සමාජ විද්‍යාඥයන්ගේ සංගමයේ සමීක්ෂණය ඔස්සේ මැතිවරණ ප්‍රතිඵලය අනුමාන කිරීම

ඉදිරි මහ මැතිවරණයේදී මහජන මතය ක්‍රියාත්මක වන්නේ කෙසේ ද යන්න අධ්‍යයනය කිරීමට හොඳ සමීක්ෂණ වාර්තාවක් නිකුත් වී තිබේ. සමීක්ෂණය කර තිබෙන්නේ සමාජ විද්‍යාඥයන්ගේ සංගමය විසිනි. දේශපාලන පක්ෂ හා අපේක්ෂකයන්ට තම ප්‍රචාරණ ව්‍යාපාර හා මැතිවරණ ප්‍රතිපත්ති ප්‍රකාශන සම්පාදනය කිරීමේදී ද එය ඉවහල් කර ගන්නට හැකියාව තිබේ.

මෙම ජනමත සමීක්ෂණය සඳහා දිවයින පුරා දිස්ත්‍රික්ක 22හි ම ගෘහ ඒකක 1500ක් ආශ්‍රය කරගෙන තිබේ. පුහුණු සමීක්ෂකයන් 80දෙනෙකු යොදාගෙන, ප්‍රශ්න 35ක ප්‍රශ්නාවලියක් ඔස්සේ ජුනි මස මුල් සතියේ කරන ලද එම ජනමත සමීක්ෂණයේ වැදගත් නිරීක්ෂණ මෙසේ පෙළගස්වා තිබේ.

මීට වසරකට පෙර පවුලේ පැවති ආර්ථික තත්වය හා දැන් ආර්ථික තත්වය සන්සන්දය කිරීමේදී වර්ධනයක් සිදු වී තිබෙන බව 37.5%ක් දෙනා පිළි ගන්නා අතර 38%ක් දෙනා පවසන්නේ වෙනසක් සිදු වී නැති බවයි. වර්ධනයක් සිදු වී ඇති බව පවසන අය අතර සුළුතර ජාතීන්ට අයත් අය වැඩි ය. තත්වය නරක අතට හැරී ඇති බව පවසන්නේ 23%ක් පමණි. සිංහලයන්ගෙන් වැඩි ප්‍රතිශතයක් (42%) ඉන්නේ තත්වයේ වෙනසක් සිදු වී නැත යන ස්ථාවරයේ ය. සිංහලයන් අතර තත්වය වර්ධනය වී ඇති බව හා පිරිහී ඇති බව කියන දෙපිරිස ම 27%ක පමණ මට්ටමේ සිටිති.

පසුගිය වසරට සාපේක්ෂව මේ වසරේදී දේශපාලන වටපිටාව තුළ වැඩි නිදහසක් දැනෙන බව සහභාගිකයන්ගෙන් අඩක් පමණ ම පිළිගනිති. 37%ක් පවසන්නේ වෙනසක් සිදු වී නැති බවයි. නිදහස අඩු වී තිබෙන බව කියන්නේ 9.3%ක් පමණි. මෙහිදී ද සුළුතර ප්‍රජාවෝ වැඩි නිදහසක් ලැබී ඇති බව පවසන අතර බහුතර සිංහලයන් වැඩිපුර පවසන්නේ වෙනසක් සිදු වී නැති බවයි.

සාමාන්‍යයෙන් ගත් කල 56.8%ක් ජනයා මෛත්‍රීපාල සිරිසේන ජනාධිපතිවරයාගේ හා රනිල් වික්‍රමසිංහ අගමැතිවරයාගේ ආණ්ඩුව ගැන තෘප්තිමත් ය. අතෘප්තිමත් බව පවසන්නේ 33.6%ක් පමණි. ජාතික පදනමින් ගත් කල, සුළුතර ප්‍රජාවන් අතර තෘප්තිමත්භාවය ඉහළ තත්වයක පවතී. සිංහල ජනතාව අතර 35.5%ක් තෘප්තිමත් ය. 34.3%ක් තරමක් අතෘප්තිමත් ය. දැඩි ලෙස අතෘප්තිමත් බව ප්‍රකාශ කරන්නේ සිංහලයන්ගෙන් 12.9%කි. 

