මත්පැන් බොන ජනතාව වෙනුවෙන් ආණ්ඩුවට විරෝධය!

මත්පැන්වලින් අය කරන බදු තවත් ඉහළ නංවා තිබේ. 

මත්පැන්වලින් අය කරන බද්ද දඬුවම් ස්වරූපී එකකි. 

මත්පැන් බොන්නන්ට ආණ්ඩුව දඬුවම් කරයි. 

අධික ලෙස මත්පැන් බී රෝහල්ගත වන පුද්ගලයන්ට ප්‍රතිකාර කිරීම සඳහා මහජන මුදල් වැය වන නිසා මත්පැන්වලින් යම් ප්‍රමාණයක බද්දක් අය කිරීම සාධාරණ ය. එහෙත් දැන් සිදු වන්නේ එය නො වේ.

ආණ්ඩුවේ මැති ඇමතිවරුන් ම බාර් දමාගෙන මත්පැන් විකිණීමේ ජාවාරමේ යෙදෙන ගමන්, සුරා බදු ආණ්ඩුවේ ප්‍රධාන ආදායම් මාර්ගයක් කරගෙන සිටිමින්, බොරු මතට තිතකට මුවා වී ජනතාවගේ සාක්කුව සූරා ගැනීම ආණ්ඩුවේ උපාය මාර්ගය වී තිබේ. 

මත්පැන් බද්ද වැඩි කළ විට කිසිවෙක් කටක් අරින්නේ නැත. ජනමාධ්‍ය, සිවිල් සමාජය මෙන්ම මත්පැන් බොන්නන් ද ඇතුළුව හැමෝම හැසිරෙන්නේ කිසිවක් සිදු නො වූ ගානට ය. ඒ ඇයි?

තමන් උපයන මුදලින්, කිසිවකුට කරදරයක් නො වන පරිදි මත්පැන් ටිකක් බී සතුටු වන්නට යමෙක් කැමති නම් එහි වරද කුමක් ද? එය මේ අන්දමින් බදු පනවා දඬුවම් කරන්නට තරම් වරදක් ද?

මත්පැන් බොන මිනිසුන්ට මානව හිමිකම් නැද්ද? 

බදු වැඩි කළා කියා මිනිසුන් බොන එක අඩු වී නැත. අඩු වී තිබේ නම් මේ රටේ බාර් එකක් හෝ වැසී යා යුතු ය.

මත්පැන් මිළ වැඩි කිරීමෙන් සිදු වන්නේ ජීවන වියදම තවත් ඉහළ යාමයි. එය ආණ්ඩුවේ ජීවන වියදම් දර්ශකයේ ගණනය වන්නේ නැත. සාමාන්‍ය පිරිමින්ගේ සාමාන්‍ය බීමක් වන මත්පැන් සඳහා යන වියදම ඇතුළත් කර නැති ජීවන වියදම් දර්ශකය ප්‍රෝඩාවකි. 

මත්පැන් මිළ වැඩි කළ විට පවුල්වල බිරියන් සතුටු වන්නේ යයි සමාජයේ අදහසක් ඇත. එහෙත්, ඒ උතුම් භාර්යාවන් කී දෙනෙකුගේ සැමියන් මත්පැන් මිළ වැඩි කළ දා සිට බොන එක නවත්වනවා ද?

සීල් අරක්කු බිවු එකා කසිප්පු බී ඉක්මණින් මැරෙන එක නම් වැඩි වේ. 

මෙය ඉතා නරක වැඩකි. ගෙදර මිනිහාගෙන් අරගෙන ගෑනිට දෙනවා වගේ වැඩකි. 

අරක්කු බොන මිනිස්සු ආණ්ඩුවට ඡන්දය දෙන විට මේ ගැන කල්පනා කළ යුතු ය. 

බොන ජනතාව ඡන්දය නො දී සිටියොත් ආණ්ඩුවට වැලේ වැල් නැති වනු ඇත.

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.