2010-06-05

සංවර්ධන උන්මාදය ගාලු මුවදොර බිලි ගනියි ද? | Will the development craze destroy Colombo Galle Face

(2010 ජුනි 05, W3Lankaකොළඹ නගරයේ තද බද වී ජීවත් වන වැසියන් නිදහසේ හුස්ම ටිකක් ගන්නට යන ගාලු මුවදොර පිටිය අසබඩ සොබා දහම දුන් සොඳුරු දායාදයක් වන වෙරළ කිලෝ මීටර කීපයක් දුරට ගොඩ කර කොළඹ නගරය පුළුල් කිරීමේ යෝජනාවක් එක්සත් ජාතික පක්ෂය 'යළි පුබුදමු ශ්‍රී ලංකා' සැලසුම පෙරට ගනිමින් සිටි සමයේ ඉදිරිපත් වී තිබිණි.


දැන් එය නැවතත් ආණ්ඩුවේ කතා බහට ලක් වෙමින් ඇති බව දැන ගන්නට තිබේ.


අද දිනමිණ පුවත්පතේ සම්මුඛ සාකච්ඡාවකදී ඉඩම් හා ඉඩම් සංවර්ධන ඇමැති ජනක බණ්ඩාර තෙන්නකෝන් මේ බව ප්‍රසිද්ධියේ පවසන්නේ මෙසේ ය.


"ඉදිරියේ දී ගාලු මුවදොර කි. මි. 3 – 4 ප්‍රමාණයක් මුහුද ගොඩකර අතිරේක ඉඩම් ප්‍රමාණයක් ඇති කොට ආර්ථික සංවර්ධන කටයුතු සඳහා එම භූමිය යොදා ගැනීම කෙරෙහිත් රජයේ අවධානය යොමුවී තිබෙනවා."


ඔහු එසේ පවසන අද දිනය ලෝක පරිසර දිනය වීම අහම්බයක් ද? නැතිනම් සොබා දහමට අපි කරන්නේ මේ යයි කියන සංකේතාත්මක ප්‍රකාශක් ද?


හද්දා පිටිසර ගමකින් කොළඹ පැමිණ, එක්ස් කණ්ඩායමෙන් කරළියට පැමිණ, තමන් නො යන ගම රූපවාහිනියෙන් විකුණමින්, කැහැලා, කැහැලා අමාරුවෙන් ජන සභා හා ආර්ථික සංවර්ධන අධිකාරියේ අධ්‍යක්ෂ ජෙනරාල් නම් තනතුර ලබා ගත් 'දුක දිනා ජය ගත් හපනෙකු' වන කොළඹ විශ්ව විද්‍යාලයේ ජ්‍යෙෂ්ඨ කථිකාචාර්ය ධම්ම දිසානායක මැයි 30 සිළුමිණ පුවත්පතට පවසා තිබුණේ මේ මේ සංවර්ධන ‘උන්මාදයට’ කාලය බවයි.


ඇත්තෙන් ම මේ නම් උන්මාදයකි. මක් නිසා ද යත්, මේ සංවර්ධනය රට හෝ එහි ජීවත් වන සාමාන්‍ය මිනිසුන් වෙනුවෙන් නො වන බැවිනි. රටට හා ජනතාවට හිමි සංවර්ධනයේ පහළට කාන්දු වන මුත්‍රා හා අසූචි ය. 


ඊයේ දිනමිණේ තිබුණ පුවතක් අනුව දෙහිවල සතුන් වත්ත 'මහජනයාගේ පහසුව' පිණිස රාත්‍රී 8.30 දක්වා විවෘතව තැබේ. සතුන්ගේ අපහසුව ගැන කතා කරන්නට කවුරුවත් නැත. එසේ කතා කිරීම තහනම් විෂයකි.


යාලේ, විල්පත්තුවේ වන සතුන් ඉන්නේ සෆාරි සංචාරක ව්‍යාපාර වෙනුවෙන් අලෙවි වන්නටයි.  


මුහුදු වෙරළ තිබෙන්නේ සුද්දන්ට සුද්දියන්ට අව්ව තපින්නට හා ඒවා බල බලා කොල්ලන්ට ස්වයං වින්දනයේ යෙදෙන්නටයි. 


පරිණාමයේ මුල් අවධියේ සිට සීගිරියේ සිටි බඹරුන් පළවා හරින ලදී. මල් පරාගනය කිරීමේ වගකීම දුමින්ද සිල්වා වැනි මන්ත්‍රීන්ට පවරා තිබෙනවාදැයි අපි නො දනිමු. 


සීගිරි ගල මුදුනේ වැසිකිලි හැදිය යුතු ය. මන්ද, එය බලන්නට එන සුද්දන්ට දියවැඩියාව තිබෙන බැවිනි. සුද්දන් සීගිරිය බලන්න නො ආවොත් එය කළු ගල්වලට විකුණන්නට ඉඩ තිබේ. (නන්දක්කේ, සුනිල් සර්,  ඔබ කොහිද? ඔබත් මේ රෙද්ද පල්ලේ ද?)


ලෝක විනාශය හෙවත් කල්පාන්තය උදා වූ විට කල්පාන්ත මේඝයෙන් වසින මහ වැස්සෙන් තෙමෙන මිනිසුන්ට වැළ‍ඳෙන බව කියන පිස්සුව ද මේ 'සංවර්ධන උන්මාදය' වැනි එකක් යයි අනුමාන කිරීම වැරදිද? 


මහින්ද නැත. පර්සි ඇත. බැසිල් ඊටත් උඩින් ඇත.