පසුගිය වසරට සාපේක්ෂව රටේ යටිතල පහසුකම් සංවර්ධනය වැඩි වී තිබේ ද, බිඳ වැටී තිබේ ද යන ප්‍රශ්නයට ලැබුණු ප්‍රතිචාරය මෙසේ ය: 20.2%කු් වර්ධනය වී ඇති බව පවසති. 28%ක් පවසන්නේ තත්වයේ වෙනසක් සිදු වී නැති බවයි. 43.6%ක් ම යටිතල පහසුකම් සංවර්ධනයේ තත්වය පිරිහී ඇති බව පවසති. සිංහලයන් අතරින් 55%ක් ම යටිතල පහසුකම් පිරිහී ඇති බව පවසති. වර්ධනය වී ඇති බව පවසන්නේ 9.3%ක් පමණි. සිංහලයන්ගෙන් 27.5%ක් පවසන්නේ තත්වයේ වෙනසක් නැති බවයි.  

මෛත්‍රීපාල සිරිසේන රජයේ වැදගත් ම ජයග්‍රහණය ලෙස සැලකෙන 19වන ආණ්ඩුක්‍රම ව්‍යවස්ථා සංශෝධනය සම්මත කර ගැනීම පිළිබඳව දැනුමක් ජනතාවගෙන් 71%කට ම නැත. සිංහලයන් අතර මෙම නො දැනුවත්කම වැඩි ය. එය 79%කි. දෙමළ ජනයා අතරින් 28%කට ඒ පිළිබඳ දැනුවත්භාවයක් තිබේ.

19වන ආණ්ඩුක්‍රම ව්‍යවස්ථා සංශෝධනය පිළිබඳ දැනුවත් පිරිස් අතර 75%ක් ජනයා 19වන ආණ්ඩුක්‍රම ව්‍යවස්ථා සංශෝධනයෙන් අනාගතයේදී රටට සෙතක් වනු ඇතැයි විශ්වාස කරති. එම අදහස සෑම ජන කොට්ඨාසයක් අතර ම එක සේ දක්නට ලැබේ. 19වන ආණ්ඩුක්‍රම ව්‍යවස්ථාව හානිකර එකකැයි විශ්වාස කරන 9.1%ක් සිටිති. ඒ අතරින් බහුතරය සිංහල ජාතිකයෝ ය.

පසුගිය වසරට සාපේක්ෂව මාධ්‍ය නිදහස ඉහළ තත්වයක තිබෙන බව 60%ක් ජනයා පිළිගනිති. මෙම පිළිගැනීම සිංහල ජනයා අතර 50%ක් වන අතර සුළුතර ජාතීන් අතර 69%ට වැඩි ය.

ප්‍රතිචාර දැක්වූවන්ගෙන් 43.6%ක් දෙනා පසුගිය වසරට සාපේක්ෂව ජීවන වියදම අඩු වී තිබෙන බව පවසති. 25%ක් පවසන්නේ වෙනසක් සිදු වී නැති බවයි. ජීවන වියදම ඉහළ ගොස් ඇති බව පවසන ප්‍රතිශතය 29%කි. මෙහිදී ද සිංහල ජනයා අතර ජීවන වියදම අඩු වී තිබෙන බව පිළිගන්නේ 35%ක් පමණි. සිංහලයන්ගෙන් 37.6%ක් පවසන්නේ ජීවන වියදම ඉහළ ගොස් ඇති බවයි. 

නීතියේ ආධිපත්‍යය සුබවාදී වෙනසකට ලක් වී තිබෙන බව 50%ක් ජනයා පිළිගනිති. 25%ක් පවසන්නේ වෙනසක් නැති බවයි. නීතියේ ආධිපත්‍යය වර්ධනය වී ඇති බව පිළිගන්නේ සිංහල නියැදියෙන් 41.5%ක් පමණි. සුළුතර ප්‍රජාවන් අතර මෙම පිළිගැනීම 50%ට වැඩි ය. එහෙත්, සිංහලයන් අතර පවා නීතියේ ආධිපත්‍යය පිරිහී ඇති බව පවසන ප්‍රතිශතය 13.3%ක් පමණි.

