සුන්දර ඉංගිරිසි: සිංහල අකුරු ඉංග්‍රීසියෙන් ලිවීම හා කුලවාදය

ගිය සතියේ සුන්දර ඉංගිරිසි ලිපියෙන් මතු කළ කාරණා කීපයක් සම්බන්ධයෙන් අන්තර්ජාලයේ සංවාදයක් ඇති වුණා.

ඒ අතරින් ප්‍රධාන ම කරුණ වුණේ අමුතු විදියට සිංහල නම් ඉංග්‍රීසියෙන් ලිවීමත් එක්ක කුල සාධකයේ සම්බන්ධයක් තිබෙනවා ය කියන කාරණය. මම එයට එතරම් එකඟ වුණේ නැති වුණාට මට විරුද්ධව තර්කය දිගට ගියා.

අප මිත්‍ර දිමිත්‍රි බ්ලොග්කරුවා මේ පිළිබඳ කීවේ මෙවැනි දෙයක්. “Michael මයිකල් නම්, Michelle මිශෙල් වුනේ කොහොමද කියලා සුද්දො කරදර වෙනවා ඇතිද? මේ වගේ උදාහරන කෝටියක් විතර ඉංග්‍රීසියෙන් දෙන්න පුලුවන්.

"අර කියන විදියෙ (Kotelawala / Kothalawala, Rajapakse / Rajapaksha) නම් මම හිතන්නේ තියෙන්නෙ අනන්‍යතාවය (සමහර විට අනන්‍යතා අර්බුදය!)"

මේ තවත් අයෙක් පෙන්වා දුන් කරුණක්. 

"වරක් අසනීප වී බෙහෙත් ගැනීමට ගිය විට එම දොස්තරමහතා ඇසුවා මගේ නම ඉංග්‍රීසියෙන් ලියන කොට ඔබ එය ලියන්නේ කෙසේදැයි කියා. ඒ කියන්නේ මගේ වාසගම ලියද්දි අවශ්‍ය නම් OO (ඩබල් ඕ) ඇතුලත් කර ලිවිය හැකියි. එසේ නැතිනම් U (යූ) අකුර ලිවිය හැකියි. මම කිව්වා මම නං ඒ ගැන එච්චර සැලකිලිමත් නෑ කියලා. එවිට ඔහු පැහැදලි කර දුන්න යම් කාරණයක්. එනම් සිංහල වාසගම් ඉංග්‍රීසියෙන් ලියනා විට භාවිතා කරන ඉහත සදහන් අකුරු අනුව එම තැනැත්තාගේ කුලය පිලිබදව සදහන් වන බව. ඇතැම් කුලවල උදවිය ඔවුන්ගේ වාසගම ලියනා විදිය වෙනස් කියලයි ඒ මහතා පැහැදිලි කර දුන්නේ.
මම ඉතිං ඒ හින්දා ඒක ගැනත් සැලකිලිමත් වෙලයි දැන් නම,වාසගම ලියන්න පුරුදු වෙලා ඉන්නේ."

අටම්පහුර බ්ලොග්කරුවා පෙන්වා දුන්නේ කන්දේ විදානේ කියා ලියන අය කේ.වී. ලෙස ලියන බව හා කන්දේ වහුම්පුර කියා ලියන අය කේ. ඩබ්ලිව්. ලෙස ලියන බවයි. 

කුලය අනුව වෙනස්කම් තිබෙන්නේ සිරිවර්ධන, සිරිබද්දන වැනි නම් අනුවයි. ජයසිංහ - ජාසිංහ, කුමාරතුංග - කුමාරනතුංග ආදියත් එවැනියි. සිරිවර්ධන නම් වාසගම ඇති ඕනැ කෙනෙකුට Siriwardane කියා ලියන්න පුළුවන්. එය පෙළපත් ව්‍යවහාරයක් මිස කුල ධුරාවලියක් නෙමෙයි.

Kothalawala කියා ලියන නිර්මල කොතලාවලත්, Kotelawala යි ලියන සර් ජෝන්ගේ පවුලේ අයත් දෙගොල්ලෝ ම ගොවිගම කුලයේ අය. වෙනස තිබෙන්නේ පරගැතිකමේ තරම අනුවයි. මම මේ කාරණයට එරෙහිව තර්ක කරද්දී තවත් අයෙක් පෙන්වා දුන්නේ මෙහෙමයි.

"කුල වාදයත් ධනවාදය වගේ තමයි පැරා. මුල් විහිදිලා තියෙන තැන අදුරගන්නත් අමාරුයි. අන්ත පසුගාමී අදහස් උනත් භාවිතේ තියෙනවා. මාත් අර අනෝව එක්ක එකයි මම දන්නා එකක් තමයි සෙනෙවිරත්න කියල ලියන විදිය , Senevirathna එකක් (එක කුලයක්) Seneviratne තව එකක්. කුලය කියනදේ මතුපිටින් නොපෙනුනාට ලංකාවේ තාමත් බොහෝ දේ තීරණ කරන සාධකයක් "

එහෙත් දිමිත්‍රි පෙනී සිටියේ ඊට වෙනස්වයි.

"මේ නම් ලියන විදියෙන් පෙන්වන්නේ කුලයටත් එහා ගිය ( ප්‍රාථමික ) තමන්ගේ පවුල් අනන්‍යතාවය සලකුනු කිරීමක්. නිර්මල සහ ජෝන් උදාහරනයෙන් එය ඉතා හොඳින් පැහදිලි වෙනවා. පවුල් අනන්‍යතා අර්බුදය?!?  

“මට මෙහෙමත් හිතෙනවා. සමහර විට මේ තියෙන්නේ සුද්දා ලියපු විදිය. උදාහරනයක් විදියට ඉතා විසුලු විදියට නම තාමත් ලියවෙන තේ වතු තිබෙනවා. ලබුකැලේ - Labookelle!, මැදකුඹුර - Meddecombra!!, උඩුවර - Oodoowerre!!!!! මේ කීපයක් විතරයි. ඒ ගම් වල නම්. තමන්ගේ පවුලේ නම එහෙම වෙනස් විදියකට ලියවෙන එකට මිනිස්සු කැමති ඇති. ඒක හීනමානයද අනන්‍යතාවයද ඒ දෙකමද?"

මේ කාරණය පිළිබඳ නිගමනයකට එන්න නම්, මේ පිළිබඳව විධිමත් පර්යේෂණයක් අවශ්‍යයි.

පුවත්පත් කලාවේදියෙක් ලෙස මගේ අරමුණ මෙවැනි සමාජ විද්‍යාත්මක කාරණා ගැන පර්යේෂණ කිරීම නොවෙයි. මා මතු කරන මූලික අදහස වන්නේ සිංහල අකුරු ඉංග්‍රීසියෙන් ලියන්න විධිමත් ක්‍රමයක් සම්පාදනය කර ගත යුතු බවයි. ඒ ගැන ජේ.සී. අහංගම විසින් මතු කරන ලද කාරණා පිළිබඳවත් සාකච්ඡා කළ යුතුයි. මීළඟ ලිපිය ඒ පිළිබඳවයි.


මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.