රාජපක්ෂ පවුලේ ඉරණම රටේත් ඉරණම ද?

රාජපක්ෂ පවුලේ ඉරණම දැන් ලංකාවේ ම ඉරණමයි. අද වන විට ලංකාවේ දේශපාලන ගමන තීන්දු වන්නේ ඔවුන් ඊළඟ මැතිවරණය දිනාගෙන සිය පැවැත්ම තහවුරු කර ගන්නට ගන්නා ක්‍රියාමාර්ග තුළයි. ඊළඟ ඡන්දය දිනාගෙන තව දුරටත් බලයේ සිටීම හැර වෙනත් දේශපාලනයක් ඔවුන් ළඟ ඇති බවක් නො පෙනේ. තමන් විසින් ම නිර්මානය කර ගත් තත්වය තුළ බලයෙන් ඉවත් වීමට නො හැකිකම ඔවුන්ගේ දේශපාලනය දිවෙන ප්‍රධාන සාධකය වී තිබේ. ඒ නිසා රටට කුමන මිළක් දරන්නට සිදු වුවත් රාජපක්ෂ පවුල බලයේ තබා ගන්නට සිදු වී තිබේ.

ඔවුන්ගේ දේශපාලනය දිවෙන්නේ කොමිස් ආර්ථික ප්‍රතිපත්තියත්, සිය බලය රැක ගැනීම සඳහා යොදා ගැනෙන සෑම ආකාරයක ම අගතීනුත් සමගයි. විපක්ෂයේ විරෝධයන් කිසිවක් ඔවුහු නො තකති. ඔවුන්ට පැවැත්ම තහවුරු කර දීම පිණිස කශේරුකාව අත්හළ දූෂිත දේශපාලකයන් බුරුත්තක් මෙන් ම, ආණ්ඩුව සමග දූෂණය බෙදාගෙන කන ජනතාවක් ද සිටිති. වයඹ පළාතේ බදුල්ලේ යම් ආණ්ඩු විරෝධී රැල්ලක් තිබෙනමුත්, සමස්තයක් ලෙස ආණ්ඩුව තවමත් බලවත් ය. 

කෙසේ වෙතත්, විමල් වීරවංශගේ කොන්දේසි 12ට ආණ්ඩුව දනි පනි ගා එකඟ වීම තුළ දැකිය හැකි දෙය වන්නේ පොඩි හෙල්ලුම්කෑමක් තිබෙන බවයි. විමල්ගේ වාග් චාතුර්ය මෙතැනදී නැවතත් ආණ්ඩුවට අවශ්‍ය වී තිබෙන බවයි. 

මේ අතර, ඇමරිකානු පුරවැසියකු වන ගෝඨාභය රාජපක්ෂට එරෙහිව යුද අපරාධ චෝදනා සම්බන්ධයෙන් ක්‍රියා කළ හැකි ආකාරය පිළිබඳව එක්සත් ජනපද කොංග්‍රසයට නීති විශාරදයකු විසින් කරන ලද කරුණු දැක්වීම ප්‍රසිද්ධ විය. මේ පිළිබඳ සිය ෆේස්බුක් ගිනුමේ සටහනක් තබන එක්සත් ජාතික පක්ෂයේ ලේකම් තිස්ස අත්තනායක මෙසේ පවසයි.

අවසානයේ  ජනපතිට බලකර පැවසීමට ඇත්තේ නිරායුද මිනිසුන් මැරීමට ඉහලින් අණදුන් බවට චෝදනා ලැබ සිටින සිය සොයුරා බේරාගනීමට සමස්ථ යුධ හමුදාවම අවමාණයට ලක් නොකර වීරෝධාර රනවිරුවන්ගේ පරිත්‍යාගයන් තමාගේ නිරුවත වසාගනීමේ අසාර්ථක ප්‍රයත්නයට පලිහක් කර නොගෙන, වරද කල අයට පොරොන්දුවූ ලෙස තරාතිරම නොබලා පෞද්ගලික සම්බන්දකම් අමතක කොට කටයුතු කරන ලෙසය. එමෙන්ම මහ පොලොව නුහුලන අපරාධ කල පිල්ලියාන් කරුණා කේ.පී වැනි අපරාධ කරුවන් නීතිය ඉදිරියට ගෙන ආ යුතු බවයි. එසේ කලහොත් එය අපිට නැවතත් ලෝකයා ඉදිරියේ අභිමාණවත් ධර්මද්වීපයේ පුරවැසියන් ලෙස පෙනී සිටිය හැක.

එමෙන්ම ඇමරිකාවටද අපි දැඩිව කියා සිටින්නේ බොරුවට ලෝකයා නොරවටා, අප වීරෝධාර හමුද සෙබලුන් හා ලක්වැසියා අවමානයට පත් නොකොට වරදක් කලායැයි චෝදනා ලබ සිටින සිය පුරවැසියන්ට එරෙහිව පර්‍රික්ශණ වහා අරඹා වරදක් සිදුවී ඇත්නම් දඩුවම් දෙන ලෙසය.

