මහින්දගේ ජීවිතාරක්ෂාව

මහින්ද රාජපක්ෂට මරණ තර්ජනයක් තිබෙන බව අමුතු මාධ්‍ය සංවිධානයක් විසින් පැමිණිලි කරන ලදී. 

ඇත්තට ම මහින්දට පැති ගණනාවකින් ජීවිත තර්ජන තිබේ. 

මේ පැමිණිලි කරන අය ම මොන කුමන්ත්‍රණයක හවුල්කරුවන් ද යන්න පැහැදිලි නැත. මහින්දගේ ජීවිතයට අනතුරක් කර එයින් තම සතුරන් අපකීර්තියට පත් කර මොන අන්දමකින් හෝ ගොඩ යන්නට හදන අය මේ පැමිණිලිකරුවන් පිටුපස ඉන්නවා විය හැකි ය. 

අනෙක් පැත්තෙන්, මහින්ද මේ දිනවල කටයුතු කරන්නේ සිය ජීවිතාරක්ෂාව ගැන තඹයකට මායිම් නො කර කිසියම් උමතු ආකාරයකට ය. ජනවාරි 8දාට පෙර උවමනාවටත් වඩා ආරක්ෂාව සහිතව ගමන් බිමන් ගිය ඔහු ජනවාරි 9දා සිට ආරක්ෂාව ගැන කිසිදු තැකීමකින් තොරව තැන් තැන්වල සැරිසරයි. 

ඔහු හිටපු ජනාධිපතිවරයෙකි. එසේම ආරක්ෂාව පිළිබඳ තදබල අවදානමක් ඇත්තෙකි. එවැනි අය පළමුව තම හැසිරීමෙන් ආරක්ෂාව සලස්වා ගත යුතු ය. අවදානම් සහගත ලෙස හැසිරීමෙන් ඔවුහු තම ජීවිතය අවදානමේ හෙළා ගනිති. ඔහුට දේශපාලනය කිරීමට තිබෙන අයිතියට අපි ගරු කරමු. එහෙත්, ඔහුගේ පිහිටෙන් එතෙර වන්නට බලා සිටින ඔහුගේ අනුගාමිකයන් කරන්නේ ඔහුගේ ජීවිතය බිලි දී හෝ තමන්ට පාරක් කපා ගැනීමට බව ඔහු පළමුව අවබෝධ කර ගත යුතු ය. 

හිටපු ජනාධිපතිවරයකුට හිමි නිල ආරක්ෂාවට වඩා ආරක්ෂාවක් මහින්ද රාජපක්ෂට ලැබිය යුතු බවට විවාදයක් නැත. ඒ වෙනුවෙන් ආණ්ඩුව කටයුතු කළ යුතු ය. එසේම, ඔහුට ජීවිත අවදානමක් තිබේ නම්, ඔහුගේ ජීවිතාරක්ෂාව සම්බන්ධයෙන් වගකිව යුතු රජය උපදෙස් දෙන පරිදි හැසිරීමට ද ඔහු කැමති විය යුතු ය. 

යුද්ධය සම්බන්ධයෙන් කීර්තිය පමණක් නොව, එහි අතුරුඵල ද ඔහු භාර ගත යුතු ය. ඔහුට තිබෙන ජීවිත තර්ජනය එක් අතුරුඵලයකි. එහිදී ඔහුගේ ජීවිතය වෙනුවෙන් සමාජයට තිබෙන වගකීමට ඔහු ද අනුගත විය යුතු ය. ආරක්ෂාව පිළිබඳ තර්ජනයක් ඇති පුද්ගලයකු ලෙස හැසිරීමේ වගකීමක් ඔහුට තිබේ. 

රජීව් ගාන්ධි වැනි පුද්ගලයකු පවා ඝාතනය කළ කොටි සංවිධානය නැවත නැගී සිටීම සඳහා මහා පරිමාණ ඉලක්කයක් තෝරා ගැනීම ගැන පුදුම විය යුතු නැත. 

මහින්ද මැරීම සඳහා ඔත්තු දීම පිණිස කොටි සංවිධානයෙන් කෝටි ගණන් අල්ලස් ගෙන අසු වූ පසු මහින්ද ළඟ බලු කුක්කන් බවට පත් වූ අය ද මහින්ද ළඟ සිටින නිසා ඔහු කොහොමත් පරිස්සම් විය යුතු ය. 

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.