ශ්‍රී ලංකාවේ විදේශ සම්බන්ධතා වර්ධනය වී ඇති බව ප්‍රතිචාර දැක්වූවන්ගෙන් 40%ක් දෙනා පවසති. පිරිහී ඇති බව පවසන්නේ 11.2%ක් පමණි. එහෙත්, 33%ක් ම ඒ ගැන කිසිත් දන්නේ නැත.

සමස්තයක් ලෙස රටේ ජනගහණයෙන් 49%ක් පමණ තමන් අයත් ජනවර්ගයේ අවශ්‍යතාවන් ඉටු වී තිබෙන බව පිළිගනිති. 27%ක් පවසන්නේ තත්වයේ වෙනසක් සිදු වී නැති බවයි. පසුගිය වසරට සාපේක්ෂව තම ජනවර්ගයේ අවශ්‍යතාවන්ගේ තත්වය පිරිහී තිබෙන බව පවසා තිබෙන්නේ 15.4%ක් පමණි. තමන්ගේ තත්වය පිරිහී ඇති බව සිතන්නේ සිංහලයන්ගෙන් 21%ක් පමණි. තමන් අයත් වන ආගම් සම්බන්ධයෙන් ද දක්වා තිබෙන්නේ මේ හා ආසන්න ප්‍රතිචාරයකි.

සුළුතර ප්‍රජාවන්ගේ හිමිකම් තහවුරු කිරීමට රජය වැඩිපුර මැදිහත් විය යුතු බව 84%ක් දෙනා පවසති. සිංහල ජනතාවගෙන් ද 79%ක් ඒ බව පිළිගනිති. 

මෛත්‍රීපාල සිරිසේන ජනාධිපතිවරයාගේ ආණ්ඩුව යටතේ වාර්ගික ප්‍රජාවන් අතර සම්බන්ධතා වර්ධනය වනු ඇති බව 68%ක් දෙනා විශ්වාස කරති. තත්වය වෙනස් නො වනු ඇතැයි පවසන්නේ 15%ක් පමණි. 

එසේම, යුද්ධයෙන් පීඩාවට පත් උතුරු නැගෙනහිර පළාත්වල ජනතාවගේ ජීවනෝපාය සුරක්ෂිත කිරීම සඳහා ආණුඩුව වැඩිදුරටත් කටයුතු කළ යුතු බව 90%ක් ම ජනයා ප්‍රකාශ කරති. සිංහල ජනයා අතර ද මෙම පිළිගැනීම ඉතා ඉහළ ය. 

‘යුද්ධයෙන් පසු සිංහල ජනතාවගේ අවශ්‍යතාවන් නො තකා හැර තිබේ' යන ප්‍රකාශයට එකඟ වී තිබෙන්නේ 16%ක් පමණි. සමස්තයක් ලෙස 68%ක් ම එය ප්‍රතික්ෂේප කර තිබේ. විශේෂයෙන් සිංහලයන් අතරින් 71%ක් ම තම අවශ්‍යතාවන් නොතකා හැර ඇති බව පිළි ගන්නේ නැත. 

සමීක්ෂණයට සහභාගි වූ නියැදියෙන් 41%ක් පවසන්නේ හමුදාවන්ගේ යහපැවැත්ම පසුගිය වසරට සාපේක්ෂව තහවුරු කර ඇති බවයි. 22%ක් දෙනා තත්වයේ වෙනසක් නැති බව පවසති. පිරිහී ඇති බව පවසන්නේ 14%ක් පමණි.

