2014-07-08

ආශ්චර්යය ළං වන විට අන්තර්ජාලයේ බිඳ වැටුම ද වැඩි වේ

ටෙලිකොම් බ්‍රෝඩ්බෑන්ඩ් අන්තර්ජාල සම්බන්ධය නැවත ලෙඩ වී තිබේ. මීට වසර පහකට පමණ පෙර ඒඩීඑස්සෙල් සම්බන්ධතාවක් ගැනීමේදී වේගය අඩු වුණොත් වගකියන්නේ නැති බවට ලියුමක් දෙන්නැයි ටෙලිකොම් සමාගම කීවේ ය.

ලංකාව ආශ්චර්යය කරා ළං වන තරමට අපට අන්තර්ජාල සම්බන්ධතාව නැති කාලය ද වැඩි වේ. එය බිඳවැටුණු පසු නැවත යථා තත්වයට පත් කරන දිනයක් වෙලාවක් ගැන කවුරුවත් දන්නේ නැත.

පසුගිය කාලයේ මම එටිසලාට් අන්තර්ජාල සබඳතාවක් ද ලබා ගතිමි. එය නිවෙන, පත්තුවෙන 3 ජී සම්බන්ධතාවකි.

මම හිරු කණ්ඩායමෙන් බිඳී, අන්තර්ජාලය ගැන උගනිමින් 2005දී ලංකා පොලිටි වෙබ් අඩවිය ආරම්භ කළේ ලංකා බෙල් ඩයලප් සම්බන්ධතාවකිනි. ඒ කාලයේ දුරකථන බිල රු. 4000ක් පමණ විය. ටෙලිකොම් ඒඩීඑස්සෙල් ගැන විශ්වාසයක් නැති නිසා මම දැන් මයික්‍රො ඩේටා සිම් එකක් හා ඩෙංගලයක් යන දෙකක් ම ගන්නට සැලසුම් කරමි. දැන් නැවතත් අර වියදම ම යනවා ය. 

ඊයේ මම කෙටි සටහනක් තැබුවේ කැෆේ එකකින් ය. එහි වැඩ කළ ගැහැනු ළමයා සිංහල යුනිකෝඩ් ගැන අසා නො තිබිණි. යන්තම් ඇඩ්මින් ලොග් වී සිංහල සෙටප් කර ගන්නට හදන විට සියබස් වෙබ් අඩවියේ වින්ඩෝස් සෙවන්ට අදාළ සබැඳියාව වැඩ කළේ නැත. 

ගමක ජීවත් වෙන මගේ අත්දැකීම අනුව නම්, සිදු වෙමින් තිබෙනවා ය කියන මහ ලොකු සන්නිවේදන විප්ලවය ගමට නම් දැනෙන්නේ නැත. අදට වැඩිය හෙට හොඳයි කියන එක ගැනවත් විශ්වාස කරන්නට බැරි ය. ඇත්තම කීවොත් අදට වඩා ඊයේ හොඳට තිබිණි.

ඊයේ මගේ නගරයේ සුපිරි වෙළඳසලක් විවෘත විය. පළමු දිනයේ ම එය සෙනගින් පිරී ඉතිරී යනු දුටිමි. මා සමග කතා කළ වැඩි දෙනෙක් කීවේ ලොකු සමාගමක සුපිරි වෙඝඳසල් ජාලයක කඩයක් මෙහි වීවෘත වෙනවාට ඔවුන් කැමති වන්නේ එයින් පාරිභෝගික සත්කාරය ගැන තඹයකට මායිම් නො කරන මේ නගරයේ පඩත්තර වෙළඳුන්ගේ හුළං බහින නිසා ය.

ඒක ඇත්ත ය. අලුත් අන්තර්ජාල සබඳතාවක් ගැනීම සඳහා මම මගේ නගරයේ මොබිටෙල් නියෝජිතායතනය වෙත ගියෙමි. එතැන සිට ඉලන්දාරියාටත්, ගැහැනු ළමයාටත් පාරිභෝගිකයන් මහා වධයක් වැනි ය. පැමිණෙන පාරිභෝගිකයකුට හිඳ ගන්නට පුටුවක් තබන ශිෂ්ටත්වයවත් මේ කඩයේ නොතිබිණි.

මිනිස්සු වඩා හොඳ ජීවිතයක් සොයමින් සිටිති. එහෙත්, ශිෂ්ටත්වය නො දත් පාලකයන් පිරිසක් සිටින රටක අපට එවැනි ජීවිතයක් ගැන බලාපොරොත්තු තැබිය හැකි ද?

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු. Read in English blog.parakum.com