අපි මුස්ලිමුන්ට ගහන්නේ ඇයි?

ධර්ගා නගරය හා අලුත්ගම කේන්ද්‍ර කරගෙන ඇති වූ වාර්ගික ප්‍රචණ්ඩත්වය සම්බන්ධයෙන් ජනාධිපතිවරයාගේ ස්ථාවරය දැන් දැන් පැහැදිලි වෙමින් තිබේ. එය අසූ තුනේ ජුලි කෝලාහලයේදී ජේ.ආර්. ගත් ස්ථාවරයටත් එහා ගිය එකක් බව පෙනේ. ඇත්තෙන්ම එය බලා‍පොරොත්තු විය යුතු තත්වයකි. 

හාමුදුරු කෙනෙක් හා මුස්ලිම් මදාවීන් කිහිප දෙනෙක් සම්බන්ධ සුළු සිද්ධියක් සම්බන්ධයෙන් පොලිසිය අදාළ ක්‍රියාමාර්ග අරගත් පසුව පවා එය පදනම් කරගෙන ප්‍රදේශයේ ශාසනාරක්ෂක බලමණ්ඩලය හා බොදු බල සේනාව විසින් අවුළුවන ලද ජාතිවාදී ගින්න විසින් මිනිසුන් සිව්දෙනෙකුගේ ජීවිත බිලි ගන්නා ලදී. නිවාස 150ක් පමණ ද කඩ 90ක් පමණ ද විනාශ කර දමන ලදී. පහර දෙන ලද පල්ලි සංඛ්‍යාව 15කට වැඩි ය. අවතැන් වූ සංඛ්‍යාව 2000කට වැඩි ය. 

ඉහත දක්වන ලද සංඛ්‍යාවලින් හතරෙන් තුනකටත් වඩා මුස්ලිම්වරුන්ට සිදු වූ හානි ය.

මෙම ගින්න අවුළුවනු ලැබුවේත්, ඇඳිරි නීති උල්ලංඝනය කරමින් විනාශකාරී ක්‍රියාවල යෙදුණේත් සිංහල ජාතිවාදියෝ ය. මුස්ලිමුන් ප්‍රචණ්ඩ ක්‍රියාවල යෙදුණ ප්‍රමාණය සිංහලයන්ගේ ප්‍රචණ්ඩ ක්‍රියා සමග සන්සන්දනය කරන්නට බැරි ය. මුස්ලිමුන් පිට ප්‍රදේශවලට කඩා වැදී පහර දුන් බවට සාක්කි නැත. ඔවුන්ගේ ප්‍රචණ්ඩත්වය බොහෝ දුරට ප්‍රතිචාරාත්මක ඒවා පමණි.

එහෙත්, දැන් ලංකාවේ ආණ්ඩුව හා ජනමාධ්‍ය කතා කරන්නේ දෙපැත්තෙන් ම සිදු වූ ප්‍රචණ්ඩ ක්‍රියා පිළිබඳව ය. දෙපැත්තේ ම තිබෙන අන්තවාදයන් පිළිබඳව ය. මේ දෙපැත්තක් ගැන කතා කරන්නේ ඇත්තෙන් ම තමන්ගේ පැත්තේ තිබෙන කුණු වසා ගන්නට මිස අන් කිසිවකටවත් නො වේ. 

ආණ්ඩුව මෙම ගින්න ඇවිලූ හා ප්‍රචණ්ඩ ක්‍රියාවල නියැලුණු සිංහල බෞද්ධ ත්‍රස්තවාදීන්ට එරෙහිව ක්‍රියාත්මක නො වන බව පැහැදිලි ය. පොලිසිය ඉහළින් අණ එන තෙක් බලා සිටිනු මුලදී දක්නට ලැබුණත්, දැන් නම් පෙනෙන විදියට ඉහළින් අණ ලැබී ඇත්තේ වැරදිකරුවන් ආරක්ෂා කරමින් වින්දිතයන් සිර කරන්නට ය. 

ආණ්ඩුවේ ප්‍රතිචාරය හෙළිදරව් වීමත් සමග කෝලාහලයෙන් පසු දින කීපයක් හැංගී සිටි ඥානසාර එළියට පැමිණ ප්‍රසිද්ධියේ උත්තර බඳින්නට ඉදිරිපත් වූයේ ය. මුලින් ජාතිවාදී ප්‍රහාර හෙළා දුටු චම්පික රණවක දැන් ප්‍රසිද්ධියේ ම ප්‍රහාරකයන් ආරක්ෂා කරයි. මුස්ලිමුන්ට පහර දුන්නේ තමන් යයි කියා ගන්නට තරගයක් ඇති බවක් ද පෙනේ.

