CCTV යුගය, ලොකු අයියා, බාප්පලා හා අපි

ඩිජිටල් අවකාශය තුළ අප සතු තොරතුරු ආරක්ෂා කර ගන්නේ කෙසේද යන්න පිළිබඳ  සංජන හත්තොට්ටුව විසින් කරන ලද ඉතා අපූරු ඉදිරිපත් කිරීමක් සමග සම්බන්ධ වීමට ගිය සතියේ මට අවස්ථාව ලැබිණි. 

තොරතුරු අස්ථානගතවීම මගේ ජීවිතයේ සාමාන්‍ය දෙයකි. අවුරුද්දේ මුල් මාස කීපයේ හැර දිනපොතක් දිගට ම ලියන්නට අසමත් මගේ තොරතුරු ඇත්තේ මගේ හිතේ හා මේ බ්ලොගේ පමණි. ඕනෑ දෙයක් ඕනෑ වෙලාවට සොයා ගන්නට බැරිකම මගේ ගෘහස්ථ කාර්යාලයේ ආදර්ශ පාඨයයි.  ඔය එස් පහ ආදී සංකල්පවලින් මොඩ් කරන්නට බැරි අප වැනි අලුගුත්තේරුවන් සිටීමෙන් මට නම් හිතෙන්නේ ලෝකයේ ජෛව විවිධත්වය වැඩි වනවා ය කියා ය. කොහොමත්, දැන් ඉතින් හැදෙන්නට එච්චර කාලයක් ද ඉතිරි වී නැති එකේ ඉතිරි ටිකත් ඔන්න ඔහොම ම ඉඳලා මැරෙන්න අධිෂ්ඨාන කරගෙන තිබේ.

ඒත්, පරණ මුද්‍රිත ෆොටෝ දුර්වර්ණ වී යන විට මෙන් ම, පුංචි උන්ගේ පොඩි කාලේ ඩිජිටල් ෆොටෝ හා ලියපු කවි ආදිය අස්ථානගත වී ඇති බව දැන ගත් විට අසීමිත දුකක් හා අපේ අපිළිවෙල ගැන කලකිරීමක් ද ඇති වේ. ඒත් ඉතින් ඒවා ඉතිරි වී තිබුණත් ඉතින් කවුරුවත් අපි ගැන කටුගෙවල් හදන එකක්යැ කියා ගිය ‍දේ ගියාවේ කියා අමතක කර දමන්න ද බැරිකමක් නැත. සමහරු තමන් ලියූ ලිපි එකතු කරගෙන ඉන්නේ කවදා හෝ කවුරුහරි අනිවාර්යයෙන් ම තමන් ගැන කටුගෙයක් හදනවා ය කියා දන්නවා වගේ ය. ඉතිහාසගත වන්නට කවුරුද අකැමැති?

කෙසේ වුවත්, තොරතුරු ආරක්ෂා කර ගැනීම ගැන බොහෝ දෙනෙක් උනන්දු ය. කාගෙන් ද? බාප්පලාගෙන් ය. බාප්පලා අප පස්සෙන් එනවා කියා බය වීමෙන් පොඩි ආතල් එකක් ගැනීමට වම, දකුණ කියා භේදයක් නැතිව අප බොහෝ දෙනෙක් කැමති ය.

බාප්පලා කිව්වා ම මිල්ලෙ සොයා චිත්‍රපටයේ මරු කෑල්ලක් සිහි වේ. එහි ඉතාලියේ සිටින ජවිපෙ සාමාජිකයෙක් තවෙකෙකුට පහර දෙයි. මේ දකින මහේන්ද්‍ර හෝ වෙනත් කෙනෙක් ඒ ඇයි ද අසයි . උත්තරය "මූ බාප්පා" යන්නයි. ඉතින් ප්‍රශ්නය අහන කෙනා අහන්නේ "ඉතින් බාප්පා නම් මොකද ගහන්නේ?" කියා ය.

ලංකාවේ සමාජ ක්‍රියාකාරිකයෝ වැඩි දෙනෙක් කරන විශේෂ දෙයක් නැති වුණත්, බාප්පලා පස්සෙන් එනවා ය කියා හැංගි හැංගී සිටින්නට කැමති ය. 

මට නම් ඇත්තෙන් ම බිරිඳගෙන්වත් හංගන්නට එතරම් දෙයක් නැත.

බාප්පලා මගේ කොම්පියුටරය ගෙන ගොස් ඕනෑ නම් කියනු ඇත්තේ "මූ මේකෙන් වැල බලා තිබේ" කියා ය. ලංකාවේ වැල නො බලපු කොම්පියුටරයක් සොයා ගැනීම කිසාගෝතමී කිසිවකු නො මළ ගෙයකින් අබැටක් සෙව්වා වාගේ දෙයකි. මම වැල බලා තිබේ කියා මම කල් ඇතිවම කියා තියන්නේ ඕක නිව්ස් එකක් ලෙස බ්‍රේක් කරන්නට ඕනෑ නැති නිසා ය.

