මැතිවරණ ක්‍රමය වෙනස් කරන 20වන ආණ්ඩුක්‍රම ව්‍යවස්ථා සංශෝධනයත් වහා ගෙනෙනු!

මහින්දගේ කරේ එල්ලී මනාප ක්‍රමයෙන් ගොඩ යන්නට බලා සිටින සත්ගුණවත් හිටපු ඇමතිවරයෙක්  

පාර්ලිමේන්තුවට ඉදිරිපත් කර තිබෙන 19වන ආණ්ඩුක්‍රම ව්‍යවස්ථා සංශෝධනය සම්මත කරගෙන පාර්ලිමේන්තුව විසුරුවා හැරීමට ආණ්ඩුව සැලසුම් කර තිබේ.

මෙම ආණ්ඩුක්‍රම ව්‍යවස්ථා සංශෝධනය තුළින් මැතිවරණ ක්‍රමයේ වෙනසක් සිදු වන්නේ නැත. එහි ප්‍රතිඵලයක් ලෙස මීළඟ මහ මැතිවරණය පැවැත්වෙන්නේ ද මතභේදාත්මක සමානුපාතික නියෝජනය හා මනාප ක්‍රමය යටතේ ය.

මැතිවරණ ක්‍රමය සම්බන්ධයෙන් සමානුපාතික හා කේවල ක්‍රමවල සම්මිශ්‍රණයක් පිළිබඳ පැවති සංවාදය මෙවර ද මගහැර යනු දැකිය හැකි ය.

ලංකාවේ දේශපාලන ක්‍රමය දූෂණයට ලක් වන්නට විධායක ජනාධිපතිවරයා සතු අසීමිත බලතල පමණක් නොව, සමානුපාතික නියෝජන ක්‍රමය හා මනාප ක්‍රමය බලපෑවේ ය.

නිදසුනක් සලකා බලමු. මහරාජා ආයතනය දේශපාලන පක්ෂ සමග ප්‍රචාරය වෙනුවෙන් දමා ගත් ඩීල්වලට අනුව එක්සත් ජාතික පක්ෂයෙන් නුවරඑළිය දිස්ත්‍රික්කය සඳහා 2010 මහ මැතිවරණයේදී තරග කළ ජේ. ශ්‍රී රංගා මන්ත්‍රීවරයා මැතිවරණයට පසු වහා ම මහින්ද රාජපක්ෂ ජනාධිපතිවරයා සමග එක් වූයේ ය. ඔහු ඊට පෙරත් සිටියේ මහින්ද සමග ය. මේ ශ්‍රී රංගා 2007දී විමල් වික්‍රමසිංහ නමැත්තකුගෙන් පුරවැසි පෙරමුණ නම් පක්ෂය ලබාගෙන තිබේ. manthri.lk වෙබ් අඩවිය ඔහුගේ මැදිහත්වීම ගැන කළ නිරීක්ෂණ අනුව ඔහු කිසිදු ක්ෂේත්‍රයක කැපී පෙනෙන මැදිහත්වීමක් කර නැත. මහජන මුදලින් වරප්‍රසාද ලබමින්, මහරාජා ආයතනයට සේවය කරමින්, රැඩිකල් මුහුණුවරක් පෙන්වමින් සිට, රාත්‍රියට අරලියගහමන්දිරයට රිංගන, නුවරඑළියේ දිළිඳු ජනයාගේ දේශපාලන නියෝජිතයකු ලෙස කළ කිසිදු වැදගත් වැඩක් නැති මෙවැනි ඩීල්කරුවන් පාර්ලිමේන්තුවට තේරී පත් වුණේ සමානුපාතික නියෝජනය නිසා ය.

එපමණක් නොව, අර්ජුන රණතුංග වැනි දේශපාලකයන් කලුතර දිස්ත්‍රික්කයෙන් තේරී පත් වී, තමන්ට ඡන්දය දුන් ජනතාව සම්පූර්ණයෙන් ම නො තකා හැර ගම්පහට සේන්දු වූ ආකාරය අතිශය නින්දිත ය. මෙවැනි ක්‍රියා සමානුපාතික නියෝජනයේ ගැටලු ය.

මැතිවරණ ක්‍රමයේ වෙනස්කමක් සිදු ක‍ළහොත් නන්නත්තාර වන තවත් දේශපාලනඥයකු වන්නේ මහින්ද රාජපක්ෂයි. ඔහු වටා එක් රැස් වී සිටින චෞරයන් පිරිසට කිසියම් ආසනයකින් තේරී පත් වීම පහසු නැත. දැනටත් නිල ශ්‍රීලනිපයේ අපේක්ෂකත්වය ලැබෙයි ද නො ලැබෙයි ද යන්න විශ්වාස නැති දූෂිතයන් රැසක් බලා සිටින්නේ මහින්දගේ කරේ එල්ලී, හොරකම් කළ සල්ලි විසි කර, සමානුපාතික ක්‍රමයෙන් පාර්ලිමේන්තුවට ගොඩ යන්නට ය.

සමානුපාතික නියෝජනය හා මනාප ක්‍රමය මත පදනම් වූ වත්මන් මැතිවරණ ක්‍රමය යටතේ තවත් මහ මැතිවරණයක් පැවැත්වීමට ඉඩ නො දිය යුතු ය. යෝජිත 19වන ආණ්ඩුක්‍රම ව්‍යවස්ථා සංශෝධනය සම්මත කරගෙන 20වන ආණ්ඩුක්‍රම ව්‍යවස්ථා සංශෝධනය ලෙස මැතිවරණ ක්‍රමය වෙනස් කිරීම ද සිදු කරන තෙක් පාර්ලිමේන්තුව විසුරුවන්නට ඉඩ නො දිය යුතු ය.

එහෙත්, මැතිවරණ ක්‍රමය වෙනස් නො කරන නිසා 19වන ආණ්ඩුක්‍රම ව්‍යවස්ථා සංශෝධනයට විරුද්ධ විය යුතු නැත. එය සම්මත කර ගැනීම කාගේත් වගකීමකි.

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.