අපි මෙහෙමයි රට දිනන්නෙ

ජ්‍යෝතිෂය වැනි අවිද්‍යාත්මක ප්‍රාතිහාර්යයකින් මිස අන් ආකාරයකින් ජනාධිපති මහින්ද රාජපක්ෂට ජනාධිපතිවරණය ජය ගත හැකි බවක් අපගේ නිරීක්ෂණවලින් හා ජනමත සමීක්ෂණවලින් පෙන්නුම් කර නැත.

දැනට සුළු ජාතික ප්‍රධාන දේශපාලන පක්ෂ අතරින් ජනාධිපති මහින්ද රාජපක්ෂ සමග සිටින්නේ තොන්ඩමන්ගේ ලංකා කම්කරු කොංග්‍රසය පමණි. මේ රටේ සුළුතර ප්‍රජාවන්ට 25%කට වැඩි ඡන්ද පදනමක් තිබේ. දැනට පවතින පෙළගැස්ම අනුව ලංකාවේ සුළුතර දෙමළ, මුස්ලිම් ජාතීන්ගේ ඡන්දවලින් මහින්ද රාජපක්ෂට 20%ක්වත් ලබා ගන්නට හැකියාවක් නැත. අඩුම වශයෙන් 80%ක් පමණ ඡන්ද මෛත්‍රීපාලට ලැබෙනු ඇත. එය සමස්ත ඡන්දවලින් 20%ක් පමණ වේ. සියයට පනහේ බහුතරය ලබා ගැනීමට ඔහුට අවශ්‍ය වන්නේ තවත් 30%ක් පමණි.

රටේ බහුතර ප්‍රජාව වන සිංහලයන්ගේ ප්‍රතිශතය 75%ක් පමණ වේ. එම ජනගහණයෙන් 40%ක ප්‍රතිශතයක් ලබා ගත්තත් මෛත්‍රීපාල සිරිසේනට 50% ඉක්මවා යා හැකි ය.

පසුගිය පළාත් සභා මැතිවරණ නවයේ ම ප්‍රතිඵල සලකා බැලූ විට එක්සත් ජාතික පක්ෂය තනිව 26%ක ඡන්ද ප්‍රතිශතයක් ලබාගෙන තිබේ. හෙළ උරුමය, රිෂාඩ් බදුර්දීන්ගේ පක්ෂය, දිගම්බරම්ගේ පක්ෂය හා කඳුරට ජනතා පෙරමුණ අද විපක්ෂය සමග සිටියත්, මෙම පළාත් සභා මැතිවරණවලදී ඔවුන් සිටියේ ආණ්ඩුව සමගයි. එම පක්ෂ අතහැර අද මෛත්‍රීපාල සමග සිටින දෙමළ ජාතික සන්ධානය, මුස්ලිම් කොංග්‍රසය හා ප්‍රජාතන්ත්‍රවාදී පක්ෂයත්, විපක්ෂයේ සිටින ජවිපෙත් මෙම පළාත් සභා මැතිවරණ නවයේදී 44%ක් ඡන්ද ලබා ගත් හ. ඒ ආණ්ඩුවට වාසිදායක කොන්දේසි තිබියදී ය. හෙළ උරුමය, රිෂාඩ් බදුර්දීන්ගේ පක්ෂය, දිගම්බරම්ගේ පක්ෂය හා කඳුරට ජනතා පෙරමුණ යන පක්ෂවලට හා මෛත්‍රීපාල සිරිසේන සමග ශ්‍රී ලංකා නිදහස් පක්ෂයෙන් කැඩී ආ පිරිස්වලට ඉතිරි 6% ලබා ගත නො හැකි ද?