මේ අතර, සිද්ධි අවසන් වී නැති බවක් ද පෙනේ. පානදුර නෝලිමිට් සාප්පුව ගිනි ගැනීම ගැන පරීක්ෂණ තවම අවසන් නැත. 

පසුගිය සිකුරාදා පල්ලියේ යාඥාවන්ගෙන් පසු කලබලකාරී තත්වයක් ඇති වනු ඇතැයි රජයේ මාධ්‍ය පවා අනාවැකි කීවේ ය. එහෙත්, මුස්ලිම් නායකයෝ සිය ජනතාව සන්සුන් කිරීමට දැරූ පරිශ්‍රමයේ ප්‍රතිඵලයක් ලෙස කිසිදු කලබලයක් ඇති වූයේ නැත. 

මුස්ලිම්වරුන්ට පහර දීම ගැන කතා කළ චම්පික රණවක එය සාධාරණීකරණය කිරීමට මතු කළ එක් තර්කයක් වන්නේ ධර්ගා නගරයේ මුස්ලිම් ජනයා මෝටර් සයිකල්වල හෙල්මට් නොදා යන බවයි.

‍මේ වනාහි ධර්ගා නගරය අවට ගමේ ගොඩේ කොල්ලන්ගේ බල්ලන්ගේ කතා ය. කිසිවෙක් හෙල්මට් නො දා මෝටර් සයිකල් පදිනවා නම්, ඒ පිළිබඳව ක්‍රියා කිරීම ‍ට්‍රැෆික් පොලිසියේ වැඩක් මිස ඇමතිවරුන් ඒවාට අත නො දැමිය යුතු ය. 

ගණන්කාරයන් සිටින ලංකාවේ එකම ගම කාදියවත්ත නො වේ. ඔය පැත්තේ කළුවාමෝදර වැනි බොහෝ සිංහල ගම් ද චන්ඩින්ට ප්‍රසිද්ධ ය. ගාලු පාරේ යන ගමන් බලන්න. කළුවාමෝදර සිටි චන්ඩියකු වූ කෑෂ් උපාලිගේ පිළිමයක් කළුවාමෝදර පාලම ළඟ තිබේ. හරියට බංඩාරනායක වගේ ය. කවුරුවත් ඒවා ප්‍රශ්න කරන්නේ නැත. එහෙත් කාදියවත්තේ චන්ඩි මුස්ලිම් ජාතිකයෝ ය. ඒ නිසා ආණ්ඩුවේ ඇමතිවරුත් කාදියවත්තට එරෙහිව අවි අමෝරති.

ඇත්ත කතා කරමු. මුස්ලිම් ජාතිකයෝ ලංකාවේ සෙසු මිනිසුන්ට වඩා අමුතු නරකකුත් නැත. අමුතු හොඳකුත් නැත. මිනිසුන්ගේ හොඳ නරක ජාතිවාදී මිම්මකින් මනින්නට යාම මුග්ධකමකි. 

ලංකාවේ මුස්ලිම් සංවිධාන හා පකිස්තානයේ හෝ ඇෆ්ගනිස්තානයේ ජිහාඩ් කල්ලි අතර සම්බන්ධකම් නැති බව පවසන්නේ මා නොව යුද හමුදා ප්‍රකාශක රුවන් වනිගසූරියයි. 

ලංකාවේ මුස්ලිම් මිනිස්සු ඉතිහාසයක් පුරා සාමකාමී ලෙස ජීවත් වූ හ. ඔවුහු සන්නද්ධ වී කැරැලි ගසා නැත. බෝම්බ පුපුරුවා නැත. සිංහල හෝ දෙමළ ගම්වලට පැන කපා කොටා මිනිසුන් මරා නැත. යුද්ධයේදීත් ඔවුන් සිටියේ හමුදාව පැත්තේ මිස කොටින්ගේ පැත්තේ නො වේ. 

ඔවුහු දුර්වල සුළු ජාතියකි. අධ්‍යාපනය, සෞඛ්‍යය වැනි සමාජ සංවර්ධන කාරණා පැත්තෙන් ඔවුන් සිටින්නේ සෙසු ජාතීන්ට වඩා පසුපසිනි. එහෙත්, ඔවුහු වෙළඳාමෙහි දක්ෂ ය. ඔවුන් අප‍ගේ ඊර්ෂ්‍යාවට ලක් වන්නේ ඒ නිසා ය. 

අපි දැන් ඔවුන්ගේ වෙළඳ ව්‍යාපාර ඉලක්ක කරගෙන පහර දෙන්නෙමු. එමගින් ඔවුන් බිත්තිය අද්දරට තල්ලු කිරීමට සිංහලයින්ට හැකි වනු ඇත. එහෙත්, එයින් අපට ‍කිසියම් සාධනීය ප්‍රතිඵලයක් නම් අත් වන්නේ නැත.

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු. Read in English blog.parakum.com