වෙබ් අඩවිකාරයිනි, දෑත් ඔසවා යටත් වී රෙජිස්ටර් වෙනු!

ශ්‍රී ලංකාවේ හෝ ඉන් පිටත සිට ප්‍රවෘත්ති පළකරන වෙබ් අඩවි ජනමාධ්‍යයේ 'පිළිගත් සදාචාරාත්මක ප්‍රමිතීන්ට සහ මෙරට පවතින නිතීයට' අනුකූලව පවත්වාගෙන යන ලෙස ජනමාධ්‍ය හා ප්‍රවෘත්ති අමාත්‍යාංශය ඉල්ලා සිටී.


සියලුම වෙබ් අඩවි හැකි ඉක්මනින් ජනමාධ්‍ය හා ප්‍රවෘත්ති අමාත්‍යාංශයේ ලියාපදිංචි කරගැනීමට ක්‍රියාකරන ලෙසද අමාත්‍යාංශය නිවේදනයක් නිකුත් කරමින ඉල්ලා සිටී.


ලියාපදිංචි නොවුණොත් වන දෙය කියා නැත.


ලියාපදිංචි වන්නට පුළුවන. ඒත්, අර මෙරට පවතින නීතිය අනුව වෙබ් සයිට් කොරන හැටි නම් අපට නො තේරේ. කොටින් ම කියනවා නම් මෙරට පවතින නීතිය මොකක්ද කියා මෙම ලේඛකයාට තේරෙන්නේ නැත. නූගත්කම නිසා ය. 


පිටරට සිට ලංකාව ගැන ලියන එවුන්ට ද මේ අනුව පරිස්සම් වන්නට සිදු විය හැකි ය. සමහර විට ආණ්ඩුව අන්තර්ජාලය හරහා ඒ රටවල්වලට ඇතුල් වී එම වෙබ් අඩවිවල කර්තෘන් අන්තර්ජාලය හරහා කණෙන් ඇදගෙන මෙහි ගෙන එනු ඇත.


කොහොමද ලංකා ඊ නිව්ස් කර්තෘ සඳරුවන් සේනාධීරව අන්තර්ජාලය හරහා කණෙන් ඇදගෙන ලංකාවට ගෙන ඇවිත් ආරක්ෂක අමාත්‍යංශයේ කොම්පියුටරයකින් එළියට ඇදලා අර ගන්න ලස්සන? සඳරුවන් දැන් ටිකක් ඩයට් කරනවා නම් හොඳයි නැතිනම් අන්තර්ජාලය හරහා ඇදන් එන විට මග හිර වෙන්නට පුළුවන. 


අන්තර්ජාලය තුළ දේශ සීමා ලකුණු කරන ක්‍රමවේදයක් ද ආණ්ඩුව සකස් කරමින් සිටිනවා විය හැකි ය. ලංකාවේ ජනමාධ්‍ය හා ප්‍රවෘත්ති අමාත්‍යාංශයේ සිටින වැඩකාරයන්ට ඕවා ටොයිස් වැඩ ය. උදාහරණයක් ලෙස දැන් ලංකාවේ කිසි කෙනෙකුට වැල සයිට් එකක් බලන්න පුළුවන් ද කියා සිතා බලන්න. ඒ ඔක්කොම ආණ්ඩුවෙන් බොලොක් කරලා ය. වැල සයිට් නො බලන නිසා ලංකාවේ මිනිස්සු බෝ පැළ වෙලා ය. සිරිදූවේ පිටිධම්ම සෝවාන් ද ඊට එහා ඒවා ද වෙලා ය. 


වෙබ් අඩවි ලියාපදිංචි කිරීම සඳහා +94112513943 දුරකථන අංකය ඔස්සේ අමාත්‍යාංශයේ අතිරේක ලේකම් ( සංවර්ධන සහ සැලසුම්) කේ. ඩබ්ලිව්.ටී. එන් අමරතුංග මහත්මිය ඇමතීමෙන් හෝ ෆැක්ස් අංක +94112512343, ඊමේල් amaratungamedia@yahoo.com සහ secretary@media.gov.lk www.media.gov.lk වෙබ් අඩවිය මඟින් ලබාගත හැකිය.


ඒ කියපු වෙබ් අඩවියේ දැනට එහෙම එකක් නැති වුණාට පස්සේ තියෙනවා ඇත. ඒ නිසා ඉවසන්න. ඉවසන දනා රුපු යුදයට නැති කඩුව කොස් කෙටන්නද කියා විශ්ව ගම්මාන සංකල්පය ඉදිරිපත් කළ අයකු ලෙස සැලකෙන මාෂල් මැක්ලුහන් සිය The Gutenberg Galaxy: The Making of Typographic Man (1962) සහ Understanding Media (1964) යන පොත්වල කියා ඇත.


අපි නම් ඇනොනිමස් ආතල් ගන්නේ නැත. අපි ලියන්නේ ප්‍රසිද්ධියේ බැවින් හා කසාදෙන් පසු වෙන මොකවත් ආණ්ඩුවේ රෙජිස්ටර් කොර ගන්න බැරි වුණ නිසා රෙජිස්ටර් වන්නෙමු.


අපි ආණ්ඩුවට බය ය. අත් දෙක ඔලුවට උඩින් ඉහළට උස්සා ගත් නිසා වෙන මොකවත් ලියන්න බැරි ය.


අපි මොකුත් නො හිතා හිටිමු. අරගොල්ලන්ට අපි හිතන බව ආරංචි වුණොත්......................


මේ පසුගිය දිනවල W3Lanka කර්තෘට ලැබුණු චරිත සහතිකයකි. 

උඹ නිකං නිස්ට්‍රඩාමුස් වගේනේ...මරු අනාවැකි කියන්නේ. ඔන්න උඹ එදා කිව්ව එක අද වුනා. සියළුම වෙබ් අඩවි ලංකාවෙත් ලියාපදිංචි කරන්නලු. By Anonymous on අරාබියේ මෙන් ලංකාවේත් බ්ලොග් ආණ්ඩුවේ ලියාපදිංචි කර... on 11/5/11

W3Lanka කර්තෘ මේ ලිපිය ලිව්වෙ අවුරුද්දකට කලින්. නැති බැරි මේ කාලේ බ්ලොග් ලිවිල්ල අතහැර, සාත්තර කියන බිස්නස් එකක්වත් පටන් ගත්තොත් නරකද කියලා W3Lanka කර්තෘට හිතෙනවා ය.  

මේ ලිපියට ඔබ කැමති නම් වෙන අයත් එක්කත් බෙදා ගන්න