මහින්ද රාජපක්ෂ ජයගැනීමට නම් සිංහල ඡන්දවලින් 60%ක් ඉක්මවා ඡන්ද ලබා ගැනීමට සිදු වේ. මෙය ඔහුට කළ හැකි වේ ද? අද ඔහු උපරිමයෙන් ජාතිවාදය අවුළුවමින් සිටින්නේ මේ ඉලක්කය වෙනුවෙනි. ඒ වෙනුවෙන් ඔහු සුළු ජාතික ඡන්ද අතහැර දමා තිබේ. එහෙත් සිංහලයන් අතරින් එතරම් ඡන්ද සංඛ්‍යාවක් ඔහුට ලැබෙනු ඇතැයි ඔබට නිරීක්ෂණය කළ හැකි ද? උපරිම වශයෙන් බැලුවත් ඔහුට සිංහල ඡන්දවලින් 50%කට වඩා ලබා ගත නො හැකි ය.

අනෙක් පැත්තෙන් ඔහුට සුළු ජාතික ඡන්දවලින් 20%ක් ලබා ගැනීම පවා අද පවතින තත්වය තුළ ඉතා දුෂ්කර ය.

උපරිම වාසිදායක තත්වයක් තුළ කඩින් කඩ පවත්වන ලද පළාත් සභා නවයේ මැතිවරණවල ප්‍රතිඵල එකතු කර බැලුවත් ආණ්ඩුව ලබාගෙන තිබෙන්නේ 54%ක ඡන්ද ප්‍රතිශතයක් පමණි. ඒ හෙළ උරුමය, රිෂාඩ් බදුර්දීන්ගේ පක්ෂය, දිගම්බරම්ගේ පක්ෂය හා කඳුරට ජනතා පෙරමුණත් සමග ය. දැන් මහින්ද රාජපක්ෂට ඒ කිසිවෙකු නොමැතිව 50% ඉක්මවා යන්නට හැකි ද?

සුළු ජාතික දේශපාලන පක්ෂ අතරින් ලංකා ‍කම්කරු කොංග්‍රසය හැරුණු විට මේ වන විට මහින්ද රාජපක්ෂ ජනාධිපතිවරයාට හිතවාදී ස්ථාවරයකට පැමිණ සිටින්නේ කොටි සංවිධානය, කොටින් අනුගමනය කරන දෙමළ ඩයස්පෝරාවේ කොටස් හා හා ඔවුන් සමග සම්බන්ධ ලංකාවේ කණ්ඩායම් පමණි. ගජේන්ද්‍රකුමාර් පොන්නම්බලම් පසුගිය දිනෙක ටැමිල්නෙට් වෙබ් අඩවියට සිය ස්ථාවරය හෙළිදරව් කරමින් අඟවා ඇත්තේ දෙමළ ජනතාව 2005දී මෙන් මෙවර ද ඡන්දය වර්ජනය කළ යුතු බවයි. එහෙත්, කොටි සංවිධානයට 2005දී මෙන් සාර්ථක අන්දමින් මැතිවරණ වර්ජන ව්‍යාපාරයක් දියත් කිරීමේ හැකියාව ලංකාවේ භෞතිකව නැත. එසේම, කොටි සංවිධානය එවැන්නක් දියත් කළ හැකි මට්ටමට ක්ෂණිකව ඔසවා තබන්නට සමත් කුමන හෝ ජගතෙක් ද නැත.
ජනවාරි 8දා ඔබට මේ රටේ අනාගතය සම්බන්ධ‍යෙන් ඔබට පැහැදිලි තීරණ දෙකක් තිබේ.

