දීප්තී ගේ වාමාංශික ගැටය

ටෙරල් අබේසිංහ විසිනි

හිරු පුවත්පත ආර්ථික දුෂ්කරතා,  රටේ පැවති භායානක දේශපාලන තත්ත්වය, කණ්ඩායම තුළ පැවති අර්බුදයන්ද මධ්‍යයේ පවත්වාගෙන යන කල, ඉහත මාතෘකාව හා සමාන මාතෘකාවක් යටතේ ලිපියක් පල වු අතර එම මාතෘකාව පුවත්පතේ ප්‍රචාරණය සදහා පාවිච්චි කළ පොස්ටරයටද යෙදුහ. අලවිය පිලිබදව විශාල අර්බුදයක ගිලී සිටි සමයක වැඩිම අලෙවියක් වු කලාපය වුයේද මෙම කලාපයයි. ඒ සදහා යොදා ගත් මාතෘකාව මෙම අලෙවි වර්ධනයට එකම හේතුව විය.

ලිපියේ මාතෘකාව වුයේ "චම්පිකගේ දහම් ගැටය" යන්නයි. එයින් සාකච්ඡාවට බඳුන් කරනු ලැබුවෙ,  87-89 භීම සමයකින් පසුව රට තුළ පැවති දේශපාලන අවකාශය තුළ විශේෂයෙන් වාමාංශික හා ක්‍රම විරොධී දේශපාලන අවකාශය තුළ පැවති බල දේශපාලනය තුළ චම්පික රණවකගේ නායකත්වයෙන් යුතුව පැවති ජාතිකවාදී දේශපාලන ප්‍රවාහය හා විශාල ඝාතන  රැල්ලකට මුහුණ දීමෙන් පසු තම දේශපාලන භූමිය වෙත කොර ගසමින් පැමිණෙමින් සිටි ජවිපෙ අතර පැවති බල අරගලයේ දී චම්පික විසින් අනුගමනය කළ උපාය පිළිබඳවය. 

ච්ම්පික විසින් ජාතික වාදී සටන් පාඨ දිනෙන් දින ඔසවමින්, පැවති දේශපාලන අවකාශය පිරවු අතර, ජවිපෙ විසින් එය අභිබාවා යැමේ උපාය ලෙස තමන්ද තව තවත් ජාතිකවාදය වෙත වේගයෙන් ගමන් කිරීම ඇරඹීය. ලිපිය තුළින් එම අවස්තාව අර්ථකථනය කරනු ලැබුවේ ජවිපෙ,  චම්පිකව දකුනෙන් ඔවර්ටේක් කිරීමට උත්සාහ කරන බවත් එවිට චම්පික තව තවත් දකුණට තම වාහනය කපන බවත්, මේ හේතුවෙන් ජවිපෙ ට සිදුවනුයේ අන්ත දක්ෂිණාංශය දකවා ගමන් කිරිම පමණක් වන බවත්ය.

මෙම ලිපියට පරණ මාතෘකාව හා සමාන මාතෘකාවක් යෙදිමට හේතු වුයේ ලිපියක් ලිවිමෙන් පසු  මාතෘකාවක් යෙදීම අවශ්‍ය නිසා නොවේ. මාතෘකාවක් සදහා ලිපියක් ලිවූ නිසාය. මෙහිදී  X  කණ්ඩායම ( මෙම නම භාවිතා කරනුයේ 90 දශකයේ මුල් වකවානුවේ සිට 2004 දෙසැම්බර් 26 දක්වා කාලය සදහා පමණකි ) හෝ ශ්‍රි ලංකා පෙරටුගාමි පක්ෂය වෙනුවට "දීප්ති" යන නම භාවිතා කර්නුයේ මෙම නම් දෙකටම වැඩියෙන් දීප්ති කුමාර ගුණරත්න යන්න සමාජගත වී තිබිමත්, දීප්තිගේ දැඩි ග්‍රහණය එම කණ්ඩායම් දෙකේම දෘෂ්ඨිවාදයන් තුළ හොඳින් ම පිළිබිඹු වන බැවිනුත්ය.

90 දශකයේ සිට මේ දක්වා ලංකාවේ දේශපාලන ක්‍රියාවලිය පිලිබදව, විශේෂයෙන් වාමාංශික හා ක්‍රම විරොධී දේශපාලනය පිළිබඳව නැවත කියවිමකදි හිරු කණ්ඩායම, X කණ්ඩායම හා ශ්‍රි ලංකා පෙරටුගාමි පක්ෂය, ජවිපෙ හා LTTE පිළිබඳව ගැඹුරු සාකච්ඡාවක් කිරිම අත්‍යාවශ්‍ය ය.. එම කණ්ඩායම්, පක්ෂ හා සංවිධාන පිළිබඳව පුළුල් කියවිමකින් තොරව ලංකාවේ මේ මොහොතේ පවතින දේශපාලන තත්ත්වය පිළිබඳව ගැඹුරු අවබෝධයක් ලබා ගැනිම හා නව දැක්මක් නිර්මාණය කරගැනිම අපහසු වනු ඇත.

