වයක්.

වාහන නම් අතරත් මෙවැනි වෙළඳ නාම භාවිතයන් තිබෙනවා. කැන්ටර් කියන්නේ මිට්සුබිෂි සමාගම නිපදවූ කුඩා ට්‍රක් රථ වර්ගයක වෙළඳ නාමය වුණත් අද එය එවැනි වාහන සඳහා පොදුවේ භාවිතා වන නමක් බවට පත්‍ වෙලා. ජේ.සී.බී. කියන්නේත් වෙළඳ නාමයක්. අද අපේ ගෙවල් පාරේ ජේ.සී.බී. එකක් ගියා.

හැට හැත්තෑ ගණන්වල ලංකාවේ කඳුකර මාර්ගවල ධාවනය වූ කුඩා බස් වර්ගයට මිනිස්සු කිව්වේ පියට්ටෙක කියලායි. ඕ.එම්. ටිග්‍රටෝ නම් වූ මේ බසයත් ඉතාලියේ ෆියට් සමාගමත් සමග යම් සම්බන්ධයක් තිබෙන්න ඇති.


මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.