ආණ්ඩුව අඬුව තියෙද්දී අත පුච්චා ගන්නේ කුමට ද?

පසුගිය ආණ්ඩුව හා සම්බන්ධ දූෂිත දේශපාලක බලවේගය මේ වන විට යෙදී සිටින්නේ ආර්ථිකය කඩාකප්පල් කිරීමේ දේශද්‍රෝහී ක්‍රියාවක ය. මෙය වහා වැළැක්විය යුතු ය. 

පසුගිය දිනවල පාර්ලිමේන්තුවේ හා ඉන් පිටත නටන ලද නාඩගමට පසුබිම් වූ හේතු කාරණා සම්බන්ධයෙන් මේ වන විට සැක සංකා ගණනාවක් ඇති වී තිබේ. 

මහින්ද රාජපක්ෂ විසින් ජනාධිපතිවරණය අතරතුරදී එජාප ලේකම් තිස්ස අත්තනායක සිය පක්ෂයට බිලී බාගෙන ඔහුට ඇමති තනතුරක් ලබා දීම සදාචාරයෙන් පමණක් නොව නීතියෙන් ද ප්‍රශ්න කළ හැකි ඉතා පැහැදිලි දූෂණයකි. අල්ලසකි. ප්‍රධාන මැතිවරණයක් පැවැත්වෙන කාලය තුළදී රජයේ සේවයේ රැකියා දීම පමණක් නොව ස්ථානමාරු පවා අවලංගු කරන්නේ එ්වා දේශපාලන අල්ලස් සඳහා භාවිතා කළ හැකි බැවිනි. තිස්ස අත්තනායකට දුන්නේ දේශපාලන අල්ලසක් බව ඉතා පැහැදිලි ය. ඒ පසුපස දැවැන්ත මුදල් සම්භාරයක් ද තිබිය හැකි ය. මෙවැනි දූෂණ විමර්ශනය කිරීම වැරදි යයි කියන්නේ ඒවායේ නියැලී සිටින සොරුන් පමණි. 

කෙසේ වෙතත්, මහින්ද රාජපක්ෂට ඇති දූෂණ චෝදනා සලකා බැලූ විට මෙය මහා සෑය ගිල්ල යකා කෑ අග්ගලාවක් වැනි ය. මෙය මේ මොහොතේ මතු වීම රාජපක්ෂ පවුලේ ම කුමන්ත්‍රණයක් විය හැකි ය. අල්ලස් හා දූෂණ විමර්ශන කොමිෂමේ නිලධාරීන් මෙයට හවුල් යයි සැක කළ හැකි ය. එසේම, මෙම කලබැගෑනිය ඔස්සේ 19වන ආණ්ඩුක්‍රම ව්‍යවස්ථා සංශෝධනය කඩාකප්පල් කිරීමට ද උත්සාහයක් තිබිය හැකි ය. 

ඒ කිසිවක් නොමැතිව අල්ලස් හා දූෂණ විමර්ශන කොමිෂමට ජනාධිපතිවරණය සමයේ ලැබුණු පැමිණිල්ලක් අනුව අනුපිළිවෙලින් සිදු වූ ක්‍රියාමාර්ගයක් වන්නට ද පුළුවන. 

කුමක් වුවත්, රාජපක්ෂ ගැත්තන් විසින් එය භාවිතා කරනු ලැබුවේ සිය කඩාකප්පල්කාරී වැඩසටහන ඉදිරියට ගෙන යන්නටයි. ඔවුන් විසින් ඇත්තෙන් ම ඉලක්ක කර තිබෙන්නේ ආර්ථිකයයි. 

දැයට කිරුළ වැනි වැඩසටහන් හා ඵලදායී නොවන යටිතල පහසුකම් සංවර්ධන ව්‍යාපෘති නැවැත්වීම ඔස්සේ පසුගිය ආණ්ඩුව විසින් නාස්ති කරන්නට සැලසුම් කර තිබුණු මුදල් ඉතිරි කිරීම නිසා ආණ්ඩුවට ජනතාවට යම් සහනයක් ලබා දීමේ හැකියාව තිබිණි. ජාතික ශෝක දින මැද ජනතාව මහත් උනන්දුවෙන් අවුරුදු කෑ හැටි අපි දුටිමු. අලුත් අවුරුදු සමයේ වෙනත් අවුරුදු කාලවලට වඩා කීප ගුණයකින් වැඩි භාණ්ඩ අලෙවියක් තිබූ බව වෙළෙන්දෝ පවසති. 