ඔබ දූෂණයට කැමති ද? ඥාති සංග්‍රහයට කැමති ද? අනාගත පරම්පරා උගස් කර ලබා ගන්නා ණයවලින් කරන, ඵලදායී නො වන සංවර්ධනයන්ගෙන් ඔබේ ඇස ගිනිකණ වැටේ ද? සංවර්ධන ව්‍යාපෘති නාමයෙන් මහජන මුදල් කෝටි, ප්‍රකෝටි ගණනින් මංකොල්ල කෑම ඔබට ප්‍රශ්නයක් නො වේ ද? ඔබේ දරුවාගේ අධ්‍යාපනය, ඔබේ ‍සෞඛ්‍යය හා සමාජාරක්ෂණය වෙනුවෙන් දැන් වෙන් කරන අරමුදල් ප්‍රතිශතයන් ඔබට ප්‍රමාණවත් ද? සරළව කීවොත් රටේ පාසල් දසදහසකින් දහසක් පමණක් සංවර්ධනය කිරීම ඔබට ප්‍රමාණවත් ද? රටේ ඵලදායී සෞඛ්‍ය සේවාවක් නැති වීම ඔබට සතුටක් ද? රජයේ කාර්යාලයකින් හරියට වැඩක් කර ගන්නට බැරි වුණත්, තව තවත් නිලධාරීන් රජයේ සේවයට බඳවා ගැනීම ගැන ඔබට ආඩම්බර ද? අත්‍යවශ්‍ය ආහාර ද්‍රව්‍යවලින්, ඩීසල්, පෙට්‍රල්වලින් පවා අසීමිතව බදු ගෙවමින්, ගෙවන බදුවල‍ට සරිලන සේවාවක් නො ලැබුණත් ඔබට සතුටින් ජීවත් වන්නට පුළුවන් ද?

මේ රට කවදාවත් හරි නො යන නිසා කවදා හෝ දවසක ඔබේ දරුවන් හෝ මේ රටින් සමු ගෙන පි‍ටරටකට යනු ඇතියි ඔබ සිහින දකිනවා ද?

හොඳ පිරිමි පෙනුමක් ඇති, ලොකු පවුලක් ඇති, දරුවන් වඩා ගන්නා, වහසි බස් දොඩන්නට දක්ෂ, උත්සව ශ්‍රීයෙන් එහෙ මෙහෙ යන, වන්දිභට්ටයන් රජෙකු යයි හඳුන්වන දැවැන්ත පෞරුෂයක් හිමි ජනාධිපතිවරයකු ගැන ඔබට ආඩම්බර ද? ඔබේ ඡන්දයෙන් පාර්ලිමේන්තුවට හා සභාවලට තේරී පත් වූ නියෝජිතයන් ඔබ අමතක කර ඔහුගේ දෑත් ශක්තිමත් කරන්නට එකතු වීම ගැන ඔබට ආඩම්බර ද? පෞද්ගලික ඡන්ද ව්‍යාපාර වෙනුවෙන් ඔබේ මහජන මුදල් වැය කරමින් හොඳින් හෝ නරකින් හෝ ඡන්ද දිනීම වීරකමකැයි ඔබ සිතනවා ද? පරිසරය වනසන පොලිතින්, ප්ලාස්ටික් ගොඩගසමින්, ඔබේ අනාගතය යහපත් කිරීම සඳහා යොදා ගන්නට තිබුණු දැවැන්ත ධනයක් නාස්ති කිරීම ගැන ඔබට ආඩම්බර ද?

තනිවම යුද වැදී, කොටි සංවිධානය සමූලඝාතනය කරමින් රට බේරා ගත් බව කියන යුද නායකයාට කළ ගුණ සැලකීම වෙනුවෙන් ඔහු හා ඔහුගේ පරපුර ලංකාවේ යාවජීව රාජ්‍ය නායකයන් කළ යුතු යයි ඔබ සිතනවා ද? යුද්ධය කළේ ඔහු පමණක් නො වේ. ශ්‍රී ලාංකික ජාතියෙන් සැලකිය යුතු පිරිසක් එයට දායක වූ අතර එහි ගෞරවය හෝ අගෞරවය හෝ තනි පුද්ගලයකුට හිමි නො විය යුතු ය. එසේ ම, ජාතියක බහුතරයගේ උවමනාව වෙනුවෙන් කළ යුද්ධයකදී සිදු වූ වැරදි සම්බන්ධයෙන් ජනාධිපති මහින්ද රාජපක්ෂ හෝ වෙනත් යුද නායකයන් හෝ පමණක් වැරදිකරුවන් විය යුතු නො වේ.
ඔබේ ඡන්දය බුලත් කොළයට දී මහින්ද රාජපක්ෂ ජනාධිපතිවරයා නැවත බලයට පත් කළහොත්, ඔහු තව තවත් ණය ගනිමින්, දූෂණයේ ගිලෙමින් අත්තනෝමතික ලෙස තීරණය කරන ලද මහා සංවර්ධන ව්‍යාපෘති දියත් කරනවා ඇත. පාර්ලිමේන්තුව හා වෙනත් මහජන සභා වෙනුවට ඔහු හා ඔහුගේ අන්තේවාසිකයන් ම පමණක් තව තවත් ශක්තිමත් වනු ඇත. නීතියේ ආධිපත්‍යය වෙනුවට දේශපාලන ආධිපත්‍යයත්, ප්‍රජාතන්ත්‍රවාදය වෙනුවට පවුල් පාලනයකුත් තහවුරු වනු ඇත. ඔබේ දරු මුණුපුරන්ටත් මීට වඩා යහපත් ජීවිතයක් නො ලැබෙන්නට ඉඩ තිබේ.