මෙහිදී මා ද නියොජනය කල හිරු කණ්ඩායම ගැන කතා කරනවා වෙනුවට වෙනත් කණ්ඩායමක් එනම් X කණ්ඩායම හා ශ්‍රි ලංකා පෙරටුගාමී පක්ෂය ගැන කතා කරණුයේ එම කණ්ඩායම විසින් මේ මොහොතේ ද ලංකාවේ දේශපාලනයට බලපානු ලබන ආකාර නිසාය. හිරු කණ්ඩායම පිළිබඳව මාගේ  අදහස් දැක් විම මේ මස අවසානයේ අවසන් වන එක්සත් ජාතීන්ගේ මානව හිමිකම් පිළිබඳව වු සැසිවාරයෙන් පසුව ලිවිමට බලාපොරොත්තු වෙමි.

90 දශකයේ ආරම්භය යනු ලංකාවේ නව වාමාංශික ව්‍යාපාරයක් ගොඩ නැගීමේ අදිටනෙන් විශාල තරුණ තරුණියන් කොටසක් බරපතල ලෙස වැඩ කරමින් සිටි කාල වකවානුවකි. එහි ප්‍රතිඵලයක් ලෙස "ලක්මිණ", "ලක්දිව" හා “හිරු“ පුවත්පත් එකකින් පසු එකක් ආකාරයෙන් ගොඩ න‍ැගෙන අතර එවකට පැවති පුළුල් කතිකාවේ ප්‍රතිඵලයක් ලෙස හිරු පුවත්පතේ කොගමක් ලිවිමට දීප්ති කුමාරටද අවස්ථාවක් ලැබුණි. එම අවස්ථාව ඔහු හට ලැබෙනුයේ පුවත්පත වෙනුවෙන් ඔහු සමග සම්බන්ධකම් පවැත්වු අය ගේ බලපැමටත් වඩා එහි අභ්‍යන්තරයේ සිටි පුළුල් කතිකාවක් තුළින් නව වාමාංශික ව්‍යාපාරයක් සදහා වෙහෙස දැරුවන්ගේ වෙහෙස නිසාය. දීප්ති කුමාරට, පුළුල් දේශපාලන අවකාශයකට ඇතුල් විමේ අවස්ථාව මින් විවර විය.

ඉන්පසු දීප්ති ඇතුළු කණ්ඩායම එවකට පැවති "මාතොට" සඟරාවේ කොටසක් තම අදහස් ප්‍රචාරනය සදහා යොදා ගන්නා අතර ටික කලකට පසු මුළු සඟරාවම  X කණ්ඩායමේ ප්‍රකාශනයක් බවට පත්විය. මුල් වකවානුව තුළ සමාජය විග්‍රහ කරණු ලැබු ඔහුගේ න්‍යාය වුයේ පශ්චාත් නුතනවාදයයි (ඇතැම් අවස්ථාවන්වලදී පශ්චාත් නුතන තත්ත්වය ලෙසද යොදා ගනු ලබනවා). මෙහිදි ඔවුන්ගේ ප්‍රධානම කාර්යය වුයේ එවකට සමාජය තුළ න්‍යායාත්මක හා මතවාදීවව අදහස් දක්වමින් සිටි වාමාංශිකයන් හා සමාජ ප්‍රජාතන්ත්‍රවාදීන් හට පෞද්ගලික ප්‍රහාරයන් එල්ල කරමින් නිහඬ කිරිමයි. මෙම නිහඬ කිරීමේ වාසිය අද දක්වාම භුක්තිවිදිමින් සිටිනුයේ ලාංකික වාමාංශික ව්‍යාපාරයවත් සමාජ ප්‍රජාතන්ත්‍රවාදී කතිකාවන්වත් නොව අන්ත ජාතිවාදයයි.

