සිල්ලර කාසි ටෙලි නාට්‍යයෙන් නිරූපිත මධ්‍යම පංතික තෘෂ්ණාව

අවුරුදු බොහෝ ගණනකට පසුව ටෙලි නාට්‍යයක් බැලුවෙමි. ඒ සිල්ලර කාසි ය. 

පසුගියදා අවසන් වූ මෙම ටෙලි නාට්‍යය ඉතා වැදගත් විෂයක් සාකච්ඡා කළේ ය. ඒ වනාහි මේ වන විට ලංකාවේ සමාජය ඉහ වහා පැතිර තිබෙන ක්ෂණිකව සල්ලි හෙවීමේ හා අධි සුඛෝපභෝගී ජීවිත ගෙවීමේ තරුණ ආශාවයි. 

ඒ වෙනුවෙන් සල්ලි හොයන්නට දරණ උත්සාහයන් නිසා ඇත්තෙන් ම මෙම පරම්පරාවට ඔවුන් අපේක්ෂා කරන ජීවිත සතුට ලැබෙන්නේ නැත. ඒ වෙනුවට අතිශය ආතතික ජීවිත ගත කිරීමට ඔවුන්ට සිදු වී තිබේ. 

සිල්ලර කාසි ටෙලි නාට්‍යයේ ප්‍ර‍ධාන චරිත තුන වන නිකේත, මාරියෝ හා දර්ශන තිදෙනා හොර සල්ලි අච්චු ගසා ඉක්මණින් සල්ලි හොයන්නට දරන උත්සාහය හේතුවෙන් ඇති වන ගැටුම් ඇසුරින් මෙම සරළ ටෙලි නාට්‍යය නිර්මානය කර තිබේ. 

එහෙත්, එහි මෙම ධන තෘෂ්ණාව ග්‍ර‍හණය කර ගන්නේ පුද්ගල සුවිශේෂතාවන් ලෙස මිස සමස්ත සමාජයට ම අදාළ වන පොදු ප්‍ර‍වණතාවක් ලෙස නො වේ. මෙම චරිත තුන වටා සිටින සෙසු ප්‍ර‍ධාන චරිත සාන්තුවරුන්, සාන්තුවරියන් වැනි ධන තෘෂ්ණාවෙන් මිදුණු සාධු චරිත වේ. 

ටෙලි නාට්‍යය අවසාන ජවනිකාවේදී නිකේතගේ මුවට දී ඇති ආත්ම කථනයෙන් අවධාරණය කරන්නේ හොර සල්ලි අච්චු ගැසීමට ඇති වන පෙළඹීම කුඩා කල සිහිනයකින් මතු වූවක් බවයි. ටෙලි නාට්‍යයේ සංදර්භය තුළ එය ඇත්ත විය හැකි ය. මන්ද, ටෙලි නාට්‍යයේ ඔහු වටා සිටින සමීප චරිත කිසිවකින් ඔහුට පෙළඹවීමක් ඇති වන්නේ නැත. 

එහෙත්, ඇත්ත එය නො වේ. පුද්ගලයන් අධික ධන තෘෂ්ණාව වෙත තල්ලු කරන්නේ අවට සිටින සමාජයයි. සැමිය ණය කරන්නට බිරිඳ දායක වේ. දරුවෝ දායක වෙති. මව්පියන්ට ද අවශ්‍ය දරුවන් කුමන හෝ අන්දමකින් දියුණු වෙනවා බලන්නට ය. සමස්ත සමාජය ම තෘෂ්ණාභරිත ය. ආගම් ඒ තෘෂ්ණාව තව පෝෂණය කරයි.

මේ වනාහි ධනවාදය විසින් ප්‍ර‍වර්ධනය කරනු ලබන පාරිභෝජනවාදයේ හා සීමාන්තික උන්නතිකාමයේ ලක්ෂණයි.


