ආනුෂාංගික පහසුකම්වලට මඩගැසීම

ගිය සතියේ අප සාකච්ඡා කළ, සිංහල දේශපාලන ශබ්දකෝෂයේ පවතින ඉංග්‍රීසි වචන අතරින් මග හැරුණු වැදගත්ම වචනයක් තමයි පාර්ලිමේන්තුව. එය කෙළින්ම ඉංග්‍රීසි parliament නම් වදනින් හදා ගත්ත සිංහල වචනයක්. එහි මුල් උච්චරණය පාලමන්ට් වුණත් ලාංකික ඉංග්‍රීසි උච්චාරණ විධිය අනුව එය පාලිමන්ට්. සිංහල වචනය පාර්ලිමේන්තුව. ඉන්දියාවේ නම් මේ වෙනුවෙන් ලෝක් සභා කියා වචනයක් තිබෙනවා.

පසුගිය දිනවල නිතර භවිතා වුණ අපභ්‍රංස වචනයක් තමයි ආනුෂාංගික පහසුකම් කියන එක. මෙය ප්‍රචලිත වුණේ කැසිනෝ සම්බන්ධ පනතත් එක්ක. අදාළ හෝටල් ව්‍යාපෘති සමග ආනුෂාංගික පහසුකම් කියා වචනයක් යෙදී තිබුණා. එහි තේරුම 'ඒ සමග යන' කියන එකයි. එයට සුදුසු පරිවර්තනයක් ලෙස මා හඳුනා ගත්තේ incidental කියන වචනයයි. ඒත‍්, අපේ පාඨකයෙක් පෙන්වා දුන්නා, පනතේ සිංහල පිටපතට අනුව අනුශාංගික පහසුකම් කියන්නේ associated facilities කියන එක බව. 

හුඟක් සිංහල පාරිභාෂික වචනවලට වඩා ඒවාට මුල් වුණ ඉංග්‍රීසි වචන තේරුම් ගන්න පහසුයි. මේ ප්‍රශ්නය ඇති වන්නේ වචන සම්පාදකයන් ව්‍යවහාරික භාෂාවට වඩා ආචීර්ණ කල්පික පාලි, සංස්කෘත වැනි භාෂාවන්ට වහල් වීම.

වචන හැදීම ගැන කතා කරනකොට සිහිපත් වෙන කෙනෙක් ඊලියන් ද සිල්වා. බ්ලොග් අවකාශයේ සුන්දර අඩවියක් වන කතන්දර බ්ලොගයේ ඊලියන් ද සිල්වා විසින් හදන ලද අදත් ව්‍යවහාර වෙන වචන ලැයිස්තුවක් පළ කරලා තිබුණා. ඊලියන් ද සිල්වා මැවිසුරුවෙක්. මැවිසුරු කියන්නේ ඉංජිනේරුවාට ඔහු හැදූ වචනය. ඒත්, එය නම් භාවිතයට ආවේ නැහැ. ඒත් ඉංග්‍රීසි වචන වෙනුවෙන් හදපු මේ සිංහල වචන නම් පංකාදුයි.

ගිලන්රිය (ambulance)
උපකරණය (apparatus)
ඇගැයීම (assesment)
පරමාණුව (atom)
මුඩුබිම (barren land)
සීනුව (bell)
අයපත (bill)
සිදුර (bore)
බුබුළ (bulb)
යල්පිනු (obsolete)
තෙල් පෙරනය (oil filter)
ඇණැවුම (order)
එළිමහන (outdoor)
තොරණ (Pandol)
පුවරුව (Panel)
සාදය (Party)
කණුව (Pole)
බලය (Power)
මුක්කුව (Prop)
වැසිකබාය (Raincoart)
ලදුපත (Receipt)
පිරිපහදුව(Refinery)
පිරිපැහැදුම (Refine)
තෙල් පිරිපහදුව (Oil refinery)
ගැමි (Rural)
කියත (Saw)
සේවාව (Service)
නිහඬ (Silent)
සවිය (Strength)
කුළු ගෙඩිය (Sledge hammer)
වානේ (Steel)
පටිය (Tape)
අකුණ (Thunder)
අවිය (Tool)
දඬුඅඬුව (Vice)
දියාරු (Watery)
රැළි (Wave)
තෙතමනය (Wetness).

කලින් ලිපිය හා සම්බන්ධව අපේ පාඨකයෙක් මෙහෙම ප්‍රශ්නයක් මතු කළා. “තවත් වචනයක් තමයි හොරිකඩයා. මට හිතා ගන්න බැහැ ඒ වචනය හැදී ඇති විදිය. අනිවාර්යයෙන්ම විදේශ භාෂාවකින් ආවක් නොවෙයි වගේ. ඔය වචනයේ මූලය කොහොම විය හැකිද?“ 

මේ ගැන එක්සත් අරා‍බි එමිරේට් රාජ්‍ය යේ සිට අපට කතා කළ මුස්ලිම් සහෝදරයෙක් කීවේ එම වචනය එක්තරා වාමාංශික නායකයකු විසින් සාදචන ලද්දක් බව ඔහු පුවත්පත් ලිපියක කියවා තිබුණු බවයි. ඒ කවුරුද කියා ඔහුට මතක තිබුණේ නැහැ.

කොංග්‍රසය, කොන්සල්වරයා, ගිලටීනය, පැකේජය, පැරෂූට්කාරයා, දිස්ත්‍රික්කය, රෙජිම, පිලිස්තීනුවා කියන වචනත් දේශපාලන වාක්කෝෂයට ඉංග්‍රීසියෙන් ආ වචන. 

මඩ කියන වචනය සිංහල භාෂාවට ආ කාල වකවානුව ගැන සොයා බැලිය යුතුයි. මඩ යන අරුත දෙන mud නම් ඉංග්‍රීසි වචනය මධ්‍ය කාලීන යුගයේදී ජර්මානු භාෂාවකින් ඉංග්‍රීසියට පැමිණි වචනයක් බව ශබ්දකෝෂවල සඳහන් වෙනවා. මඩ මතක් වුණේ දේශපාලනයේදී මඩ ගහනවා කියා යෙදුමක් තිබෙන නිසායි. 


මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු. Read in English blog.parakum.com