ද්විත්ව පුරවැසිභාවය

එජාප මන්ත්‍රී අජිත් පී. පෙරේරා පාර්ලිමේන්තුවේදී ද්විත්ව පුරවැසිභාවය ගැන කරන ප්‍රකාශය වැදගත් ය. 

වසර කීපයකට පෙර ලංකාවේ රජය ද්විත්ව පුරවැසිභාවය ලබා දීම අත්හිටවූයේ ය. එහි අරමුණ ලෙස හඳුනා ගත හැක්කේ ආණ්ඩුව දේශද්‍රෝහීන් ලෙස හඳුනා ගනු ලැබූ අය ආපසු ලංකාවේ පදිංචියට පැමිණීම වැළැක්වීමයි. 

ලංකාවේ පවතින ජීවන ගැටලු නිසා වඩා සුව පහසු ජීවිතයක් සොයා බොහෝ දෙනෙක් රටින් බැහැර යති. මෙය ඈත අතීතයේ සිට සිදු වූ සංක්‍රමණික ක්‍රියාවලියේ කොටසකි. 

වර්තමාන යුගයේදී බොහෝ ලාංකිකයන් රටින් පිටට සංක්‍රමණය වී පුරවැසිභාවය ලබා ගැනීම සඳහා භාවිතා කළේ පොලිසියෙන් හා හමුදාවෙන් ඔවුන්ට ජීවිත තර්ජන තිබේ ය යන තර්කයයි. අද පිට රට සිට සිංහ කොඩි ඔසවාගෙන රඟන බොහෝ දෙනෙක් ද ඒ රටවලට පැමිණියේ සිංහල හමුදාවෙන්, පොලිසියෙන් තර්ජන ඇති බව කියා ය. 

බටහිර රටකට සංක්‍රමණය වීමට තිබෙන පාරිභෝජනවාදී ආශාව කෙතරම් ගැඹුරු එකක් ද යන්න මා වටහා ගත්තේ මාක්ස්වාදීන් ඇසුරේ ය. ඇතැම් මාක්ස්වාදී වීරයන් බටහිර රටකට සංක්‍රමණය වීම පිණිස දැරූ අනතුර විස්මය ජනක ය. 

හිරු කණ්ඩායමේ එක් සාමාජිකයෙක් සියලු දේශපාලන කටයුතු පසෙක ලා සිය ව්‍යාපාර ද වසා පවුල පිටින් බටහිරට සංක්‍රමණය වීමට උත්සාහයක් දැරුවේ ය. එහෙත්, අවසානයේ ඔහු විශාල මුදලක් ද නැති කරගෙන විදේශගත වන්නට නො හැකිව අතරමං විය. ඉන් පසු ඔහු කළේ නැවතත් දේශපාලන කණ්ඩායම සමග සම්බන්ධ වී, මංගලලාගේ වෙබ් අඩවියක රැකියාව කර, එහි සංස්කාරක ලෙස ඔහුට තර්ජන ඇති බවට ව්‍යාජයක් මවා පා රට පැන ගැනීමයි. 

මෙම දේශපාලන කණ්ඩායමේ ම සිටි සාන්තුවරයින් දෙදෙනෙක් එක් අයෙකුගේ බෑණා කෙනෙකුට විදේශ රටක දේශපාලන රැකවරණ ලබා ගැනීම සඳහා ඔහු කිසිදා සහභාගි නොවූ උද්ඝෝෂණයක සිටින ආකාරය සහිත මුල පිටුවක් සහිතව ව්‍යාජ හිරු පත්තරයක් මුද්‍රණය කළ හ. 

නිදහස් මාධ්‍ය ව්‍යාපාරයේ අරමුදල් වංචා කළ සංගීතා වීරරත්නගේ පුවත්පතේ වැඩ කළ තවත් මාක්ස්වාදී වීරයෝ දෙදෙනෙක් ද මේ අන්දමින් ව්‍යාජ තර්ජන මවා පාමින් විදේශ රැකවරණ සොයා ගිය හ.

මා මේ සිද්ධි දෙක මතක් කරන්නේ අපට දේශපාලන සදාචාරය උගන්වන මාක්ස්වාදීන් පවා මේ කාරණයේදී කෙතරම් කුහක අන්දමින් හැසිරෙන්නේ ද යන්න පෙන්වා දීමටයි. 

සත්‍ය ජීවිත තර්ජන නිසා විදේශගත වූ විශාල පිරිසක් ද මේ අතර සිටිති. එහෙත්, එය රාජ්‍ය නොවන සංවිධාන විසින් පෙන්වා දෙන තරම් නො වේ. 