ඔබ මේ ක්‍රමයට අකැමැති ද? දූෂණය, අල්ලස හා බලහත්කාරකම් මැද මෙහෙම ඉදිරියට යන්නට බැරි යයි ඔබ සිතනවා ද? ඔබේ දරුවන් වෙනුවෙන් මීට වඩා යහපත් රටක් ගොඩනැගිය යුතු යයි ඔබ සිතනවා ද? ඒ රට නීතිගරුක රටක් විය යුතු යයි ඔබ සිතනවා ද? ඔබේ දරුවාගේ ආරක්ෂාව ගැන බියක් නැති හෙට දවසකට ඔබ කැමති ද? ස්වාධීන අධිකරණයක්, පොලිසියක් තිබිය යුතු යයි සිතනවා ද? රාජ්‍ය ‍‍‍සේවය ඵලදායී විය යුතු යයි සිතනවා ද?

ඔබේ මතය ශක්තිමත් ලෙස නියෝජනය කරන මහජන නියෝජිතයන් පාර්ලිමේන්තුවට, පළාත් සභාවට, පළාත් පාලන ආයතනයට පත් කර යැවිය යුතු යයි ඔබ සිතනවා ද? පල් හොරුන් නොවන, කටපුරා නායකයන් යයි කිව හැකි සැබෑ නායකයන් බිහි කර ගැනීමට අප වැඩ කළ යුතු යයි ඔබ සිතනවා ද? ඔබ රට භාර දුන් භාරකරු සොරා කා එය වවුල් හපයක් නො කරන අනාගතයක් ගැන ඔබ සිහින දකිනවා ද?

සංවර්ධනය යනු අධිවේගී මාර්ග, ගුවන් තොට, වරාය හැදීම පමණක් නො වන බවත්, පරිසරය, අපේ ජීවිත හා අනාගතය සුරක්ෂිත කිරීම හා සුවපහසු කිරීමත් සංවර්ධනයෙන් සිදු විය යුතු බව ඔබ පිළි ගන්නවා ද?

අපේ පුංචි ලංකාව කාගේවත් අතකොළුවක් නොවී, කාටවත් බය නැතිව, ලෝකය සමග සාමයෙන් සංහිඳියාවෙන් පවතිනවාට ඔබ කැමති ද? අපේ රටට චීනයෙන් පමණක් නොව වෙනත් රටවලිනුත් යහපත් ආයෝජකයන්, සංචාරකයන් පැමිණෙන, විදේශ තානාපති කාර්යාල රටින් පළා යන්නට උත්සාහ කරන නීති විරෝධී සරණාගතයන් ලෙස අපට නො සලකන, ලංකාව ගෞරවනීය ‍දේශයක් ලෙස ලෝක‍යේ සම්භාවනාවට ලක් වෙන දවසක් ගැන ඔබට සිහිනයක් තිබෙනවා ද?