ඔය කැරළි ගැන මගේ අත්දැකීම් නම් ලණු කැරළිවලට එහා ගිය ඒවා ය. මහපටැඟිලි දෙක පැන්සලක් විතර ඝනකම ලණුවකින් බැඳ පිටිපසින් අඹරා වහලේ එල්ලන කල හෝ පෙට්‍රල් හෝ මිරිස් කුඩු හෝ දැමූ ෂොපිං බෑගයක් ඔලුවට දමා එහි කට සීල් වන සේ අල්ලාගෙන ටික වෙලාවක් යන විට හෝ වතුර ටැංකියක හිස ඔබා තද කරගෙන ඉන්නා විට හෝ අපේ ගම් පැත්තේ වැලිපැන්න පොලිසිය ‍'කොච්චි කොටන්නං රළහමි දෙනවද එළුවා' කරන විට "කියඤ්ඤං" යි නො කියා ඉන්න පුළුවන් ය කියා ගැරන්ටියක් දෙන්නට 1989න් පසු මට නම් බුදු අම්මෝ බැරි ය. ඒ නිසා ඩෝං ගාලා ඔලුවට එකක් එක පාර තියන්න බාප්පේ ආතල් එක නො කැඩෙන්න, මම නම් කරන්නේ කියන්න පුළුවන් දේවල් විතර ය. මගේ ඔය ඇනොනිමස් ආතල් නැත්තේ මං වීරයෙක් නිසා ‍‍නො ව බය ගුල්ලෙක් නිසා ය. 

ඉතින් මේ වැල්වටාරම් ‍ටික ලිව්වේ අප පිවිසී තිබෙන අලුත් CCTV යුගය ගැන කියන්නට ය. ගිය සතියේ ලංකාවේ  CCTV යුග පරිණාමයේ වැදගත් සන්ධිස්ථානයක් පසු වූ බව මම මෙම ලිපියේ පෙන්වා දී ඇත්තෙමි.

එහි ඇති සිද්ධි දෙකෙන් වැදගත් සිද්ධිය වන්නේ නියෝජ්‍ය පොලිස්පති වාස් ගුණවර්ධනගේ  ආරක්ෂක පිරිවර විසින් කරන ලද බව කියන කොන්ත්‍රාත් ඝාතනයක් මාට්ටු වූ ආකාරයයි. ‍තමන් පැටලී සිටි ණය උගුලෙන් ගැලවීම පිණිස ණය හිමියා මරන්නට පොලිසියට කොන්ත්‍රාත්තුව දී එකට කා, උගුල තුළට ණය හිමියා කැඳවාගෙන ගිය ණයකාර පුද්ගලයා, ඉන් පසු පණ දාගෙන බොරුවට ඔහු සොයන්නට පටන් ගෙන තිබේ. මේ අතර මරා දමන ලද පුද්ගලයාගේ මිනිය හමු වී හඳුනා නො ගෙන මෝචරියක තිබී ඇත. කාරයද අතහැර දමා තිබියදී පොලිසියට ගෙනැවිත් තිබී ඇත. කාරය අතුරුදහන් වූ පුද්ගලයාගේ බව දැන ගත් පසු එය අතහැර දමා තිබූ ස්ථානයට ගොස් නිරීක්ෂණය කරන විට අසල ස්ථානයක CCTV කැමරාවක් දක්නට ලැබී එහි වාර්තා අධ්‍යයනය කර බලන විට දක්නට ලැබී තිබුණේ අර කොන්ත්‍රාත්තුව දුන් තැනැත්තා කාරය එතැන දමා මාරු වන ආකාරයයි. 

CCTV කැමරාවෙන් විවිධ සොරකම් මාට්ටු වී තිබුණත්, එයින් බාප්පලාට ද කෙළ වූ පළමුවන අවස්ථාව මෙය නිසා මෙය ලංකාවේ CCTV පරිණාමයේ වැදගත් සන්ධිස්ථානයක් ලෙස දේශපාලනිකව අර්ථකථනය ක‍ළෙමි. 

ලොකු අයියා දැන් CCTV කැමරාවෙන් අප දෙස බලා සිටින බැවින් බාප්පා ය, පුතා ය කියා වෙනසක් නැතිව කවුරුත් මාට්ටු ය. 

මේ සමාජ ක්‍රමයට එරෙහිව සටන් කිරීම හැංගී සන්නද්ධ වීමෙන් කළ නො හැකි ය කියා මට සිතී බොහෝ කල් ය. එයට මුහුණ දීම සඳහා තිබෙන හොඳ ම අවි වන්නේ සත්‍යය, විවෘතභාවය හා එඩිතරකමයි. ලොකු අයියා හයියෙන් ම බය ඒවාට ය.

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න
Read in English blog.parakum.com