මේ අයට තමන් අපේක්ෂා කළ සුන්දර ලෝකයට පැන ගන්නට ලැබුණු පසු ඊළඟට ඇති වන ප්‍රශ්නය වන්නේ තමන් ලංකාවේ භුක්ති විඳි පිළිගැනීම එහි නොමැති වීමයි. එබැවින් ඔවුන් සිටින්නේ අන්තර්ජාලයෙන්, මුහුණු පොතෙන් ලංකාව දෙස බලාගෙන හූල්ල හූල්ලා ය. 

ලංකාවට පැමිණ මෙහි දුප්පත් ජනයා ඉදිරිපිට සංදර්ශනයක් පවත්වා නැවත විදේශගත වන්නට මොවුහු කැමති ය. ආණ්ඩුව අකුල් හෙළා තිබෙන්නේ ඒ ප්‍රයත්නයටයි. 

එහෙත්, ද්විත්ව පුරවැසිභාවය අපේක්ෂා කරන අය අතර, ලංකාවෙන් පිට වී ගිය වටිනාකමක් සහිත පුරවැසියෝ ද රැසක් සිටිති. 

ඔවුන් රටින් බැහැර වූ සංදර්භය කුමක් වුවත්, නැවත සියරට පැමිණ සේවය කිරීමේ අවංක කැමැත්තක් ඔවුන්ට තිබේ. මේ අය දැනටත් සිය ආදායමින් පංගුවක් ලංකාවට එවමින් මේ රටේ ආර්ථිකය පවත්වා ගෙන යාමට සුවිසල් දායකත්වයක් සපයති. 

එවැනි අය වෙනුවෙන් රජය යෝජනා කර තිබෙන ක්‍රමය අප්‍රමාණවත් බව අජිත් පී. පෙරේරා මන්ත්‍රීවරයා පෙන්වා දෙයි. රජය යෝජනා කරන්නේ තරුණයන්ට පමණක් වසර පහක කාලයක් සඳහා බලපත් ලබා දෙන ක්‍රමයක් බව ඔහු පවසයි. 

මෙතැන බරපතල කුහකකමක් ද තිබේ. මේ නීති සම්පාදනය කිරීමෙහි මූලිකත්වය ගන්නේ ද ගෝඨාභය රාජපක්ෂ හා බැසිල් රාජපක්ෂ වැනි ලංකාවේ හා ඇමරිකා එක්සත් ජනපදයේ ද්විත්ව පුරවැසිභාවය ඇති අයයි. ඔවුන් ද අද ඔවුන්ගේ වෛරයට පාත්‍ර වන අය මෙන් ම මේ රට එපා කියා දාලා ගිය අයයි. ඔවුන්ට නැවත ලංකාව ගැන ආදරයක් ඇති වුණේ සිය සහෝදරයා ජනාධිපති වූ පසු ය. 

ලංකාවේ පුරවැසිභාවය අතහැර දෑමූ සෙසු ලාංකිකයන්ට ද එසේ නැවත තම රට ගැන ආදරයක් ඇති වන්නට බැරි ද? 

රටට සේවය කරන්නට අවශ්‍ය නම් බලපත්‍ර ක්‍රමය වුණත් ප්‍රමාණවත් යයි තර්ක කරන්නට ද පුළුවන. 

එහෙත්, මේ පිරිස ඉල්ලා සිටින්නේ ගෝලීය පුරවැසිභාවය ආරක්ෂා කර ගනිමින් ලංකාවේ ද පූර්ණ පුරවැසිභාවය ලබා ගැනීමේ අයිතියයි. ඔවුන් කිසිවෙක් තමන්ගේ අලුත් රටේ පුරවැසිභාවය අතහැර දමා ලංකාවට එන්නට අදහස් කරනවා යයි මම නො සිතමි. ලංකාව තවමත් එතරම් ආරක්ෂිත සමාජයක් නො වේ. කිසියම් අවස්ථාවක රට හැර ගියා කියා ඔවුන් තමන් අයත් සමාජයකින් මුළුමනින් ම බැහැර කර දැමීම අපරාධයකි.

එසේම, ඔවුන්ට මේ රටට කළ හැකි සේවයක් තිබේ නම් එය කරන්නට අවස්ථාව ලබා දීම ද නරක දෙයක් නො වේ. 

ආණ්ඩුව බියපත් වන කාරණය වන ඔවුන්ගෙන් ඇතැමෙක් රටට ද්‍රෝහිකම් කිරීමට මේ අවස්ථාව පාවිච්චි කරයි ද යන කාරණය ගැන ද සැලකිලිමත් විය යුතු ය.



මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු. මෙම අඩවියේ සිදු වන සංවාද කඩාකප්පල් කිරීම සඳහා දරන කුමන්ත්‍රණකාරී උත්සාහයන් හෙළා දකිමු.