සෙනසුරු මාරුව ඔබට කොහොම ද?

ජ්‍යෝතිෂ ඡායාරූප එකතුවක් සඳහා මෙතැන ක්ලික් කරන්න

මට ලොකු අධ්‍යාපනයක් නැත. මම විභාග සමත් නො වුණේ වෙන කිසිවක් නිසා නොව මම අදක්ෂ නිසා ය. මම වෘත්තිකයෙක් ද නො වෙමි. එසේ ම කිසිවෙක් මට ඡන්දය නො දෙන නිසා මට ප්‍රා දේශීය සභා මන්ත්‍රී කෙනෙකුවත් වන්නට බැර ය. එහෙත් මටත් පොරක් වන්නට අවශ්‍ය ය. චන්ඩියකු වීමට සුදුසුකම් අවශ්‍ය නොවන මුත් බය වැඩි නිසා ඒකත් කරන්නට බැරි ය. 

ඒ නිසා මම කේන්දර බලන්නට උගත්තෙමි. අද කාලයේ පොරක් වීමට තිබෙන මාර්ගය එයයි. තව වැඩි කාලයක් යන්නට පෙර නාසා ආයතනය ද චන්ද්‍රිකා ගුවන් ගත කිරීමට පෙර ලංකාවේ ජ්‍යෝතිර්වේදීන්ගෙන් වෙලාවක් බලා ගන්නවා ඇත. 

පහත පළ වන්නේ සෙනසුරු මාරුව ගැන මගේ ගැඹුරු ජ්‍යෝතිෂ විග්‍රහයයි. කියවා ප්‍රීති වන්න. 


සෙනසුරු මාරුව ලෝකයට ම මාර අපල ය. දරුණු වසංගතයක් පැතිර යාමෙන් විශේෂයෙන් ම සම කළු පැහැ මිනිසුන් ජීවත් වන මහාද්වීපයක විශාල පිරිසක් මිය යා හැකි ය. මෙම වසංගතය බටහිර රටවලට ද පැතිර යා හැකි මුත්, එයින් වන හානිය අවම කර ගැනීමට හැකි වනු ඇත. මෙම වසංගතයේ බලපෑම ලංකාවට ද දැනෙන්නට ඉඩ තිබේ. එහෙත්, සෞඛ්‍ය අමාත්‍යාංශයේ කේන්ද්‍රය හොඳ නිසා එය පාලනය කර ගන්නට පුළුවන. 

ලංකාවේ ප්‍රධාන පෙළේ දේශපාලනඥයකුගේ අභාවය සිදු විය හැකි ය. එහෙත් එය ඝාතනයක් නොව ස්වාභාවික හේතු මත සිදු වන දෙයකි. එසේ ම මහාචාර්යවරු, වෛද්‍යවරු, ඉංජිනේරුවරු, ගුරුවරු ද මිය යති. භික්ෂූන් වහන්සේලා අපවත් වනු ඇත. මෙය වනාහි සෑම මිනිසකුට ම තමන්ගේ ඥාතියකුගේ, මිතුරකුගේ, අසල්වැසියකුගේ අවමංගල්‍යයකට සහභාගි වන්නට සිදු වන කාලයකි.

ලෝකයේ ප්‍රමුඛ ආගමික නායකයකු නුදුරු කාලයේදී ලංකාවට පැමිණෙනු ඇත. එමගින් ලංකාවට සුවිසල් ලෝක අවධානයක් යොමු වනු ඇත. 

එහෙත්, ජාත්‍යන්තර වශයෙන් පීඩාකාරී තත්වය තව දුරටත් පවතිනු ඇත. මාළු මිළ පහළ බසී. මීන රාශිය මේෂ රාශියට පැමිණෙනු ඇත.  කටක රාශිය පවා මේෂ රාශියට එන්නට ඉඩ තිබේ. ජාත්‍යන්තර පරීක්ෂණ, කොඩිවින සිදු විය හැකි ය. 

මැයි සිට සැප්තැම්බර් දක්වා රාහුගේ හා නිරිතදිග මෝසමේ බලපෑම වැඩි වනු ඇත. එමගින් ගංවතුර තත්වයන් බලාපොරොත්තු විය හැකි ය. මාස් කන්නයේ ගොවිතැන සඳහා වතුර ලැබෙනු ඇත. අස්වනු මිළ ගණන් ගැන සැලකිලිමත් වන්න. මාස් ශුද්ධිය හදිසියේ නතර වී තිබේ නම් සැලකිලිමත් වන්න.

ඉලෙක්ට්‍රොනික් තරාදි ව්‍යාප්ත වීම නිසා තුලා රාශියට අපල කාලයක් උදා වේ. පොළවල්වල හොරට කිරන මුදලාලිලා අල්ලන්නට පාරිභෝගික ආරක්ෂණ අධිකාරිය පියවර ගත යුතු ය. නල ජලය හා පියුරිට් හේතුවෙන් කුම්භ රාශියට ද අපල සිදු වේ. එහෙත් අවුරුදු කාලයට වළං මුට්ටි විකිණීම වැඩි වේ යයි අනාවැකි පැවසිය හැකි ය. 

මිථුන රාශියට මෙම සෙනසුරු මාරුව ඉතා හොඳ ය. අන්තර්ජාලයේ වැල බෝ වනු ඇත. රාජ කුමාරයින්ට සිකුරා ලබනු ඇත. කන්‍යා රාශි මකර රාශියට බිලි වීම දිගට ම සිදු වනු ඇත. අසරණයින්ට දිගින් දිගට ම හස්තයාගේ පිහිට ය.

වෘෂභ රාශියට යහපත් කලක් උදා වනු ඇත. ඉරච්චි කොත්තු විකුණන කඩ සංඛ්‍යාව ශීඝ්‍රයෙන් පහළ බසිනු ඇත. ඒ සමග කුකුළු ගොවිපළ කරන අයට වාසි සහගත තත්වයක් උදා වනු ඇත. වෘෂභ රාශිය අයාලේ යාමෙන් වගා හානි සිදු වීමට ඉඩ තිබෙන හෙයින් වැටකොටු හොඳින් බැඳ ගැනීම මැනවි.

‘වෘශ්චික ධනු මකර කුම්භ - කොස් ඇට ලුණු නැතිව තම්බ' යයි ඉපැරණි ශ්ලෝකයක සඳහන් වේ. ඉතිරි ලග්න ටික මතක් කර ගැනීමට එය මහත් ප්‍රයෝජනවත් ය. 

සෙනසුරු මාරු වන්නේ වෘශ්චික රාශියට ය. ‘රුදුරු නුහුසුවන් වලගෙහි විස ය. නපුරු දුදනන්ගේ සියොළඟෙහි ම විස ය.' ඒ නිසා සෙනසුරා මනුස්ස රාශියක් වන කන්‍යා රාශියට මාරු වෙනවාට වඩා මේක හොඳ බව මගේ මතයයි. 

මේ කෑල්ල අපේ නිශාන්ත කුලරත්න සහෝදරයාගෙනි. 

මේ අනාවැකිවල මේ දවස්වල ජෝතිශයට වැදගත්ම දේ - ජනාධිපතිවරණෙ ගැන කියල නෑනෙ? මේං මගෙන් අනාවැකියක් “වෘෂභ රාශියේ සිටින ජනතාවට ලබන වසර ලබන තෙක් සිංහ රාශියේ ඉන්න ලැබෙනු ඇත."

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු. මෙම අඩවියේ සිදු වන සංවාද කඩාකප්පල් කිරීම සඳහා දරන කුමන්ත්‍රණකාරී උත්සාහයන් හෙළා දකිමු.