රැාජපක්ෂ ආණ්ඩුව නිර්මානය කළ ව‍රාය නගර අවුලෙන් ගොඩ එන්නට මුල සිට සිතා බැලිය යුතු ය

කොළඹ වරාය නගරය පිළිබඳ ලියැවී තිබෙන මේ සමග සම්බන්ධ කර තිබෙන වාර්තාව හා අපට ලැබී තිබෙන තොරතුරුත් අනුව වරාය නගර ව්‍යාපෘතිය ක්‍රියාත්මක කර තිබෙන්නේ පුද්ගලයන් කීපදෙනෙකුගේ උවමනාවට ය. රටට, ජනතාවට, පරිසරයට පමණක් නොව ස්වෛරීත්වයට බලපාන කාරණා රැසක් ද සැලකිල්ලට ගෙන නැත. 

වරාය නගර ව්‍යාපෘතිය සම්බන්ධයෙන් මතු වන මූලික ගැටලුවක් වන්නේ නිසි පාරිසරික ඇගැයුම් වාර්තාවක් ලබාගෙන නැති වීමයි. 

මෙම ව්‍යාපෘතිය සම්බන්ධ පාරිසරික ඇගැයීමක් සපයන එක ම නිල ලේඛනය ලෙස සැලකෙන මොරටුව විශ්වවිද්‍යාලය විසින් සපයා තිබෙන වාර්තාවෙන් පවා විශ්ලේෂණය කර තිබෙන්නේ කොළඹ නගරය ආසන්නයේ මුහුදේ ගොඩකිරීමක් සිදු වුවහොත් එහි ප්‍රතිඵල පමණක් බව වාර්තා වේ. වරාය නගරයක් ඉදි කිරීමේදී ඇති වන පාරිසරික බලපෑම පිළිබඳ එහිදී ඇගැයීමක් කර නැත. 

ගිවිසගෙන තිබෙන ආකාරයට මෙම නගරයේ ඉඩම් චීනයට භාර දුන්නා නම් ඇති වන නීතිමය ගැටලු පිළිබඳ අධ්‍යයනය කර නැත. අපේ රටේ ඉඩම් වෙනත් රටකට සින්නක්කර අයිතිය සහිතව ලියා දීම රටේ ස්වෛරීත්වය පාවා දීමකි. රාජපක්ෂ අනුගාමිකයන්ගේ වචනවලින් කියනවා නම් 'මව්බිම පිටදේසක්කාරයන්ට පාවා දීමකි'.

එ‍සේම, මෙම අලුත් නගරය පාලනය වන්නේ කොළඹ මහ නගර සභාවෙන් ද, නැතිනම් අන් කුමකින් ද යන්න පවා ගැටලු ය. එතැනට බලශක්තිය හා ජලය සපයා ගන්නේ කෙසේ ද? මෙම කරුණු පිළිබඳ නිල ලේඛන නොමැති බව මෙම ලේඛකයා පවසයි. 

මෙවැනි ගැටලු පිළිබඳ නිශ්චිත තීරණයකින් තොරව වරාය නගරය ඉදි කිරීම නැවත ආරම්භ කළ නො හැකි තත්වයක් මතු වී තිබේ. එසේ කරන්නට ඉඩ දිය යුතු ද නැත. 

මෙය චීනයත් සමග රාජ්‍ය තාන්ත්‍රික ප්‍රශ්නයක් බවට පත් වේ නම් එයට වගකිව යුත්තේ මහින්ද රාජපක්ෂ ආණ්ඩුවයි. එම තත්වය වළක්වා ගැනීමට වත්මන් ආණ්ඩුව කටයුතු කළ යුතු ය. 

මේ අතර විශේෂ නිවේදනයක් නිකුත් කරමින් ෆ්‍රයිඩේ ෆෝරම් නම් විද්වත් සංසදය විසින් ද පෝට් සිටි ව්‍යාපෘතිය සම්බන්ධයෙන් ආණ්ඩුව හා අදාළ චීන සමාගම අතර එළැඹ තිබෙන ගිවිසුම් හා එයට පසුබිම් වූ ඇගයීම්, නියාමන නිගමන ආදී ලේඛන මහජනතාවට පරීක්ෂා කළ හැකි පරිදි හෙළිදරව් කරන ලෙස රජයෙන් ඉල්ලා සිටියි. 

කෙසේ වෙතත්, මෙම ඉඩම් ගොඩකිරීම ගැන නැවත මුල සිට ම සිතා බැලිය යුතුව තිබේ.



මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.