මෙය පළිගැනීමක් නොව පිළිගැනීමකි

පසුගිය රජය කාලේ සිදු කළ වංචා, දූෂණ සම්බන්ධයෙන් විමර්ශන ඇරඹුණා පමණි. පළි ගන්නවා, පළි ගන්නවා යයි මහින්ද රාජපක්ෂ පවා ලතෝනි ගසයි. පසුගිය කාලයේ ඔහුගේ ගෝලයන් අභියෝග කළේ පුළුවන් නම් අල්ලපියව් කියමිනි.  

බැසිල් දිවි නැගුම අරමුදලේ සල්ලි මහින්දට ඡන්දය දිනීම සඳහා අපහරණය කළ ආකාරයආකාරය හරි යයි දැන් මහින්ද තර්ක කරයි. 

ජොන්ස්ටන් සිය බලය අයුතු ලෙස යොදා ගනිමින් සතොසෙන් බඩු රැගෙන ගොස් වැඩේ ගස් යන විට සල්ලි ගෙවූ එක සාමාන්‍ය ණයකැයි මහින්ද තර්ක කරයි. 

මහින්දට ඒවා සිවිල් නඩු ය. එහෙත්, මේ වනාහි ජනතා මුදල් අපහරණයන් ය. තව මෙවැනි සිද්ධි ලක්ෂ ගණනක් තිබේ. ගමේ ප්‍රාදේශීය මන්ත්‍රීවරයා දක්වා ම මේවාට සම්බන්ධ ය. 

ජවිපෙ සිටි විප්ලවවාදියකු වන විමල් වීරවංශ පසුගිය සමයේ සිය අමාත්‍යාංශය යටතේ ඇති ආයතනවලින් සිය අන්තේවාසිකයන්ට ගෙවල්, වාහන, ඉන්ධන ආදිය පමණක් නො ව ගෙදර ඉඳන් ගන්නට පිංපඩි පවා බෙදුවේ ය. ඔහුගේ ගෝලයින්ගේ බිරින්දෑවරු ඇතුළු 40කට වැඩි පිරිසක් කිසිදු සේවයක් නො කර ගෙවල්වල සිට රාජ්‍ය ඉංජිනේරු සංස්ථාවෙන් පඩි ගත් හ. දැන් ඉංජිනේරු සංස්ථාව වසා දමන්නට සිදු වෙලා ය. 

මහින්දගේ පසුපස යන එක් මහා විප්ලවවාදියකුගේ කැරැට්ටුව මෙසේ ය. ඔවුන් මහින්ද පසුපස යන රහස ද එය ම ය. එපමණක් නොව, මහින්දගේ රැළිවල පොදි කන්නේ මෝටර් බයිසිකලය දක්වා දේ පොදු මහජන මුදලින් ගසා කෑ අයයි. 

මෙතෙක් ඉතිහාසයේ දේශපාලන බලය යොදාගෙන සොරකම් කිරීම පසුපසින් පැමිණියේ මුක්තියයි. එහෙත්, දැන් තත්වය වෙනස් වී තිබේ. සොරුන් දඬුවම් ලැබිය යුතුවාට අමතරව ඔවුන් පැහැර ගත් මහජන දේපල ආපසු පවරා ගැනීම ද අවශ්‍ය ය. 

එය පළිගැනීමක් නො වේ. මහජන ගරුත්වය, නීතියේ ආධිපත්‍යය හා ජනතා පරමාධිපත්‍යය පිළිගැනීමකි. 

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.