අපේ රටේ විවිධ ජාතීන්, ආගම් හා කුල ආදිය රට කෑලි කඩන්නට උත්සාහ නො කරන, ලාංකික ජාතියක් ලෙස සියලු දෙනා එක්සත්ව නැගී සිටින, එකිනෙකාට ගරු කරමින් සාමයෙන්, සංහිඳියාවෙන්, සතුටින් වාසය කරන දවසක් ගැන ඔබට සිහිනයක් තිබේ ද?
එසේ නම්, මුලින් ම දැනට පවතින ක්‍රමයේ සංකේතාත්මක ආරක්ෂකයා වන ජනාධිපති මහින්ද රාජපක්ෂ පැරදවිය යුතු ය. ඒ සඳහා හොඳම ක්‍රමය යහපත් සමාජ ක්‍රමයක් පිළිබඳ සිහින නියෝජනය කරන පොදු අපේක්ෂක මෛත්‍රීපාල සිරිසේන දිනවීමයි.

ජනාධිපති මහින්ද රාජපක්ෂ ඉල්ලා සිටින පරිදි යුද්ධය ජය ගැනීම වෙනුවෙන් ඔහුට කෘත ගුණ සැලකීමක් ලෙස අප රිසි සේ රට පාලනය ඔහුට පැවරිය යුතු ද? නැත. ජාතික ප්‍රශ්නය හා යුද්ධය නිසා අපමණ දුක් විඳි, යුද්ධයේ බරපැණ නිහඬව ඉවසා දරා ගත් මේ රටේ ජනතාවටත් තමන් කළ දේ වෙනුවෙන් ගුණයක් ලැබිය යුතු ය. දුෂ්කර වර්තමානය වෙනුවට, අපේ දරුවන්ට හෝ යහපත් අනාගතයක් තිබිය යුතු ය.

මෛත්‍රීපාල සිරිසේන දිනවීම යනු හුදු පුද්ගලයෙකු දිනවීමෙන් ඔබ්බට ගිය සැබෑ මහජන ජයග්‍රහණයක් බවට පත් කිරීමට නම් අප සැම දෙනා එක් විය යුතු ය. ඒ වෙනුවෙන් ජනවාරි 8දායින් ඔබ්බට විහිදෙන මහජන සමගියක් හා වැඩපිළිවෙලක් වෙනුවෙන් අපි අරගල කළ යුත්තෙමු. පොදු අපේක්ෂකයා ජනපති වුවහොත්, ඔහු ලවා දුන් පොරොන්දු ඉටු කරවා ගැනීමට අවශ්‍ය පීඩනය පවත්වා ගැනීම සඳහා පුළුල් මහජන ව්‍යාපාරයක් ගොඩනැගිය යුතු ය.

විධායක ජනාධිපති ක්‍රමය සම්බන්ධයෙන්, ස්වාධීන කොමිෂන් සභා සම්බන්ධයෙන්, මැතිවරණ ක්‍රමය වෙනස් කිරීම සම්බන්ධයෙන්, යහපාලනය සම්බන්ධයෙන්, නීතියේ ආධිපත්‍යය සම්බන්ධයෙන්, දූෂණ දුරලීම සම්බන්ධයෙන් මෛත්‍රීපාල සිරිසේන විසින් දෙන ලද පොරොන්දු කඩිනමින් ඉටු කළ යුතු ය.

රටේ ජාතීන් අතර සංහිඳියාව ඇති කිරීම සඳහා දේශපාලන විසඳුමක් වෙනුවෙන් සාකච්ඡා ආරම්භ කළ යුතු ය. රටේ ප්‍රජාතන්ත්‍රවාදී ප්‍රවාහයේ සිටින දේශපාලන පක්ෂ හා පුරවැසි සංවිධාන එකතු වී ප්‍රශ්නයකට විසඳුමක් සාකච්ඡා කිරීම කිසි සේත් ම වරදක් නො වේ. එවැනි ක්‍රියා ජාතිවාදී පදනමින් හෙළා දකින නරුමයන් කිසි සේත් ම බලයට පත් නො කළ යුතු ය.

