ගුවන් තොටුපළ දෙකක රඟ දැක්වුණ එක ම නාට්‍යයක ජවනිකා දෙකක්

2014දී කොළඹ පැවති සමුළුව විවෘත කරන්නට එන රාජපක්ෂ හා සිරිසේන 

ජාතිවාදීහු එකිනෙකාගෙන් යැපෙති. එකෙකුට අසීරු වූ විට අනෙකා වහා පිහිටට පැමිණේ. මතුපිටින් පරම සතුරන් ලෙස පෙනුණත්, ඔවුහු හැම විට ම මනා අවබෝධයකින් ක්‍රියා කරති. මෙය අද ඊයේ සිට සිදු වන්නක් නො වේ. 

අපි 2005 ජනාධිපතිවරණය මොහොතකට සලකා බලමු. ජනතා විමුක්ති පෙරමුණ සමග එක්ව සිංහල ජාතිවාදී පදනමින් තරග කළ මහින්ද රාජපක්ෂ වැඩි ඡන්ද දෙලක්ෂයකට අඩු ගණනකින් ජනාධිපතිවරණය ජය ගත්තේ දෙමළ ඊලාම් විමුක්ති කොටි සංවිධානය දෙමළ ජනතාව ඡන්ද වර්ජනයකට පෙළඹවූ නිසා ය. මතුපිටින් ප්‍රතිපක්ෂ ජාතිවාදීන් මේ අන්දමින් මනා අවබෝධයකින් කටයුතු කර තිබෙන ආකාරයට නිදසුන් ඕනෑ තරම් තිබේ. 

මැලේසියාවේ හා ශ්‍රී ලංකාවේ ගුවන් තොටුපළවල පැය කීපයක් අතරතුර රඟ දැක්වුණ නාටක දෙක තවත් මෙවැනි මනා අවබෝධයකින් රඟ දක්වන ලද ජවනිකා දෙකකි. සමස්ත මැලේසියානු නාටකය තුළ ම මේ අවබෝධය දක්නට ලැබේ. 

මේ අතර කටුනායක ගුවන් තොටුපළේ ජවනිකාව රහසිගත දේශපාලන මෙහෙයුමක ස්වරූපය සහිත ය.

මහින්ද රාජපක්ෂට 65වන ශ්‍රීලනිප සමුළුව මගහරින්නට උවමනාව තිබිණි. එසේම, ඔහු සමග මැලේසියා චාරිකාවට සහභාගි වූ අයට මහින්ද රාජපක්ෂගේ ජනප්‍රියත්වය අලෙවි කරගෙන තමන්ට ගොඩ යා හැකි දේශපාලන පක්ෂයක් හදා ගන්නට උවමනාව තිබේ. ඔවුන් මැලේසියා ගොස් හමු වූ අය ගැන විමසිලිමත් විය යුතු ය. මහින්ද රාජපක්ෂ මැලේසියානු ව්‍යාපාරික ප්‍රජාව හමු වූ බවක් ද කියැවේ. ඔහුගේ පවුලේ සාමාජිකයන්ට කළු සල්ලි චෝදනා නැගෙන සමයක මෙවැනි හමුවීම් පැවැත්වුණේ කුමට ද යන්න විමර්ශනය කළ යුතු ය. 

මහින්ද රාජපක්ෂ හා ඔහුගේ අන්තේවාසිකයන් මැලේසියානු චාරිකාවේදී කළේ කුමක් ද යන්න ඔවුන් පැහැදිලි කළ යුතු ය. 

මහින්ද රාජපක්ෂ ආසියානු දේශපාලන පක්ෂවල අන්තර්ජාතික සමුළුවට සහභාගි වීම ම ගැටලුවකි. ඔහු මේ වන විට කිසිදු දේශපාලන පක්ෂයක නායකයෙක් නො වේ. 2014 වසරේ ශ්‍රී ලංකාවේ පැවැත්වුණු ආසියානු දේශපාලන පක්ෂවල අන්තර්ජාතික සමුළුවේදී ඔහුට එම සංවිධානයේ සභාපතිකම හිමි වූ නිසා එය භාර දීමට ඔහු ඊළඟ සමුළුවට සහභාගි වූ බවක් මහින්ද රාජපක්ෂ ලෝලීහු පවසති. එහි එහෙම සභාපතිකමක් ගැන කිසිවක් එහි වෙබ් අඩවියේ සඳහන් වන්නේ නැත. එහි ස්ථාවර කාරක සභාවේ සාමාජිකයන් 37ක් අතර ශ්‍රී ලාංකිකයන් ලෙස සඳහන් වන්නේ ඩිලාන් පෙරේරාගේ හා දයා ගමගේගේ නම් ය. 


මෙම සංවිධානයේ වෙබ් අඩවිය අනුව, එහි සාමාජිකත්වය තිබෙන්නේ ශ්‍රීලනිප, එජාප, කොප, දෙජාස හා ප්‍රජාතන්ත්‍රවාදී ජාතික සන්ධානය යන පක්ෂවලට පමණි. 

සාමාන්‍යයෙන් ගත් විට මෙවැනි සංවිධානවලින් දේශපාලන පක්ෂවලට තිබෙන වාසිය වන්නේ ජාත්‍යන්තර සම්බන්ධතා ජාලයක් නඩත්තු කරන්නට අවස්ථාව ලැබීම හා දේශපාලකයන්ට ටුවර් ගහන්නට ලැබීමයි. මේ ටුවර් යන්නට වියදම් කරන්නේ පක්ෂවල අරමුදල් විය යුතු ය. මහජන මුදල් වියදම් කරන්නට හේතුවක් නැත. මන්ද, මේ වනාහි අන්තර් රාජ්‍ය සංවිධානයක් නො ව, අන්තර් දේශපාලන පක්ෂ සංවිධානයක් නිසා ය.  

සමස්තයක් ලෙස ගත් කල, මෙවැනි සංවිධානවලින් ලෝකයට ඇති ප්‍රයෝජනයක් නැති ය කීවාට වරදක් නැත. ඒවා නිකම් ජාත්‍යන්තර මෙව්වා ඒවා විතර ය. ජාත්‍යන්තර වුණා ය කියා කවුරුවත් මේවා සිරාවට ගත යුතු නැත. 

ලංකාවේත්, ලෝකයේත් තැන් තැන්වල ගිනි අවුළුවමින් ඇවිදින මහින්ද රාජපක්ෂ ලෝක සාමයට බාධාවකි. ඔහුගේ මෙම සංචාරයට මහජන මුදල් වියදම් කළා ද යන්න සොයා බැලිය යුතු ය. එසේම, ඔහු ශ්‍රී ලාංකික රාජ්‍ය ආරක්ෂාව ලබා ගන්නේ නම්, රජය ඔහුගේ අනවශ්‍ය ගමන් බිමන් පාලනය කළ යුතු ය. මන්ද, ඔහු වෙනුවෙන් වැය කරන මහජන මුදල් සම්බන්ධයෙන් රජය ජනතාවට වග කිව යුතු බැවිනි. 

කුමන හෝ පුද්ගලයෙකු රටකට ගොඩ බසින විට එම පුද්ගලයාට එරෙහිව දැවැන්ත විරෝධතා මතු වන්නේ නම්, එම පුද්ගලයා රට නියෝජනය කරන කිසිදු කාර්යයකට සහභාගි කර නො ගත යුතු ය. මන්ද, පුද්ගලයකු නිසා රටක් අනවශ්‍ය ප්‍රශ්නවලට මුහුණ දිය යුතු නැත. 

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.