හදවතින් ම ශ්‍රී ලාංකික සුසන්තිකා

ඇතීනා

සුසන්තිකා ගමෙන් බිහි වූ දිරිය කාන්තාවකි. ඇගේ ධෛර්යය නිසා අපට කෙසේ හෝ ඔලිම්පික් පදක්කමක් ගැන ආඩම්බර වන්නට හැකි විය.

දරු පවුල ජීවත් කිරීම සඳහා ඒ ඔලිම්පික් පදක්කම වෙන්දේසි කරන බව සුසන්තිකා පවසා තිබේ.

සුසන්තිකාට වුණේ මොකක් ද?

සුසන්තිකාට නිකම් සිට මහජන මුදලින් පඩි ගන්නට ක්‍රීඩා අමාත්‍යාංශය මහජන මුදලින් රු. 60,000ක මාසික මුදලක් ගෙවනු ලැබේ. සුසන්තිකාට ඒ මදි බව පෙනේ.

මහින්දගේ කාලේ සුසන්තිකාට රු. 80,000ක වැටුපක් සමග වාහනයක් ද දී තිබිණි. එක අතකට එහෙම දුන්නාට කමක් නැත. ඔය අතන, මෙතන ක්‍රීඩාවේ නමින් පවත්වන සංදර්ශනවලට ජනාධිපති උපදේශක කෙනෙකු ලෙස සහභාගි වන්නට ඇයට එයින් හැකි විය.

සුසන්තිකා පෙන්නන්නට හදන්නේ ලංකාව සුසන්තිකාට ණයයි වගේ වුණාට, සුසන්තිකා ලංකාවේ රජයට ණය ය. තහනම් උත්තේජක සිද්ධිය වෙලාවේ ලංකාවේ රජය ඇය වෙනුවෙන් පෙනී සිටි දැඩි ස්වරූපය හා රජයක් එසේ කරන විට එයට සවන් නො දී සිටින්නට ජාත්‍යන්තර ක්‍රීඩා සංගම්වලට නො හැකි වීම නිසා නො වේ නම් සුසන්තිකා ඔලිම්පික් දුවලා හමාර ය. හමුදාවෙන් පළා ගිය චෝදනාවකට ද සුසන්තිකාට සමාව දුන් බවට මතකයක් තිබේ.

මේ කතාව මුත්තයියා මුරලිදරන්ට ද අදාළ ය. ශ්‍රී ලංකා රජය හා එවකට නායක අර්ජුන රණතුංග ඔහු වෙනුවෙන් පෙනී සිටි පෙනී සිටීම නො වී නම් මුත්තයියා මුරලිදරන් පන්දුව දමා ගසන්නකු ලෙස පමණක් ඉතිහාසගත වන්නට ඉඩ තිබිණි.

ලංකාවේ ක්‍රීඩා බලධාරීන් විසින් ක්‍රීඩාවට කර තිබෙන්නේ ඔන්න ඔය වගේ වැඩ මිසක, ලංකාවේ කිසිම ක්‍රීඩාවක් ජාත්‍යන්තර මට්ටමක නැත. ක්‍රිකට් වුණත් වෙනත් රටවල් නො ගහන තාක් කල් තමා ය.

ලංකාවේ ක්‍රීඩාවේ විනාශය පටන් ගන්නේ පහේ ශිෂ්‍යත්ව විභාගයෙනි. පාසල් ක්‍රීඩා යනු දෙකයි පනහේ සංදර්ශනයි. ඒවායේ ක්‍රීඩාවලට වඩා ඇත්තේ වැඩකට නැති සෝබන ය. උදාහරණයක් ලෙස ගම්වල පාසල් හා කලාප ස්පෝට්මීට් නම් උත්සවවල සංකේතාත්මකව පවත්වන ධාවන තරගවලටවත් බොහෝ විට සියලු නිවාසවලින් සහභාගි වන්නේ නැත. දුවන ළමයින්ට හරියට ඇඳුමක්වත් නැත. ඇතැම් ගැහැණු ළමයින් දුවන්නේ නැටුම් ඇඳුම් ඇඳලා ය. බොහෝ විට, ආරම්භය, අවසානය, යෂ්ටි මාරුව වැනි මූලික තාක්ෂණයන් පවා හරියට ප්‍ර‍දර්ශනය වන්නේ නැත. 

ඒ වුණාට මේවායේ මාර වැදගත්කමක් දෙන්න පට්ට ජෝක් ජවනිකාවක් තිබේ. ඒ ඇතීනා දෙව්දුව වැඩමවීම නම් ජවනිකාවයි. ටිකක් ලස්සන ගැහැනු ළමයකුට ඇතීනා ලෙස කොටහළු මඟුල්වලට අන්දන විදියේ දිග සිලික් ගවුමක් අන්දා, තව ගැහැණු ළමයින් ටිකක් පිරිවර සේ ඒ අයුරින් ම අන්දා, උන් සේර ම වස කැත වන සේ මේකප් තලි තලි උලා පිට්ටනියට ගොළුබෙලි ගමනින් වඩම්මන මේ ජවනිකාව පාසල් ක්‍රීඩාවල ක්‍රීඩාවලට වඩා වැදගත් වී තිබේ.

