සුන්දර ඉංගිරිසි: කරවනැල්ලෙ ඉස්ටේසම ටිකට් දෙන - කොටියකුඹුරෙ ඉස්ටෝරුව බඩු කිරන

පාසලට එදිනෙදා කතා ව්‍යවහාරයේ තිබෙන ඉස්කෝලෙ කියන වචනය හැදුනෙ ඉංග්‍රීසි school නම් වදනින්. 

අපේ ගැමි දරුවන්ට මෙවැනි S ශබ්දයෙන් ආරම්භ වන ඉංග්‍රීසි වචන උච්චාරණය කිරීමේ ගැටලුවක් තිබෙනවා. ස්කූල් වෙනුවට ඉස්කූල් කියන්න ළමයින් පුරුදු වෙනවා. 

මෙයට හේතුව අපේ ඉංග්‍රීසි අධ්‍යාපනයේදී මුල පටන් ම උච්චාරණය ගැන දක්වන නො සැලකිල්ලයි. ඉංග්‍රීසි වචන උච්චාරණයේදී වචනය තුළ ශබ්දවලට බර තැබෙන ආකාරය ගැන සැලකිලිමත් වීම අත්‍යවශ්‍යයි. මෙයට ඉංග්‍රීසියෙන් stress කියනවා. සිංහලේ මෙවැනි දෙයක් නැහැ. 

මෙතැනදී ස්කූල් නම් වදනෙහි බර තැබිය යුත්තේ කූ යන ශබ්දයටයි. s ශබ්ද කළ යුත්තේ යන්තමින්. හරියට අර සැර හොද්දක් එක්ක පාන් කනකොට පාන් කැබැල්ල යන්තම් ගාවලා වගේ ගන්නේ. අන්න ඒ වගේ. අපේ ළමයි  s ශබ්දයට බර තබන්න ගිහින් වැරදි විදියට උච්චාරණය කරනවා. 

සිංහල භාෂාවේත් ස්මරණය, සමාරකය, ස්ථානය වැනි හල් සයන්නෙන් පටන් ගන්න වචන රැසක් තිබෙනවා. ඒවායේදී අපි හල් සයන්න බර කර ශබ්ද කරනවා. 

ඒ වගේම ඉංග්‍රීසි භාෂාවේ intonation කියා දෙයකුත් තිබෙනවා. එහිදී සලකා බැලෙන්නේ වාක්‍යය තුළ බර තැබෙන තැන් ගැනයි. අපි ඒ ගැන ගැඹුරින් සාකච්ඡා කරන්නේ නැහැ. එහෙත්, අපේ දරුවන්ට වරදින තවත් තැනක් තමයි වෙනත් වචනයකට පසුව s ශබ්දයෙන් ආරම්භ වන වචනයක් ශබ්ද කරන ආකාරය. මෙහිදී මුල් වචනයත් එක්කම  s ශබ්දයෙන් ආරම්භ වන වචනය ශබ්ද කළ යුතුයි. උදාහරණයක් ලෙස my school මයි ස්කූල් යනුවෙන් වචන දෙකක් ලෙස නොව මයිස්කූල් ලෙසින් එකට ශබ්ද කළ යුතුයි. මෙය නිවැරදිව උච්චාරණය නො කිරීම නිසාත් ස්කූල් ඉස්කූල් වෙනවා. 

මෙය මහ ලොකු ප්‍රශ්නයක් නො වුණත්, මෙතැන සමාජ ප්‍රශ්නයක් තිබෙනවා. ඒ තමයි උච්චාරණය අනුව ගමේ ඉංගිරිසියට ගැරහීම. ස්කූල් වෙනුවට ඉස්කූල් යයි කීම ශ්‍රී ලාංකික ඉංග්‍රීසිය ලෙස හඳුන්වන්න සමහරු උත්සාහ කරනවා. ඒත්, එවැනි වැරදි අපි ශ්‍රී ලාංකික ඉංග්‍රීසියේ උරුමයක් කර ගන්න අවශ්‍ය නැහැ.

