2015-05-28

මෙවැනි කාලකන්නින් නැවත පාර්ලිමේන්තුවට පත් වන එක වළක්වා ගන්නේ කෙසේ ද?

ශ්‍රී ලංකා නිදහස් පක්ෂයේ හා එක්සත් ජනතා නිදහස් සන්ධානයේ මහින්ද රාජපක්ෂ හිතවාදී පක්ෂවල මේ දිනවල මූලික අරමුණ වී තිබෙන්නේ ආණ්ඩුව පෙරළා තමන්ගේ පාලනය යටතේ මහ මැතිවරණයකට එළඹීමයි. පැරණි ඡන්ද ක්‍රමය යටතේ සුපුරුදු මැතිවරණ දූෂණවල යෙදෙමින් ඡන්ද කෙරුවාවේ යෙදෙන්නටත්, ඒ ඔස්සේ ජයගන්නටත් ඔවුහු සිහින දකිති. 

එසේම, පසුගිය කාලයේ සිදු වූ මහා පරිමාණ වංචා හා දූෂණවලට එරෙහිව සිදු වන විමර්ශන ක්‍රියාවලියට වැට බඳින්නටත් මේ ඔස්සේ ඔවුහු උත්සාහ කරති. මේ වන විට රාජපක්ෂ පවුල ම හිරේ යන තත්වයක් නිර්මානය වෙමින් තිබෙන නිසා මෙවැනි කූට සන්ධානයක් නිර්මානය කර ගන්නටත්, එයට ජනාධිපති මෛත්‍රීපාල සිරිසේන ද හසු කර ගන්නටත්, ඉදිරි මහ මැතිවරණය පැරණි ක්‍රමය යටතේ පවත්වා, සල්ලි බලයෙන් සොරුන් ටික නැවත පාර්ලිමේන්තුවට පත් කර ගන්නටත්, මහින්ද රාජපක්ෂ බැහැලා ම නායකත්වය දෙමින් සිටියි. 

ඒ මදිවාට ජනවාරි 8 ජනවරමට පිටුපෑමට ජනාධිපතිවරයා යොමු කරමින් මෛත්‍රී - මහින්ද සන්ධානයක් හදන්නට ද උත්සාහයක් තිබේ. 

එක්සත් ජාතික පක්ෂයේ ආණ්ඩුකරණයේ බරපතල ගැටලු තිබේ. විශේෂයෙන් ම, මහ බැංකුවේ භාණ්ඩාගාර බැඳුම්කර නිකුතුව හා සම්බන්ධ ගැටලුව ඉතා වැදගත් ය. ඒ සම්බන්ධ විමර්ශන ක්‍රියාවලිය මන්දගාමී වීම ඇත්තෙන් ම කලකිරවන තත්වයකි. රාජපක්ෂ පවුල සම්බන්ධ විමර්ශනවල ද තිබෙන්නේ මෙම ආවේණික දුර්වලකම ම ය. දූෂණය ලංකාව ඉහවහා ගිය තරමට ගැලපෙන අන්දමින් විමර්ශන යාන්ත්‍රණයන් පුළුල් වී නැති වීම මෙයට හේතුවයි. 

කෙසේ වෙතත්, මෙම අවස්ථාවේදී ජනතාවට අවශ්‍යව තිබෙන්නේ හැකි ඉක්මණින් ආණ්ඩුව පෙරළීම හෝ ‘මරලා හෝ' මහින්ද රාජපක්ෂ බලයට ගෙන ඒම නො වේ. ඒ වනාහි රාජපක්ෂලා ප්‍රමුඛ දූෂිත බලවේගවල අවශ්‍යතාවයි. 

මේ රටේ ජනතාවට අවශ්‍ය මෙවැනි කාලකන්නින් පාර්ලිමේන්තුවට තේරී පත් වන ක්‍රමය වෙනස් කිරීමයි. ඒ වෙනුවෙන් මේ අවස්ථාවේ බර තැබිය යුත්තේ 20වන ආණ්ඩුක්‍රම ව්‍යවස්ථා සංශෝධනය සම්මත කර ගන්නටයි. 

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.