සරත් නන්ද සිල්වා ප්‍රජාතන්ත්‍රවාදය සඳහා මහජන ව්‍යාපාරවල හතර මායිමකට වැද්ද නො ගත යුතු ය

මොහුට සමාව නො දෙනු!

ජනාධිපතිවරයාට තුන්වරක් තරග කළ නො හැකි ය යන නීති තර්කය ගෙන ආවේ හිටපු අග විනිසුරු සරත් නන්ද සිල්වා ය. 

ලංකාවේ අධිකරණ ක්‍රියාවලි පිරිහීමට ලක් වන පරිදි ක්‍රියා කළ මූලිකයකු ලෙස සැලකෙන සරත් නන්ද සිල්වාගේ නීති තර්කය පිටුපස මේ රටේ විපක්ෂය වැටී ඇත්තේ බැල්ලිගේ බුරුල්ලේ එල්ලෙන බලු කුක්කන් සේ ය. 

මෙම නීති තර්කය සරත් නන්ද සිල්වාගේ කුශාග්‍ර බුද්ධි මහිමය පළ කරන්නකැයි ඔහු හා අලියාගේ නැට්ටේ එල්ලී හෝ මහින්ද රාජපක්ෂ පරදා දෙව්ලොව යන්නට සිටින විපක්ෂය කල්පනා කරති. 

සරත් නන්ද සිල්වාගේ බුද්ධි මහිමය පසුගිය දිනෙක ඔහු ම ප්‍රකාශ කළේ ය. මහින්ද රාජපක්ෂ අගමැති ධුරය හොබවන සමයේ ලැබුණු සුනාමි සහනාධාර පෞද්ගලික ගිනුමකට බැර කර ගැනීමට එරෙහිව ඔහුට විරුද්ධව නැඟුණු චෝදනා සම්බන්ධයෙන් මහින්ද රාජපක්ෂ ශ්‍රේෂ්ඨාධිකරණයට ගිය අවස්ථාවේ ඔහු එවැනි දැවැන්ත සොරකමක් නො කරනු ඇතැයි යන පූර්ව විනිශ්චය මත පිහිටා තමන් කටයුතු කළ බව එවකට අග විනිසුරු සරත් නන්ද සිල්වා පැවසී ය. 

ඔහුගේ නීතිමය පරිඥානයේ තරම ප්‍රකාශ කරන්නට මේ පූර්ව විනිශ්චය කතාවට වඩා තවෙකක් කුමට ද?

ඔහුට පිළිතුරු දෙමින් ජනාධිපති නීතිඥ අලි සබ්රි කොළඹ පැවති සම්මන්ත්‍රණයකදී පසුගියදා කළ ප්‍රකාශය ඉතා වැදගත් ය. ඔහු කරුණු හතරක් පෙන්වා දුන්නේ ය.

1. දහඅටවන ආණ්ඩු ක්‍රම ව්‍යවස්ථා සංශෝධනය ගෙන ආවේ වත්මන් ජනාධිපතිවරයා ඇතුළු සියලු ජනාධිපතිවරුන්ට දෙවතාවකට වඩා තරග කිරීමට තිබුණු බාධාව ඉවත් කිරීමට බව ඔහු පෙන්වා දුන්නේ ය. ව්‍යවස්ථාදායකය විවාද කළේ ඒ පිළිබඳව බව ඔහු පවසයි.

2. ජනාධිපතිවරයා දෙවරක් දිවුරුම් දෙන විට මෙම නීති සංශෝධනය කර තිබුණු නිසා එය ඔහුට අදාළ බව ඔහු පෙන්වා දුන්නේ ය. 

3. අර්ථ නිරූපණ ආඥා පනතේ 6 (3) වගන්තිය අදාළ වන්නේ ලිඛිත නීතිවලට බවත්, ආණ්ඩු ක්‍රම ව්‍යවස්ථාව ප්‍රඥප්තියක් බැවින් එය අදාළ නො වන බවත් ඔහු පැවසී ය. 

4. ආණ්ඩු ක්‍රම ව්‍යවස්ථා සංශෝධනයේ අරමුණු පිළිබඳ ප්‍රශ්නයක් මතු වන්නේ නම් කළ යුතුව තිබෙන්නේ අදාළ යෝජනාව සම්බන්ධයෙන් හැන්සාඩ් වාර්තා අධ්‍යයනය කිරීම බවත් ඔහු පෙන්වා දුන්නේ ය.

සරත් නන්ද සිල්වාගේ තර්කයට වඩා මෙම තර්කය ප්‍රබල බව අපගේ අදහසයි. සරත් නන්ද සිල්වාගේ තර්කය සමාන වන්නේ කොල්වින් ආර්. ද සිල්වා පිළිබඳ තිබෙන ගොයම් කොළයට මුවා වී වෙඩි තැබුවා ය කියන සාක්කිය කැඩූ ආකාරය පිළිබඳ කතාවටයි. ගොයම් ගසක කොළයක් පෙන්වා එයට මුවා වී වෙඩි තබන්නේ කෙසේදැයි කොල්වින් ආර්. ද සිල්වා තර්ක කළ බව කියැවේ. 

මෙවැනි ගොන් තර්ක වනාහි නීතිමය පරිඥානයේ ලක්ෂණ නො වේ. ඒවා සටකපටකමේ හා නඩුකාරයන්ගේ හා ප්‍රතිවාදී නීතිඥයන්ගේ මුග්ධකමේ සංකේත පමණි. 

සරත් නන්ද සිල්වා වර්තමානයේ සිය චක් ගෝලයන් සමග එක්ව පවත්වන මාධ්‍ය සංදර්ශනය අධිකරණයේදී සබ්රි වැනි නීතිඥයන් අතින් අභියෝගයට ලක් වනු ඇත. 

මහින්ද රාජපක්ෂ ජනාධිපතිවරයා පැරදවීම ගැන අපට කිසිදු ගැටලුවක් නැත. එහෙත්, කවරකුගේ හෝ දිනුමක්, පැරදුමක් ප්‍රජාතන්ත්‍රවාදය ශක්තිමත් කිරීමට ඉවහල් නො වන්නේ නම් එයින් පලක් නැත. 

ප්‍රජාතන්ත්‍රවාදය වෙනුවෙන් දැන්ම ම කළ යුතුව තිබෙන එක් දෙයක් වන්නේ ලංකාවේ ප්‍රජාතන්ත්‍රවාදය ආදාහනය කරන්නට මිනී වලවල් කැපූ සරත් නන්ද සිල්වා ප්‍රජාතන්ත්‍රවාදය සඳහා මහජන ව්‍යාපාරවල හතර මායිමකට වැද්ද නො ගැනීමයි. අප ඉතිහාසයෙන් වර්තමානයට කැඳවිය යුත්තේ හොල්මන් හා පෙරේතයන් නොව වීරයන් ය. 

චන්ද්‍රිකා බංඩාරනායක කුමාරතුංග හිටපු ජනාධිපතිතුමිය ගැන ද අපට කීමට තිබෙන්නේ එය ම ය.

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු. මෙම අඩවියේ සිදු වන සංවාද කඩාකප්පල් කිරීම සඳහා දරන කුමන්ත්‍රණකාරී උත්සාහයන් හෙළා දකිමු.