පාසලට අවශ්‍ය වේවැල නො ව ආදරයයි

මගේ පියා ගුරුවරයෙකි. මගේ පියා ගැන කතා කරන ඔහුගේ පැරණි ගෝලයන් කියන්නේ ම ‘සර්, ඒ දවස්වල ගහපු ඒවා තවම මතකයි,' කියා ය. තමන් මිනිසුන් වුණේ ඒ ගුටි කෑම නිසා බව ඇතැමෙක් කියති. එහෙත්, ඔවුන්ගෙන් වැඩිදෙනෙක් පොළේ වෙළෙන්දන් ය කියා මම ඒ දිනවල ම සිනාසුණෙමි.

අපේ තාත්තාගේ ඒ ගතානුගතික ගුරුපියකමට ලොකු ම අභියෝගය කළේ ඔහුගේ ම පුතා වන මමයි.

මම අවුරුදු 20කට වඩා ගුරු වෘත්තිය කළෙමි. ඒ කාලය තුළ මම කිසි දිනෙක ළමයින්ට ශාරීරික දඬුවම් දී නැතැයි මම නො කියමි. එහෙත්, මම නම් කියන්නේ, කලාතුරකින් හෝ එසේ සිදු වුණේ මගේ දුර්වලකම නිසා මිස මගේ හොඳකමක් නිසා නො වේ ය කියා ය. ඒවා අපගේ ගුරු ජීවිතයේ පසුතැවිලි විය යුතු සිදුවීම් ය.

ළමයින්ට ශාරීරිකව දඩුවම් දෙන්නට ගුරුවරුන් පෙළඹෙන්නේ ළමයින්ට තිබෙන ආදරය නිසා ය, ඔවුන් හදා ගන්නට ය වැනි පට්ට පල් බොරු සමාජය විශ්වාස නො කළ යුතු ය.

ගුරුවරුන් ලෙස කළ යුතුව තිබෙන්නේ ළමයින්ට ආදරය කිරීම, ඔවුන් සමග ජීවිතය බෙදා හදා ගැනීම හා ඉගැන්වීමයි.

ගුරුවරයකු ලෙස මම කිසිදු පාසලක අවුරුදු හතරකට වඩා වැඩ කර නැත. ඒ කිසිදු පාසලක් සමග මම ගැටලුවක් ද ඇති කරගෙන නැත. පාසල්වල පැල් බැඳගෙන සිටිමින්, තමන් සිටි කාලය බලයක් ලෙස පාවිච්චි කරන ගුරුවරුන් මට බොහෝ සේ හමු වී තිබේ.

ඇතැම් විට මෙවැනි ගුරුවරුන් පාසල්වල පුරාවෘත්ත බවට පත් වන්නට ද සමත් වෙති. දීර්ඝ කාලයක් එක ම පාසලේ සේවය කිරීම රජයේ පාසල් සම්බන්ධයෙන් නම් හොඳ තත්වයක් යයි මම නො සිතමි. කෙසේ වෙතත්, හොඳ පුරාවෘත්ත බවට පත් වීම නරක නැත. එහෙත්, ඇතැම් අය පුරාවෘත්ත වන්නට උත්සාහ කරන්නේ ළමයින් පෙළීමෙනි.

පාසල් ආශ්‍රිතව ද යාන් හෙවත් විහිළු කතා තිබේ. එවැනි කතා හදා ගන්නට හැකි වන්නේ ඇතැම් ගුරුවරුන්ගේ චරිත ලක්ෂණ අතිශයෝක්තියට නැගීමෙනි. ඇතැම් විට, වෙනත් කතා ද මේ ගුරුවරුන්ට ආදේශ කරනු ලැබේ. පුරාවෘත්ත හැදෙන්නේ එහෙම දේවලුත් එක්ක ය.  එහි වරදක් නැත.

එහෙත්, පරපීඩක කාමුකත්වයෙන් පෙළෙන, තමන්ගේ අසහනය දරුවන් මතින් මෝචනය කරන අසහනකාරී ගුරුවරුන් ප්‍රවර්ධනය කිරීම කිසි කලෙක නො කළ යුතු ය.

මම මෙවැනි ශාරීරික දණ්ඩනයට ශූර ගුරුවරුන්, ගුරුවරියන් බොහෝ දෙනෙකු මගේ ජීවිතය තුළ ඇසුරු කර තිබේ. ඔවුන් ළමයින් සමග පමණක් නො ව, ගුරුවරුන් හා සමාජයේ වෙනත් අය සමග ද ගෙවන්නේ අසහනයෙන්, කුහකකමින් පිරි ජීවිතයි.

පාසල්වලට අවශ්‍ය ආදරයයි.

අපට අවශ්‍ය පසුගාමිත්වයන් ප්‍රවර්ධනය කරන, පනින රිලවුන්ට ඉනිමං තබන මෙවැනි කතා නො වේ.



ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.