මෙසේ s ශබ්දයෙන් ආරම්භ වන වචන රැසක් සිංහලයට හැරෙද්දී මුලට ඉයන්නක් එකතු කරගෙන තිබෙනවා. ඉස්ටූල් (stool), ඉස්තාලය (stable) උදාහරණ දෙකක්. ඉස්පිල්ලෙක (spill) යන වචනය භාවිතා වන්නේ වැව්වල වැඩි වතුර උතුරා යන්න සකසා තිබෙන අමුණටයි. ඉස්ටුව (stew) කියන්නේ හොද්දට. ඉස්කිරිම (screen) කියන්නේ තිරයකට. ඉස්ටේපර් කටු කියලා ජාතියකුත් තිබෙනවා. මේවාට ඉංග්‍රීසියෙන් කියන්නේ ස්ටේපල්ස් (staples) කියලායි. ඒවා ගහන යන්ත්‍රය ඉංග්‍රීසියෙන් හැඳින්වෙන්නේ ස්ටේප්ලර් (stapler) කියලායි. ඉස්ටීරියං වීල් කියන වදන වාහන සම්බන්ධයෙන් භාවිතා වෙනවා. මෙහි නිවැරදි වචනය ස්ටියරිං වීල් (steering wheel). ඉස්ටේසම, ඉස්ටෝරුව වැනි තත්භව වදන් ජනකවියක භාවිතා වන අන්දම බලන්න.

‘‘කරවනැල්ලෙ ඉස්ටේසම ටිකට් දෙන රුවන්වැල්ලෙ කන්තෝරුව ලියුම් දෙන කොටියකුඹුරෙ ඉස්ටෝරුව බඩු කිරන මාබෝගල පතලයි මම වැඩ කරන’’

සමහරු තමන් පාවිච්චි කරන මෙවැනි ඇතැම් සිංහල වචන වැරදියි කියලා හිතලා ඉංග්‍රීසි විදියට උච්චාරණය කරන්න යනවා. උදාහරණයක් ලෙස ඉස්කෝලය කියන වදන භාවිතාවේ තිබෙන සිංහල වචනයක්. එය ස්කෝලෙ කියලා නවීකරණය කරන්න අවශ්‍ය නැහැ. ඉස්පිරිතාලෙ කියන්නෙ හොස්පිටල් (hospital) කියන වදනේ තත්භව ස්වරූපයක්. අපි එය ස්පිරිතාලෙ කරන්න ඕනැ නැහැ. 

Spirit නම් ඉංග්‍රීසි වදන ඉස්ප්‍රීතු වගේ ම ස්ප්‍රීතු කියලාත් සිංහලේ භාවිතා වෙනවා. කසිප්පු පෙරද්දී ඉස්ප්‍රීතු ගැන කියනවා. ක්‍රිස්තියානි ආගමික වාංමාලාවේ ස්ප්‍රීතු සාන්තුවරයා ගැන සඳහන් වෙනවා. 

හැබැයි s ශබ්දයෙන් පටන් ගන්නා ඇතැම් වදන් වෙනස් ආකාරයට තත්භව ආකාරයෙන් සිංහලට එකතු වී තිබෙනවා. උදාහරණයක් ලොතරැයියට භාවිතා වන ස්වීප් ටිකට් කියන වදන. මේ නමින් චිත්‍රපටයකුත් තිබෙනවා. බොහෝ අය මේවාට කියන්නේ සුවිප් හෝ සුයිප් හෝ කියායි. Switch සුවිච් වෙන්නේත්, sweets සුවිට් කෑම වෙන්නේත් මේ විදියට ම තමයි. ඉස්පංචි සෑදී තිබෙන්නේ sponge නම් ඉංග්‍රීසි වදනින්. දැන් ඇතැමුන් මෙයට පංචි කියාත් ව්‍යවහාර කරන්න පටන් අරන් තිබෙනවා. ඔය බාස් උන්නැහේලා බිත්ති කපරාරු කරනකොට පංචි කෑලි භාවිතා කරනවා.

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.