මොවුන්ගේ නිර්දය විවේචනයට භාජනය නොවු කණ්ඩායමක් වුවේනම් ඒ අන්ත ජාතිවාදී මතයන් දැරුවන් පමණි. මේ සඳහා ඔවුන් ගේ න්‍යායාත්මක විග්‍රහය වුයේ, පශ්චාත් නුතන තත්ත්වය යටතේ ජාතික වාදයන්ට තව දුරටත් වලංගුතාවක් නොමැති බැවින් ඒ වෙනුවෙන් වෙහෙසෙන්නන් හට සමාජ බලයක් බවට පත්විය නොහැකි බවත් ජාතිවාදයට විරුද්ධව ක්‍රියා කරනු ලබන වාමාංශිකයන් යැවිය යුත්තේ කටුගෙට බවත්ය. එයිනුද නොනැවතුන මොවුන් පැට්‍රික් ප්‍රනාන්දු වැනි තම ජිවිතයම වමේ ව්‍යාපාරය වෙනුවෙන් කැපකල අයව පවා "වාමාංශික මැට්ටන්" වශයෙන් නම් කරන ලදී. 

මැතකදි මොහුන්ගේ 3mana වෙබ් අඩවියෙන් අගය කල ජයදේව උයන්ගොඩ වැන්නන් හට එල්ලවුයේ තදබල ප්‍රහාරයන්ය. මෙම ප්‍රහාරයන් වනාහී කොහෙත්ම න්‍යායාත්මක නොවු අතර අතීශය පෞද්ගලික කරුණු පමණක් විය.

2003 ඔක්තොම්බර් 29 හා 30 යන දිනයන්හි හිරු කණ්ඩායම තවත් සංවිධාන හා කණ්ඩායම් සමග එක්ව සංවිධානය කරනු ලැබු සිංහල දෙමළ කලා උළලට හෙළ උරුමය ඇතුලු ජාතිවාදීන් විසින් එල්ල කල ප්‍රහාරය මොවුන්ගේ සඟරාව තුළින් හඳුන්වනු ලැබුවේ,  හිරු හිස්ටරික දේවාලයට හෙළ උරුමය විසින් ගඩොල් භාගයකින් පහර දුන් බවය. එම මාතෘකාව යටතේ කලා උළල විවේචනය කිරීමෙන් නොනැවතුන දීප්ති, කලා උළෙලට ආරක්ෂාව සදහා පැමිණි  X කණ්ඩායමත් සමග සමීප සම්බන්ධයක් පැවති තරුණයන් පිරිසටද තදබල ලෙස දෝෂාරෝපණය කර තිබිනි.

වරක් දියැස සඟරාව විසින් හිරු කණ්ඩායම සමග පවත්වනු ලැබු සම්මුඛ සාකාච්ඡාවකදි  X කණ්ඩායමේ න්‍යායන් හා භාවිතාවන් පිළිබඳව හිරු කණ්ඩායම විසින් කරන ලද විවේචනයට අදාලව, අදහස් දක්වනවා වෙනුවට ඔවුන් කර තිබුනේ හිරු කණ්ඩායමට ගේමක් දෙන ආකාරය ප්ලෑන් කිරීමයි. මෑතකදි රෝහිත භාෂණ සහෝදරයා යනුවෙන් හදුන්වා තිබුණු රෝහිත භාෂණව දීප්ති කුමාර විසින් ප්‍රසිද්ධියේ නම් කරනු ලැබුවේ අන්ත කුහකයකු ලෙසිනි. සති කිහිපයකට කලින් බාහු සහෝදරයා ලෙසින් ආමන්ත්‍රනය කර තිබු වික්‍රමබාහු කරුණාරත්න පිළිබඳව මොවුන්ගේ අදහසද මේ හා සමානම ය.

2009 වසර කඩ ඉමක් ලෙස සටහන් කලොත්,  X කණ්ඩායමේ හා ශ්‍රි ලංකා පෙරටුගාමි පක්ෂයේ  භාවිතය විසින් ලාංකික වාමාංශික ව්‍යාපාරයටද සමාජ ප්‍රජාතන්ත්‍රවාදී කතිකාවටද  කර ඇත්තේ විශාල හානියකි. ඔහුන්ගේ භාවිතය උපකාරී වී ඇත්තේ සිංහල සමාජය අන්ත ජාතිවාදය වෙත තල්ලු කිරීම සඳහා පමණකි. දෙමළ ජාතිය මුහුණදුන් හා අද මුහුණ දී සිටිනු ලබන තත්ත්වයට ජවිපෙ  මෙන්ම මොවුන්ද වග කිව යුතුය.

