2016-12-07

ෆිදෙල් හා රාවුල් කස්ත්‍රෝට වඩාත් ම සමීප වන ලාංකිකයන් වන්නේ මහින්ද හා ගෝඨාභය රාජපක්ෂ තමා ය

“Mahinda and Gotabhaya Rajapaksa are the Closest we Have to Fidel and Raul Castro”
- Dayan Jayathilaka

ෆිදෙල් හා රාවුල් කස්ත්‍රෝට වඩාත් ම සමීප වන ලාංකිකයන් වන්නේ මහින්ද හා ගෝඨාභය රාජපක්ෂ ය යන දයාන් ජයතිලකගේ කියුම ගැන අවධානය යොමු කළ යුතුයි.

දයාන් ජයතිලකගේ මේ කතාව හිනාවෙන්න විහිළුවක් නෙමෙයි. අඬන්න ඇත්තක්. වාමාංශිකයන් පෙනී සිටින ජාතික සමාජවාදය හෙවත් ජාතිවාදී රාජ්‍ය ධනවාදය ලංකාව වගේ රටක කරන්නට පුළුවන් උපරිමයෙන් මහින්ද ගොඩනැගුවා. ඒ විතරක් නෙමෙයි, වාමාංශිකයන්ට වඩා හොඳින් ප්‍ර‍ජාතන්ත්‍ර‍වාදී රාමුවක් තුළ බහු පක්ෂ ක්‍ර‍මයක් පවත්වාගෙන යමින් ඒක කළා.

සුවිශාල රාජ්‍ය අංශයක්, දැවැන්ත රාජ්‍ය සේවයක්, රාජ්‍ය සුබසාධන සේවා ආදිය එක්ක ම වෙළඳපොළ නිදහසත් තුලනය කරන්නට මහින්ද සමත් වුණා.

ලෝක බැංකුවේ, ජාත්‍යන්තර මුල්‍ය අරමුදලේ ප්ලග් ගැලෙව්වෙ මහින්ද. බටහිරටයි ඉන්දීය ව්‍යාප්තවාදයටයි එරෙහිව යමින් ලංකාව චීනෙ එක්ක ප්ලග් කළෙත් මහින්ද.

මහින්ද අසාර්ථක වුණේ ජාතික නිෂ්පාදනය නැංවීම පැත්තෙන් හා ජාතික සමගිය ගොඩනැගීම පැත්තෙනුයි. ෆිදෙල් ද ජාතික ආර්ථිකය ගොඩනැගීම පැත්තෙන් අසාර්ථක ය. ඔහුට මහින්දට තරම් සංකීර්ණ ජාතික ගැටලුවකට මුහුණ දෙන්නට සිදු වූයේ නැත.

ජාතික සමාජවාදයේ සංකේතය ලෙස සලකන්නට පුළුවන් උතුරු කොරියාවේ තිබෙන අගතිගාමිත්වයන් වන පවුල්වාදය, ඥාති සංග්‍ර‍හ, විරුද්ධවාදීන් ඝාතන, ප්‍ර‍කාශනයේ නිදහස පාලනය කිරීම, මුග්ධත්වය වැපිරීම, අන්ධ භක්තිකයන් පිරිසක් නිර්මානය කර ගැනීම වැනි සියල්ලම වගේ මහින්ද ලංකාවේ කළා. 

ඒ වගේ ම, කියුබාවේ වගේ ම පිරිමි ආධිපත්‍යයෙන් යුත් සමාජ ක්‍ර‍මයක් මහින්ද ලංකාවේ කියුබාවටත් වඩා හොඳින් ස්ථාපිත කළා. කියුබාවේ සුදු, ස්පාඤ්ඤ, කතෝලික ආධිපත්‍යය හා සමාන අන්දමින් ලංකාවේ සිංහල බෞද්ධ ආධිපත්‍යය ස්ථාපිත කළා. 

හැබැයි මේ එකක්වත් කළේ රතු කොඩි දාගෙන නෙමෙයි. මාක්ස්ගේ, එංගල්ස්ගේ, ලෙනින්ගේ කෑලි උපුටා දක්වමිනුත් නෙමෙයි. ඒක නිසායි වාමාංශිකයන් මේක විප්ලවය ය කියලා පිළිගන්නට අකැමැති.