දූෂණය වැළැක්විය යුතු ය. විදේශ රටවලින් ලබා ගත් ණය මංකොල්ල කමින් පෞද්ගලිකව ගොඩනගා ගත් දේශීය හා විදේශීය දේපල ආපසු ලබාගෙන විදේශ ණය ගෙවීම සඳහා යොදා ගත යුතු ය.

අධික බදු බර අඩු කර ජනතාවට සහන ලබා දිය යුතු ය. විශේෂයෙන් ම අත්‍යවශ්‍ය ආහාර ද්‍රව්‍ය බදුවලින් නිදහස් කළ යුතු ය.

අත්‍යවශ්‍ය අසරණ ජන කොටස් මිස සෙසු ජනතාව ආණ්ඩුවෙන් සහනාධාර සිඟන්නේ නැත. අවශ්‍ය වන්නේ ජනතාවට දෙපයින් නැගිටීමට අවස්ථාව දෙන ආර්ථික ක්‍රමයකි. ජනතාවගේ මිළ දී ගැනීමේ හැකියාව වර්ධනය කළ යුතු ය. අසාධාරණ ලෙස බදු අය කිරීම නැවැත්විය යුතු ය.

රැකියා හා ජීවනෝපාය අවස්ථා සුලබ කරන ආර්ථික ක්‍රියාමාර්ග ගත යුතු ය. අධ්‍යාපනය, සෞඛ්‍යය වැනි මහජන අභිවෘද්ධියට හේතු වන අංශවලට කරන ආයෝජන වැඩි කළ යුතු ය. මහජන සෞඛ්‍යාරක්ෂාව නැංවීම සඳහා අරමුදල් ලබා දිය යුතු ය. සෑම දරුවකුට ම සරසවි අධ්‍යාපනය දක්වා නොමිළේ ඉගෙනුම ලැබීම සඳහා පාසල් හා විශ්ව විද්‍යාල පහසුකම් පුළුල් කළ යුතු ය. විශේෂයෙන් ම විද්‍යා හා තාක්ෂණ අධ්‍යාපනය සංවර්ධනය කිරීම සඳහා ආයෝජනය කළ යුතු ය.

මහින්ද රාජපක්ෂ පාලනය විසින් සංවර්ධන ප්‍රමුඛතා නො සලකා හරිමින්, දැවැන්ත ණය බරක් ජනතාව මත පටවමින් සංවර්ධනය කර තිබෙන මත්තල ගුවන් තොටුපළ, හම්බන්තොට වරාය වැනි යටිතලයන් ඵලදායී අන්දමින් භාවිතයට ගැනීමට කටයුතු සම්පාදනය කළ යුතු ය. 

අත්තනෝමතික විධායක ජනාධිපති බලතල සංශෝධනය කළ යුතු ය. පාර්ලිමේන්තුව, පළාත් සභා හා පළාත් පාලන ආයතන බලගැන්විය යුතු ය. ප්‍රජාතන්ත්‍රවාදය තහවුරු වන පරිදි ස්වාධීන අධිකරණයක්, පොලිසියක්, මැතිවරණ කොමිසමක් පිහිටුවිය යුතු ය. දූෂණය දුරලීම සඳහා ස්වාධීන අල්ලස් දූෂණ විමර්ශන කොමිසමක් පිහිටුවිය යුතු ය. රාජ්‍ය සේවය මහජන මුදලින් පිංපඩි ගන්නා නිකමුන්ගෙන් පුරවනවා වෙනුවට මහජනතාවට ඵලදායී කාර්යක්ෂම සේවාවක් කළ යුතු ය.

විනාශයේ මාවතට පිවිස ඇති ලාංකීය රාජ්‍යය හා ජන සමාජය ගැන අලුතෙන් නො සිතා අපට ඉදිරියට යා නො හැකි ය.

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.