මිලියන් තුනක් ලබා ගත් බවට නැගෙන චෝදනාව ගැන පැහැදිලි කිරීමයි

මිලියන් තුනක් ලැබෙන්නට නියමිත බව ඇත්ත ය. සමහර විට ඔබ මෙම ලිපිය කියවන විට මිලියන් තුන ගිනුමට වැටී තිබෙනවා වෙන්නත් පුළුවන.

ඒවා ලැබුණේ කොහෙන් ද? ලබා ගත්තේ කුමන කොන්දේසි මත ද? මේවා වැදගත් ප්‍රශ්න වේ.

යහපාලනයෙන් ලැබිණි. මහින්දගෙන් ලැබිණි. ජවිපෙන් ද ලැබිණි. එන්ජීඕවලින් ලැබිණි. ඩයස්පෝරාවෙන් ලැබිණි. ඇමරිකාවෙන් ලැබිණි. ඉන්දියාවෙන් ලැබිණි. චීනෙන් ද ලැබිණි.

ඩොලර්වලින් නොවේ. යුරෝ  හ‍ෝ යුආන්වලින් ද නො වේ. එහෙනම් මොනවායින් ද?

හිට්වලිනි.

අපේ හිට් කවුන්ට‍රයේ මිලියන තුන හෙවත් ලක්ෂ තිහ සලකුණු වීමට නියමිත ය. සමහර විට ඔබ අ‍පගේ ලිපි කියැවූ වාර ගණන මීට වඩා අඩු මෙන් ම වැඩි වෙන්නටත් පුළුවන. එක පැත්තකින් බ්ලොගර් ආයතනය හිට් කවුන්ටරය පටන් ගත්තේ අපගේ බ්ලොගය ආරම්භ කළාට පසුවයි. එසේම, අප මෙම බ්ලොගයේ පළ වූ ලිපි ෆේස්බුක් ඔස්සේ ද පළ කළ බැවින් තවත් පිරිසක් ද ‍ඒවා කියවූ හ.

අප මෙම බ්ලොගය ආරම්භ කළේ 2009 ජුලි මාසයේ ය. මේ හිට් ගණන අපට ලැබුණේ ආසන්න වශයෙන් වසර හයක පමණ කාලයක් තුළයි. මෙය මහා දැවැන්ත සංඛ්‍යාවක් නො වන මුත් පෞද්ගලික බ්ලොග් අඩවියක් ලෙස නො සැලකිය යුතු සංඛ්‍යාවක් නො වේ. අප මේ මොහොතේ සිටින්නේ ඇලෙක්සා රෑන්ක් එක අනුව ලංකාවේ 355වන ස්ථානයේ ය.

හිරු පුවත්පතේ කර්තෘ ලෙස විකල්ප පුවත්පත් කලාවෙන් සමු ගනිද්දී අපේ පුවත්පත මුද්‍රණය කළේ සතියකට පිටපත් 2000ක් පමණි. අද වන විට අපේ දිනක හිට් සංඛ්‍යාව ඊට වඩා බෙහෙවින් වැඩි ය.

අප මෙම කාර්යයට පිවිසුණේ ප්‍රධාන ධාරාවේ ජනමාධ්‍යවලින් සෑහීමට පත් නො වී, විකල්ප පුවත්පත් පළ කිරීමෙන් වෙහෙසට පත් වී සිටියදී ය. බ්ලොග්කරණය හා අපගේ බ්ලොගය අලෙවි කර ගැනීම ඉගෙන ගත්තේ අත්හදා බැලීම් ඔස්සේ ය. මෙම වකවානුව තුළ අප අතින් බොහෝ අඩුපාඩු ද සිදු විය.

ජනප්‍රිය වීම වෙනුවෙන් අපි ඕපාදූප නො ලිව්වෙමු. ඒ වෙනුවට අප දිගින් දිගට ම උත්සාහ ක‍ළේ දෛනික ජීවිතයේ විවිධ සිදුවීම් විශ්ලේෂණය කරමින් සංවාදය ඔස්සේ දේශපාලන මතවාදයක් ප්‍රවර්ධනය කරන්නටයි. ජීවිත තුළින් සමාජවාදය අර්ථකථනය කිරීමේ අඛණ්ඩ අරගලයක අපි යෙදී සිටිමු.

අපි මේ මොහොතේත් මේ රටේ ප්‍රජාතන්ත්‍රවාදය වෙනුවෙන් අරගල කරන්නෙමු. මානව හිමිකම්, පරිසරය හා සොබාදහම නියෝජනය කරන්නෙමු. සෑම ආකාරයක ම ස්වෝත්තමවාදයන්ට හා ප්‍රචණ්ඩත්වයට එරෙහි වන්නෙමු.

අපේ අරගලය කිසිදු පුද්ගලයකු වෙනුවෙන් නො වේ. ‍එසේම කිසිදු පුද්ගලයකුට එරෙහිව ද නො වේ. අප උත්සාහ කරන්නේ සමාජය එක් දශමයකින් හෝ ඉදිරියට තල්ලු කරන්නට ය.

අපි හෙටත් ඒ වෙනුවෙන් පෙනී සිටිමු.

අප සමග සිටි ඔබට අපේ උපහාරය! එන්න, අපි එක්ව මේ ගමන යමු!

ඔබ සැමට සුබ නව වසරක් වේවා!

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.