ලංකාවේ ධනවාදය අසාර්ථක වීමට ප්‍ර‍ධාන හේතුවක් වන්නේ ද ලංකාවේ ධනේශ්වර ක්‍ර‍මය උර දරාගෙන යන මධ්‍යම පංතියට සිය අපේක්ෂාවන් ඉටු කර දීමට ධනවාදය අසමත් වීම ය. ලංකාවේ මධ්‍යම පංතියට මූලික වශයෙන් ම අවශ්‍ය වන්නේ අධි පාරිභෝජනවාදී ජීවන විලාසයක් පවත්වාගෙන යාමට අවශ්‍ය ආදායම් ය. ඒ වෙනුවෙන් අවම ශාරීරික ශ්‍ර‍මයක් පමණක් සැපයීමට ඔවුහු සූදානම් ය. සරළව කිව්වොත් ලංකාවේ මධ්‍යම පංතියට අවශ්‍ය අඩුවෙන් වැඩ කර වැඩියෙන් ආදායම් ඉපැයිය හැකි ක්‍ර‍මයි. ඔවුන් රජය වන්දනා කරමින් රජයේ සේවයට ලොල් වන්නේ ඒ නිසා ය.

මෙහිදී ලංකාවේ පරමාදර්ශී වෘත්තීන් කීපයක් ඔස්සේ මධ්‍යම පංතික සිහිනය තේරුම් ගත හැකි ය. ඒ වෛද්‍ය, නීතිඥ හා දේශපාලක යන වෘත්තීන් තුනයි. මේ තුනේ ම අපේක්ෂාවන් උතුරන්නට සල්ලි හම්බ කිරීමයි. එහිදී ඔවුන්ට වෙනත් කිසිදු වෘත්තීය හෝ සමාජ හෝ සාරධර්මයක් අදාළ වන්නේ නැත. 

මෙම වෘත්තීන් තුන එක් අතකින් ලංකාවේ පරමාදර්ශී රැකියා ද වේ. කවුරුත් අත්පත් කර ගැනීමට කැමති සමාජ තත්වයන් සහිත වෘත්තීන් වේ. ඒ හැර කුඩු විකිණීම, සල්ලි පොළියට දීම වැනි ජාවාරම් ද සමාජය ඉහ වහා ගොස් තිබේ. 

ලංකාවේ කම්කරු පංතියට ද ඇත්තේ මධ්‍යම පංතික අපේක්ෂා ය. සියලු දේශපාලන පක්ෂ විසින් ඔවුන් වෙත ප්‍ර‍වර්ධනය කර තිබෙන්නේ ද මධ්‍යම පංතික පරමාදර්ශයන් ය. සරළව කිවහොත්, ඔවුන්ගේ අපේක්ෂාව ද ජීවන හිනිපෙතේ ඉහළ පඩිය වන මධ්‍යම පංතියට නැග වැඩ නො කර වැඩි පඩි ගත හැකි ක්‍ර‍මයක් සොයා ගැනීමයි.

ලංකාවේ ධනවාදී ක්‍ර‍මය තුළ අද වන විට තිබෙන ප්‍ර‍ධාන ගැටලුව එහි ප්‍ර‍ධාන සමාජ පංතිය වන මධ්‍යම පංතියේ ජීවන පරමාදර්ශ නඩත්තු කිරීම සඳහා ප්‍රමාණවත් තරම් නිෂ්පාදනයක් කිරීමට රට අසමත් වීමයි. රාජ්‍ය අංශය සුවිසල් වෙමින් එහි අකාර්යක්ෂමතාව ඉහළ යන්නේ ද රට ණය උගුලක හිර වුණේ ද, දූෂණය ඉහ වහා ගියේ ද එහෙයිනි. සෙසු ආර්ථික ගැටලු ඇති කරනු ලබන්නේ එමගිනි. භෞතික යටිතලය සංවර්ධනය කිරීමට ද ජන ජීවිත හා ජීවනෝපායන් නගා සිටුවීම සඳහා ආයෝජනය කරන්නට බැරි වන්නේ ද, ඒ නිසා ය. කොටින් ම කියනවා නම් රටේ කාලකන්නිකමට ප්‍ර‍ධාන හේතුව මෙම මධ්‍යම පංතික අපේක්ෂා ය.

සිල්ලර කාසි මේ ප්‍ර‍ශ්නය ගැන ගැඹුරු විග්‍ර‍යක් නො වේ. නිකම් මතුපිටින් අතගෑමක් පමණි. එහෙත්, ඒ විෂය ගැන හිතන්නට යමක් එය අප හමුවේ තැබී ය.

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.