ජනමත ගොඩනැගීමේ යුද්ධය

ජනාධිපතිවරණයේදී ආණ්ඩු පක්ෂය හා විපක්ෂය කරමින් සිටින්නේ ජනමත ගොඩනැගීමකි.

පෙනෙන්නට තිබෙන ආකාරයට ඡන්දය දෙන්නේ ආණ්ඩු පක්ෂයට ද විපක්ෂයට ද යන්න සම්බන්ධයෙන් ඡන්ද දායකයන්ගෙන් සැලකිය යුතු පිරිසක් දැනටමත් තීරණය කර හමාර ය.

මේ අය ජනාධිපතිවරණ ව්‍යාපාරය තුළ කරමින් සිටින්නේ එකිනෙකාට තම බලය පෙන්වීම, තම ස්ථාවරය ආරක්ෂා කර ගැනීම හා අනෙකා තමන්ගේ පැත්තට නම්මා ගැනීමට උත්සාහ කිරීමයි. 

බලය පෙන්වීම නම් කාරණයෙහිදී ආණ්ඩු පක්ෂය ප්‍රධාන වශයෙන් කරමින් සිටින්නේ තමන් සමග මෙතෙක් සිටි බලවේගය තවමත් එහෙමම සිටින බව පෙන්වීමට උත්සාහ කිරීමයි. ඒ සඳහා කලින් සිට තමන් ළඟ සිටි දේශපාලන නායකයන් එහෙමම සිටින බව පෙන්වීම සඳහා ඔවුන් ඉදිරියට තල්ලු කර කතා කරවමින් සිටියි. යන්නට සිටි අය එළියට ඇවිත් ජනාධිපතිවරයා ගැන නොව පක්ෂය ගැන කියමින් අඬති. එසේ කරන්නේ ඡන්ද වඩන්නට ද කඩන්නට ද යන්න පැහැදිලි නැත.

මේ අතර පසුගිය දිනෙක ජනාධිපතිවරයා අරලියගහ මන්දිරයේ තමන්ගේ හිතවතුන් සමග නිස්කලංකේ සිටින ආකාරයක් පෙන්වන ඡායාරූපයක් මාධ්‍ය වෙත නිකුත් කර තිබේ. ඉහත පළ වී තිබෙන එම ඡායාරූපය සඳහ ඔහු විසින් තෝරාගෙන තිබෙන පිරිස, ඔවුන්ගේ ශරීර භාෂාව හා ඡායාරූපයේ පසුබිම ආදිය අධ්‍යයනය කිරීම රසවත් කරුණකි.

විපක්ෂය බලය පෙන්වන්නට උත්සාහ කරන්නේ ආණ්ඩු පක්ෂයේ මන්ත්‍රීන් එක එකා තමන් වෙත බිලී බා ගනිමිනි. 

බලය පෙන්වීම ඉතා වැදගත් ය. මන්ද, දැනට තමන් ඡන්දය දෙන්නේ කාට ද යන්න තීරණය කර හමාර පිරිස් වෙනස් වන්නේ අන් කිසිවක් සමග නොව බලය සමගයි. ජනතාව තුළ ජයග්‍රාහී මානසිකත්වය ඇති කිරීම අත්‍යවශ්‍ය ය. හෘදය සාක්ෂියට වඩා ඡන්දයකදී ලංකාවේ ජනතාව සලකා බලන්නේ තමන් ඉන්නේ බහුතරය සමග ද, දිනන පැත්තේ ද වැනි කාරණා බව කලින් ඡන්ද නිරීක්ෂණය කිරීමේදී පෙනේ. 

අනෙක් පැත්තෙන්, පාවෙන ඡන්දවලට ද එහි බලපෑම අති විශාල ය. ජනාධිපතිවරණයේ ප්‍රතිඵල කෙබඳු ද යන්න හුදෙක් ම දේශපාලන වශයෙන් සක්‍රිය කොටස්වල ප්‍රතිචාරයෙන් තේරුම් ගත නො හැකි ය. දේශපාලනය අඩුවෙන් කතා කරන කොටස සිතන්නේ කෙසේ ද යන කාරණය ඉතා වැදගත් ය. විශේෂයෙන් ම ලංකාවේ ඡන්ද දායකයන්ගෙන් 50%කට වැඩි ප්‍රතිශතයක් කාන්තාවෝ ය. එහෙත් දේශපාලන වශයෙන් සක්‍රිය පිරිසගෙන් 95%ක් ම පිරිමි ය. කාන්තාවන් අමතන්නට සමත් වන්නේ කවුුරුද, ඒ අපේක්ෂකයා ජයග්‍රහණය කරනු ඇත. 