වාමාංශිකයන් නිර්ධන පංතිය කියන්නේ කාට ද? ඔවුන්ගේ පංති පදනම වන්නේ ප්‍ර‍ධාන වශයෙන් ම අඩුවෙන් වැඩ කර මහජන මුදලින් වැටුප්, විශ්‍රාම වැටුප් ආදිය ලබන රජයේ සේවයේ පහළ ස්ථරයයි. උදාහරණයකට ජවිපෙ වෘත්තීය සමිති ව්‍යාපාරය අරගෙන බලන්න. ඔවුන් වෘත්තීය සමිති හදා තිබෙන්නේ මේ පැළැන්තියටයි. ඊට අමතරව, සහනාධාර මත යැපෙන ගැමි දිළිඳු ජනයා අතරත් ජවිපෙ යම් තරමකට පැතිරිලා තිබුණා. ඒ අය ඔවුන් හැඳින්වූයේ ගොවීන් ලෙසයි. මේ පංති ඇත්තෙන් ම නියෝජනය කළේ මහින්දයි. ඔහු ඔවුන්ට වැඩි වැඩියෙන් මහජන මුදල් පොම්ප කළා. රජයේ සේවකයන්ට මෝටර් බයිසිකල් පවා දුන්නා.

මේ දේවල් කළේ ඵලදායී වැඩ කරන විදේශ ශ්‍ර‍මිකයන්, පෞද්ගලික අංශයේ වැඩ කරන ජනතාව, ඇඟලුම් කම්කරුවන්, වතු කම්කරුවන්, අවිධිමත් ක්ෂේත්‍රයේ ශ්‍ර‍මිකයන් ආදීන් නිර්දය ලෙස සූරා කාලායි. මෙම ඵලදායී වැඩ කරන ජනතාව සංවිධානය කරන්න වැඩ කරලා තියෙන්නේ මොන වාමාංශිකයා ද? හැබැයි, මහින්ද මොවුන්වත් ගානට අන්දා ගත්තා.

අපි හිතමු ජවිපෙ වගේ පක්ෂයක් බලය අරගත්තා ය කියලා. සෝමවංශ අමරසිංහ ලංකාවට ආපු අලුත අනුරාධපුරේ තිබුණු දැවැන්ත රැළියකදී කිව්වෙ ඒගොල්ලන් ආවොත් එල්.ටී.ටී.ඊ. එකට දෙන්නෙ ඒ වන විට ඇමරිකාව ඇෆ්ගනිස්තානයට ගහන විදියටයි කියලායි. ඉතින් ගෝඨාභය ගැහුවෙ ඒ විදියට තමයි. යුද්ධය ඉවර වෙලාත්, කොයි තරම් ජාත්‍යන්තර බලපෑම් මැද්දේ වුණත්, මහින්ද බලය බෙදාගැනීමකට ගියේ නැහැ. ඒ ක්‍රියාත්මක කළේ ජවිපෙ විසඳුම නැතුව වෙන මොකක් ද? සිංහල බෞද්ධ මූලික රාජ්‍යය තුළ සුළුතර ජාතීන් බලෙන් රඳවා ගැනීම තමයි මහින්දගේ විසඳුම. ඒකට ජවිපෙ විරුද්ධ වෙන පදනම මොකක් ද?

මම නම් හිතන්නෙ ජවිපෙ බලය ගත්තා නම් මහින්ද කළ මේ ටික කරන්නේ මීට වඩා දුර්වල විදියටයි. ඒ විතරක් නෙමෙයි, ජවිපෙ මහින්ද වගේ දාලා යයි ද කියන එකත් මට සැකයි. බලය මාරු කරන්න ගිහින් සෑහෙන්න ලේ හැලෙන්නත් ඉඩ තිබුණා. ඒ අතින් ගත්තා ම මහින්ද කස්ත්‍රෝට වඩා ඉදිරිගාමීයි.

මහින්ද කස්ත්‍රෝ වැනි විප්ලවවාදීන්ගෙන් වෙනස් වුණේ අඳින ඇඳුම, කතා කරන වචන හා අල්පේච්ඡතාවාදී ප්‍ර‍චාරය වැනි කාරණා පැත්තෙන්. මහින්දට වඩා කස්ත්‍රෝ අල්පේච්ඡයි ද කියන එක වෙන ම කතා කළ යුතු විෂයක්. මහින්ද පවුල ඇගයූ මිනිහෙක්. කස්ත්‍රෝ නිදහස් ලිංගිකයෙක්. මහින්ද පවුල සැපවත් කළා. කස්ත්‍රෝ තමන්ගේ මීයා සැපවත් කළා. මේ අයගේ ශෛලීන් එකිනෙකාගෙන් වෙනස්. ඒත්, මූලික ලක්ෂණ සමානයි.

අපි ඔය ගතානුගතික වම ප්‍ර‍තික්ෂේප කරන්නේ ඔන්න ඔය හේතු නිසායි. ලෝකයට වඩා යහපත් දෙයක් දෙන්නට වමට බැහැ. මහින්දලාටත් බැහැ. 

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.