පුස්තකාලෙ ඉස්සරහ පාර

පුංචි කුහුඹුවකු

තවත් කුහුඹුවකුට කියන

පොඩි රහස ද

බිළිඳු කිරි දෙතොලක්

කිරිබර පියයුරක තැවරෙන

මිහිරි පහස ද

ළපලු අතරින්

මල් මොටෙයියෙක්

හුස්ම ගන්නා විට

ගොවි වතක පිපි

මඳ සිනාව ද

මාසෙ පඩිපත ගෙන

හංදියේ කඩෙන් බඩු ගෙන

ගෙදර යන

වැඩ කරන මිනිහෙකුගෙ මල්ලක

තෙල් තැවරුණ පත්තර කඩදාසියක

එතූ පොඩි මුලක් බැඳි

හණ නූලක සුවඳ ද

කිසි පොතක ලියැවී නැත

තව බොහෝ දේ සේ

ලෝකය පොතක් නොව

ලෝකයක් ම ය

කොපමණ පොත් පිරුණත්

ලෝකය තවම හිස් ය

ලෝකය කියවන දරුවා

කඩුල්ල පැන පාසල් යයි

ජීවිතය පාර වී

ඔහුට පාවඩ එළයි

පුස්තකාල ළඟින්

පාරවල් අවසන් නොවේ

- අජිත් පැරකුම් ජයසිංහ