මෙවර ඡන්දයේදී සාකච්ඡාවට බඳුන් වන තේමාවන් මොනවා ද යන්න විධිමත් ලෙස හඳුනා ගන්නට අපි උත්සාහ කරන්නෙමු. 

දැනටමත්, ප්‍රජාතන්ත්‍රවාදය, යහපාලනය, දූෂණ විරෝධය, විධායක ජනාධිපති ක්‍රමය අහෝසි කිරීම හෝ එහි බලතල කප්පාදුව වැනි ඉදිරිගාමී තේමාවන් සියල්ල අතට ගෙන තිබෙන්නේ විපක්ෂ පොදු අපේක්ෂක මෛත්‍රීපාල සිරිසේන විසිනි. විපක්ෂය එසේ කිරීම සාමාන්‍ය තත්වයකි. 

ජනාධිපතිවරයා පැත්තෙන් ද පාලනය විනයගත කිරීමේ අවශ්‍යතාව ප්‍රකාශ වී තිබේ. එහෙත් ප්‍රජාතන්ත්‍රවාදය ශක්තිමත් වීමට හා යහපාලනයට ඉවහල් වන ප්‍රතිසංස්කරණ සිදු කිරීමේ උවමනාවක් නම් ඔහු වෙතින් පළ වී නැත. 

මේ අනුව බැලූ කල ජනාධිපතිවරණය එක් ආකාරයකට ප්‍රජාතන්ත්‍රවාදය හා අධිකාරිවාදය අතර සටනක් වී තිබේ. මෙ සමාජය තුළ ප්‍රජාතන්ත්‍රවාදයට තරමට ම අධිකාරිවාදයට ද කැමැත්තක් ඇතැයි සිතන්නට හේතු වන සාධක දක්නට තිබේ. විශේෂයෙන් ම සිංහල ජාතිවාදීන් සම්බන්ධයෙන් මෙම ප්‍රවණතාව දැකිය හැකි ය. පීඩිතභාවය නිසා ප්‍රජාතන්ත්‍රවාදය වෙනුවෙන් හඬ නගනමුත් දෙමළ ජාතිවාදීන් ද වඩා කැමති අධිකාරිවාදයට බව කොටි සංවිධානයේ ක්‍රියාකලාපය ඔප්පු කළේ ය. 

මතුපිට තලයේ තිබෙන ජනමත ගොඩනැගීම් ද  වැදගත් ය. දේශපාලන වේදිකාවල ප්‍රකාශ වන අදහස්වලට ප්‍රතිවිරුද්ධ අදහස් දේශපාලන වේදිකාවලටත් කලින් මහජන අවකාශවල පැන නගින ආකාරය නිරීක්ෂණය කළෙමි. නිදසුනක් ලෙස මෛත්‍රීපාල සිරිසේනගේ සොයුරා වන ඩඩ්ලි සිරිසේන සහෝදරයින් 12 දෙනෙකුගෙන් යුත් තම පවුල එකා මත එකා වැටුණත් තම සොහොයුරාගේ ජයග්‍රහණය වෙනුවෙන් වැඩ කරන බවට කළ ප්‍රකාශය ඊට පසු දින වන විට ම ජනතාව අතර සංවාදයට භාජනය වී තිබිණි. මේ සහෝදර සමාගමට සාපේක්ෂව ඒ සහෝදර සමාගම කොහොම වනු ඇද්ද යන්න ගැන ජනතාව උපහාසයෙන් කතා කළ හ. 

සිදු වන ජන මත ගොඩ නැංවීම් අතරින් සැලකිය යුතු ප්‍රමාණයක් මඩ, අවලාද, මිථ්‍යා මත ආදියයි. මෛත්‍රීපාල විසින් නිදහස් කරන ලද සුදු පරෙවියා පියඹා නොගොස් ඔහු පාමුල ම වැසීම ගැන ඊට පසු දින ම දිනමිණ කතා කර තිබුණේ මුදා හළ පක්ෂියා ආපසු කූඩුවට ආ බව කියමිනි. අනෙක් පැත්තට ද ජනමත ගොඩනැගීම් සිදු වනු ඇත. කේන්දරකාරයන්, සාත්තරකාරයන් මේ ඡන්ද සටනේ බලවත් පිරිසක් වනු ඇත. 

මෙම ලිපිය සම්පූර්ණ කිරීමෙහි ලා ඔබගේ දායකත්වය අපේක්ෂා කරන්නෙමි. අපගේ අවධානය යොමු වන්නේ ජනාධිපතිවරණ ප්‍රචාරණ ව්‍යාපාරය තුළ ඉදිරිගාමී අදහස් ජනතාව අතර ගොඩනැගීම හා ඒ ඔස්සේ අපේක්ෂකයන්ට බලපෑම් කිරීම කෙරෙහි ය. 

ඔබගේ අදහස් මෙහි සටහන් කරන්න.

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.