2009 න් පසු

2004දී X කණ්ඩායම තුළ වු බිඳී යාමෙන් පසු ශ්‍රී ලංකා පෙරටුගාමී පක්ෂය ලෙස පෙනි සිටින දීප්ති ඇතුළු කණ්ඩායම විශාල කාලයක්, තමන්ගෙන් වෙන්වී ගිය පිරිස වෙත කුණුහරුපයෙන් බැන වැදිමට යොදවනු ලබන අතර අනෙකුත් වාමාංශික කණ්ඩායම් බහුජන දේශපාලන කතිකාවට ඇතුළුවීම වැළැක්වීමටද උපරිමයෙන් කටයුතු කරමින් සිටියි. විශේෂයෙන් ජවිපෙන් වෙන් වු කණ්ඩායම කෙරෙහි මාරාන්තික වෛරයකින් කටයුතු කරනු ලබන ආකාරය හොදින්ම පැහැදිලි වේ. එය හුදෙක් ඔහුන් ගේ පක්ෂයේ නමට සමානම වු නමක් තෝරා ගැනීමේ හේතුව පමණක් නොවන බව සනාථ වනුයේ, එම කණ්ඩායම ජවිපෙ තුළින් “ජන අරගල කණ්ඩායම” ලෙස බිඳීගිය මොහොතේදීම දීප්ති කුමාර ප්‍රකාශ කරනු ලැබුයේ, මෙම වෙන්වු කණ්ඩායම සුළු ධනපති කණ්ඩායමක් බවත්, විප්ලවිය කණ්ඩායම වනුයේ ටිල්වින් සිල්වා සමග සිටින කණ්ඩායම බවත් ය. එයින්ද නොනැවතුනු දීප්ති කුමාර කියා සිටියේ "ටිල්වින් සහෝදරයා අප ඔබ සමගය කියාය".

එදා ජන අරගල කණ්ඩායමට විරුද්ධව ජවිපෙ සමග සහෝදරත්වයෙන් අත්වැල් බැද ගත් දීප්ති ඇතුළු කණ්ඩායම අනුර කුමාරගේ නායකත්වය යටතේ දැන් පවතින ජවිපෙ හට නිර්දය විවෙචනයක් ගෙන එයි. එදා සහෝදරත්වයෙන් බැදුනු ජවිපෙ ජාතිවාදී නැද්ද?  එදා සහෝදරත්වයේ දැත දිගු කල ජවිපෙ තුළ මේ ජාතිවාදී සුපර් ස්ටාර් සිටියේ නැද්ද?

දීප්ති ඇතුලු කණ්ඩායමේ මේ මොහොතේ උපාය වී තිබෙනුයේ, අනෙකුත් කණ්ඩායම්වලට බහු ජන දේශපාලනය වෙත ඒමේ මග ඇහිරවීමේ අදහසින් එදා චම්පික ජවිපෙ අන්ත දක්ෂිණාංශය දෙසට තල්ලු කළ උපායම යොදා ජාතිවාදී නොවන අනෙකුත් කණ්ඩායම් ආන්තික වමක් වෙත තල්ලු කරමින් සිටීමයි. සමාජවාදය වෙනුවෙන් හැර මේ මොහොතේ වෙන කිසියම් හෝ ප්‍රජාතන්ත්‍රවාදී අයිතිවාසිකමක් වෙනුවෙන් සටන් කිරිම තියා අදහසක් පළ කිරීමද ලිබරල්වාදී කුහකකමක් ලෙස හෙලා දකියි. ලිබරල් ප්‍රජාතන්ත්‍රවාදය යනු ළඟාකර නොගත යුතු සතුරෙක් ලෙස හඟවමින් ලිබරල්වාදය උතුරා හැලෙන අරුණි ශිපීරෝ ගේ ලිපි කිසිදු විවේචනයකින් තොරව පල කරණුයේ මන්ද?

ලිබරල්වාදී කතිකාව සමාජ ගත කිරිමේ අරමුණින්ද නැතහොත් දේශපාලන කතිකාව අවුල් කර දැමිමේ කූට උපායක් ලෙසද ?

X කණ්ඩායමේ සිට ශ්‍රී ලංකා පෙරටුගාමි පක්ෂය හරහා දීප්ති ඇතුලු කණ්ඩායමේ දේශපාලනය පිළිබඳව සරල හැදැරීමක් කරන කෙනෙකුට පෙනීයන කරුණ නම්, මෙම කණ්ඩායම ප්‍රතිගාමිත්වයට මිස සමාජ ප්‍රගමනයකට සේවය නොකරන බවයි. ඔවුන්ගේ දේශපාලනය HIV වෛරසය වැනිය, එය ක්‍රම විරෝධී දේශපාලන කණ්ඩායම් හා පුද්ගලයන්ගේ ශරිරයට ඇතුලු වී එහි ප්‍රතිශක්තිකරණය විනාශ කර දමමින් ප්‍රතිගාමිත්වයට පාර කපනු ලබයි.

(ටෙරල් අබේසිංහ හිරු කණ්ඩා‍යමේ සිටි ඉදිරිපෙළ ක්‍රියාකාරිකයෙකි.)

 

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න
Read in English blog.parakum.com