මේ ළඟදී දවසක මා දුටු කලාප ස්පෝට්මීට් එකක ඇතීනා වඩම්මන විට පසුබිමින් වාදනය කළේ ‘අනෝතත්ත විල නෙළුම නෙළාලා - පීරා වරලස මල් ගවසාලා - නාග ලොවින් බැස නාලිය ගමනින් - වරඟන පිරිවරිනා - එරන්දතිය එනවා' කියා ය.

ග්‍රීක මිථ්‍යා සාහිත්‍යය අනුව ඇතීනා යුද්ධෝපාය විශේෂඥභාවය හා කුසලතා වැනි කරුණු පිළිබඳ විශේෂ වන දෙවඟනකි. ඇය ලංකාවේ පාසල් ක්‍රීඩාවලට පැමිණ ඇත්තේ අන්ධානුකරණයෙනි. තමන් කරන්නේ කුමක්ද කියාවත් මේ සංකර ක්‍රීඩා නිලධාරියෝ නො දනිති.

මෙවැනි ස්පෝට්මීට් මිස ලංකාවේ බොහෝ රජයේ පාසල්වල එහෙමට ක්‍රීඩාවක් නැත. 

ජනාධිපති උපදේශක වුණා ය කියා මෙවැනි විසුළුසහගත තත්වයන් වෙනස් කරන්නට උපදෙස් දෙන්නට තරම් දැක්මක්, බුද්ධියක් සුසන්තිකාට නැත.

සුසන්තිකාට රජය මහජන මුදලින් දුන් දේවල් සුසන්තිකාට දැන් මතකත් නැත. ඇයට දුන් නිවස ඇය සිය සැමියාට ලියා දී ඇති බව ගිය අවුරුද්දේ ඇගේ සැමියා ඇයට පහර දී රෝහල්ගතව සිටියදී ඇය කීවා ය. ඒ දවස්වල ඇයට මෝටර් රථයක් පවා දුන් බව මතක ය.

සුසන්තිකා විදේශ රටකට ගොස් හොඳ පුහුණුවක් ලබා ගත්තා නම් ඇයට ජාත්‍යන්තර මට්ටමේ පුහුණුකාරියක වන්නට තිබිණි. එහෙත්, ඇයට අවශ්‍ය වුණේ එය නො වේ. ක්‍රීඩා අමාත්‍යාංශයේ නිලධාරිනියක වන්නට ය. එතනිනුත් නතර නො වී දේශපාලනයට ගොස් ක්‍රීඩා ඇමති වන්නට ය. ඒවා වැරදි යයි අපි නො කියමු. එහෙත්, ඔලිම්පික් දිනූ ඇය එහිදී අසාර්ථක ය. ඇයට ලැබුණු වරප්‍ර‍සාද පාවිච්චි කර හෝ ඇය කළ දෙයක් නැත.

රටට කීර්තියක් අත් කර දුන් අය පමණක් නො ව, ඔය ටෙලි නාට්‍යයක, චිත්‍ර‍ටයක රඟ පෑ අය පවා රජයෙන් ගෙවල්, වැඩ නො කර පඩි ගත හැකි තනතුරු, විශ්‍රාම වැටුප් ආදිය බලාපොරොත්තු වන අරුම පුදුම රටකි මේ සිරි ලංකාව.

තමන්ට පුළුවන් කාලේ හරිහම්බ කරන සල්ලිවලින් කා, බී, ජොලි කර, අඩු ගානේ සෞඛ්‍යය ගැනවත් නො සිතා කටයුතු කරන ජාතික වස්තු නඩත්තු කරන එක හැර වෙන වැඩ මේ රටේ මහජනතාවට තිබෙනවා ය.

ජාතික වස්තුවක මූලික ලක්ෂණය විය යුත්තේ වයසට යන විට රටට බරක් නො වන එක ය.

දැන් මෙය කියූ විට මෙහි පැමිණ දේශපාලකයන් ලබන වරප්‍ර‍සාද ගැන තර්ක කරන අයට අපට කීමට ඇත්තේ ඒවා ද අහෝසි කළ යුතු බවයි. සමස්තයක් ලෙස ම දේශපාලකයන් හා ආණ්ඩුව දුර්වල කළ යුතු ය. රජය විශාල නො කළ යුතු බව අප කියන්නේ ඒ නිසා ය. කළ යුතු වන්නේ රජය කාර්යක්ෂම කිරීමයි. රජය කාර්යක්ෂම වන තරමට දේශපාලකයන්ගේ වැදගත්කම වෙනස් වේ. 

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.