එහෙත්, රාජපක්ෂවාදීන් විසින් නිර්මානය කර තිබෙන දේශපාලන අස්ථාවරත්වය හා ඔවුන්ගේ කඩාකප්පල්කාරී ක්‍රියා හේතුවෙන් ආර්ථිකයට ඇති වී තිබෙන්නේ අයහපත් බලපෑමකි. විශේෂයෙන් ම අ‍ායෝජකයන් සිදු වන්නේ කුමක්දැයි නැවතී බලා සිටින අවිනිශ්චිතතාවක් ආර්ථිකය තුළ ඇති වී තිබේ. මෙයට බලපාන තවත් කාරණා කීපයක් ද තිබේ. ඒ අතර මහ බැංකුවේ බැඳුම්කර නිකුතුවේ ගැටලුව හා ඉහළ ලාභ ලබන සමාගම්වලට පනවන ලද එක් වරක් පමණක් අය කරන බද්ද ද තිබේ. 

නාස්තිකාර ඊනියා සංවර්ධන ව්‍යාපෘති නතර කිරීම ද දළ දේශීය නිෂ්පාදනයේ වර්ධනය අඩාල කිරීමට හේතු වන මුත්, එය දිගුකාලීනව ආර්ථිකයට හොඳ දෙයකි. 

මේ වසරේ ආර්ථික වර්ධන වේගය අඩු වනු ඇති බව මේ වන විටත් නිල වශයෙන් ම නිවේදනය කර තිබේ. 

එහෙත්, රාජපක්ෂවාදීන් විසින් සිතා මතා නිර්මානය කරමින් තිබෙන දේශපාලන අස්ථාවරත්වයට හා අවිනිශ්චිතභාවයට තිත තැබිය යුතු ය. 

මෙම කඩාකප්පල්කාරී ක්‍රියාවලියට නායකත්වය දෙන්නේ මහා පරිමාණ දූෂණවලට සම්බන්ධ පිරිස් ය. ඒ සඳහා යෙදවෙන්නේ ද කළු සල්ලි ය. මේ සොරුන්ට එරෙහිව කඩිනමින් පියවර ගත යුතු බව අපි මුල සිට ම කීවේ ඒ නිසා ය. යහපාලනය යනු විමර්ශන සඳහා ගත වන කාලය තුළ දූෂිතයන්ට නිදහසේ නටන්නට දීම නොවේ. 

ආර්ථිකය කඩාකප්පල් කර, ආණ්ඩුව අස්ථාවර කර, කඩාකප්පල්කාරී ක්‍රියා ඔස්සේ රජය පෙරළීමට උත්සාහ කිරීම ඉතා පැහැදිලිව ම රාජ්‍ය විරෝධී කුමන්ත්‍රණයකි. ත්‍රස්තවාදයකි. පසුගිය දිනෙක මෙම කුමන්ත්‍රණ අයිස් කන්දේ දියෙන් මතුපිට කොටස ගලගොඩඅත්තේ ඥානසාරගේ කටින් පිට විය. ලක්ෂ 62ක ජනවරමකින් බලයට පත් වූ විධායක ජනාධිපතිවරයාට මාස තුනක් ගත වන්නටත් පෙර ඉල්ලා අස්වන්නැයි ඥානසාර බල කළේ ය. 

යහපාලනය හා දේශපාලනය පටලවා ගත යුතු නැති බව අපි අවධාරණය කරන්නෙමු. කඩාකප්පල්කාරීන්ට, දූෂිතයන්ට හා ත්‍රස්තවාදීන්ට නිදහසේ නටන්නට දීම යහපාලනය නො වන බව අපි ආණ්ඩුවට මතක් කර දෙමු. අඬුව තියෙද්දී අත පුච්චා ගන්නේ කුමට ද? 

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.