මේ වන විට විපක්ෂ දේශපාලකයන් හා ජනමාධ්‍ය ආණ්ඩු‍ව මෙම දේශපාලනඥයා ගැන තිබුණ භීතියෙන් අත්මිදෙමින් සිටින ආකාරයක් දැකිය හැකි ය.ඇමරිකාව ප්‍රමුඛ බටහිර රටවල් ලංකාව සම්බන්ධයෙන් කරනු ලබන මැදිහත්වීම තියුණු කිරීම මෙයට හේතුවයි.

ඒ භීෂණය නැවත ඇති කිරීම ද පහසු නැති බව සමාජ හා සාමයික කේන්ද්‍රයේදී බොදු බල සේනාව ඇල්ලූ ගුස්තියට එරෙහිව ඇමරිකා එක්සත් ජනපදය ඇතුළු බටහිර බලවත් රටවල් රැසක් විසින් දක්වා තිබෙන තියුණු ප්‍රතිචාරයෙන් පෙනේ. සැමදා පහර කන සාමය හා සංහිඳියාව වෙනුවෙන් පෙනී සිටින ජනතාව ද රාජ්‍ය අනුග්‍රහය ලබන ත්‍රස්තවාදීනට ප්‍රතිචාර දක්වන්නට පෙළඹෙන ස්වභාවයක් ද  දැන් දැන් දක්නට ලැබේ.

තවත් පැත්තකින් ආරක්ෂක අමාත්‍යංශයේ වෙබ් අඩවියේ ෂෙනාලි වඩුගේගේ ලිපියක් පළ කර තමිල්නාඩු මහ ඇමතිනී ජයලලිතාට පහර දෙන්නට ගොස් ආරක්ෂක ලේකම්වරයා අලි අමාරුවක වැටී ඇත. අද ජනාධිපතිතුමා උදේ කෑම මතින් මාධ්‍ය ප්‍රධානීන් හමු වූ වෙලාවේත් සිය මලණුවන් වෙනුවෙන් ඉන්දියාවෙන් සමාව අයැදී ය. මෙම සිද්ධිය සමග සමාව ගැනීම් මාලාවක් ම සිදු විය. 

ෂෙනාලි ඩී. වඩුගේ නම් ගැහැනියක විසින් ලියන ලද මෙම ලිපිය ආරම්භ වන්නේ ම ඉතා පහත් ප්‍රකාශයක් වන Hell hath no fury like a woman scorned යන යෙදුමෙනි. මෙම ස්ත්‍රී විරෝධී, පුරුෂෝත්තමවාදී ප්‍රකාශයෙන් ෂෙනාලි අදහස් කරන්නේ ජයලලිතාට පහර දීමට වුව ද, එමගින් මෙම ලේඛිකාවගේ සමාජ දේශපාලන දැක්ම ද පෙනේ.

දිගින් දිගට ම සිදු වන බෞද්ධ අන්තවාදී ව්‍යපාරවල ත්‍රස්ත ක්‍රියා ද ආරක්ෂක ලේකම්වරයාගේ ගිනුමට ම වැටෙමින් ඔහු තවත් දුෂ්කර තත්වයකට තල්ලු වනු දක්නට ලැබේ. මේ වන විට රතු ඉර පැන යාම නිසා ගලගොඩඅත්තේ ඥානසාර භික්ෂුව නිහඬ කර තිබෙන ආකාරයක් ද, විමල් වීරවංශ පක්ෂය විසින් මෙහෙයවනු ලබන බව කියන රාවණා බලය ඉදිරියට දමා තිබෙන ආකාරයක් ද දක්නට ලැබේ. 

මුහුණ දෙමින් සිටින අවිනිශ්චිත තත්වය තුළ ගෝඨාභය රාජපක්ෂට විසඳුම විය හැක්කේ මීළඟ ජනාධිපති වීමයි. ඒ සඳහා ඔහු අගමැති තනතුර අපේක්ෂා කරන බවක් ද දැකිය හැකි ය. පසුගිය දිනවල ඔහු පුන පුනා කීවේ ජනාධිපතිවරයා ඉල්ලා සිටිනවා නම් ඔහු දේශපාලනයට එන බවයි. (ඔහු දැනටත් කරන්නේ දේශපාලනය ම තමා ය. ඔහු දැනට සිටින බලවත් තත්වයෙන් ඉහළට යාමට නම් ඔහු අගමැති වැනි තනතුරකට පත් විය යුතු ය.)

එහෙත් ඔහුගේ ජනාධිපති අයියා මාධ්‍ය ප්‍රධානීන් හමු වූ අවස්ථාවේදී කීවේ තවම ඔහු එවැනි ඉල්ලීමක් නො කළ බවයි. මල්ලී දැනට සිටින තැන සිටීම ප්‍රමාණවත් ය යන අදහසක් ද ඔහු ඉදිරිපත් කළේ හොඳ අමාත්‍යාංශ ලේකම්ලාත් ඉන්න ඔනෑ බව කියමින් ආණ්ඩුවට රෙදි නැතිව කඩේ යන අනෙක් නිලධාරීන්ට පල් එක දමමිනි.

අලුත් ම සංවර්ධනය වන්නේ බෞද්ධ අන්තවාදී ව්‍යාපාර අගමැති දි.මු. ජයරත්නව පැන්නීම සඳහා සිවුරු කැහැපට ගසාගෙන දොට්ට බැසීමයි.ඒ කාගේ උවමනාවක් ද?


මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු. Read in English blog.parakum.com