මහ මැතිවරණය ජනාධිපතිවරණයට වඩා වෙනස් ය. උතුරු, නැගෙනහිර පළාත්වල ඡන්ද බොහෝ දුරට ජනවාර්ගික පදනමින් දෙමළ හා මුස්ලිම් පක්ෂ අතර බෙදී යයි. රටේ සෙසු පළාත්වල සුළුතර ප්‍රජාවන්ගේ ඡන්ද වැඩි වශයෙන් ලබාගැනීමේ හැකියාව තිබෙන්නේ එක්සත් ජාතික පක්ෂයට බවට සැකයක් නැත. එය එක්සත් ජාතික පක්ෂයට ඉතා වාසිදායක තත්වයකි. එහෙත්, ජයග්‍රහණය කරන්නේ කුමන පක්ෂය ද යන්න තීරණය කිරීමේදී තවමත් සිංහල බහුතර ජනයාගේ ඡන්දය දීමේ රටාව ඉතා වැදගත් ය.

මෙම සමීක්ෂණය පදනම් කරගෙන අපට පැමිණිය හැකිව තිබෙන ඉතා පැහැදිලි නිගමනයක් වන්නේ සිංහල ජනයා අතර ජාතිවාදය සම්බන්ධයෙන් ඉහළ ප්‍රතිචාරයක් නැති බවයි. ඒ බව වාර්ගික අවශ්‍යතාවන්, බුද්ධාගම, හමුදා සෙබළුන්ගේ සුබසාධනය වැනි කාරණා සම්බන්ධයෙන් සිංහල ජනතාව දක්වා තිබෙන ප්‍රතිචාර ඇසුරින් පැහැදිලි වේ. මෙවර ද කොපමණ ජාතිවාදය ඇවිළුවත් සිංහල ජනයා වෙතින් ඡන්ද වර්ධනය කර ගත නො හැකි බව විශේෂයෙන් ම මහින්ද රාජපක්ෂ පාර්ශ්වය විසින් අවබෝධ කර ගත යුතුව තිබේ. 

ආණ්ඩුව කෙරෙහි තෘප්තිමත්භාවය ප්‍රකාශ කරන 35%ක් පමණ වන සිංහල ජනයා බොහෝ දුරට එක්සත් ජාතික පක්ෂයේ සිංහල ජනතාව අතර ඡන්ද පදනම ලෙස අනුමාන කරන්නට පුළුවන. එජනිස මෛත්‍රීපාල පාර්ශ්වය හිමිකම් කියනු ඇත්තේ එයින් සුළු ප්‍රතිශතයකට පමණි. දැඩි ලෙස අතෘප්තිමත්භාවය ප්‍රකාශ කරන 13% නියත වශයෙන් ම මහින්ද රාජපක්ෂ පාර්ශ්වයේ ස්ථාවර ඡන්ද පදනමයි. තරමක් අතෘප්තිමත්භාවය ප්‍රකාශ කරන 34% පාවෙන ඡන්ද ලෙස සැලකිය හැකි ය. අතෘප්තිමත් වූ පමණින් මෙම පිරිස ඍජුව ම මහින්ද රාජපක්ෂ පාර්ශ්වයට ඡන්දය දෙන පිරිසක් ලෙස නො සැලකිය යුතු ය. එම ඡන්ද බොහෝ දුරට එජාප, එජනිස, ජවිපෙ අතර බෙදී යනු ඇත. 

යටිතල පහසුකම් සංවර්ධනය පිළිබඳ විශේෂයෙන් ම සිංහල ජනයා අතර තිබෙන අදහස් එක්සත් ජනතා නිදහස් සන්ධානයට වාසිදායක බව පෙනේ. සිංහලයන්ගෙන් 55%ක් ම යටිතල පහසුකම් සංවර්ධනය බිඳ වැටී ඇති බව පවසති. පවුලේ ආර්ථිකය සම්බන්ධයෙන් සිංහලයන් වැඩි දෙනෙක් සිතන්නේ වෙනසක් සිදු වී නැති බවයි. එහෙත්, සෙසු කාරණා සියල්ලෙහිදීම පාහේ දක්නට ලැබෙන්නේ ආණ්ඩුවට සුබවාදී තත්වයකි. ආණ්ඩුවට තිබෙන සුබවාදී තත්වයෙන් වැඩි වාසි ලබන්නේ එක්සත් ජාතික පක්ෂයයි.  

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.