හොස්නි මුබාරක්, චාල්ස් ටේලර් සිපිරි ගෙට යැවූ ලෝක නීතිය හා සදාචාරය

ඊජිප්තු ජනාධිපති හොස්නි මුබාරක් ජීවිතාන්තය දක්වා සිරගත කිරීමට එරට අධිකරණය තීරණය කර තිබේ.


ඔහු සමග ඔහුගේ අභ්‍යන්තර ආරක්ෂක ඇමතිවරයා ද ජීවිතාන්තය දක්වා සිර ගෙට නියම වී සිටිති.


ඒ 2011 වසරේ ඔවුන්ගේ රජයට එරෙහිව පැවති උද්ඝෝෂණවලදී වෙඩි තබා මහජනතාව ඝාතනය කිරීමට පියවර ගැනීමේ වරදට ය.


සියේරා ලියෝන්හි 1991 වසරේ සිට 2009 තෙක් කාලයේ පැවැති සිවිල් යුද්ධයේදී දියමන්ති හිලව්වට එරට කැරැලිකරුවන්ට අවි ආයුධ සපයා දී, මහා පරිමාණයේ මිනිස් ඝාතන සිදු කිරීමට අනුබල දීමේ චෝදනා මත, ලයිබීරියාවේ හිටපු ජනාධිපති චාල්ස් ටේලර්ට 50 වසරක සිර දඬුවමක් නෙදර්ලන්තයේ එක්සත් ජාතීන්ගේ යුද අපරාධ අධිකරණය විසින් පනවනු ලැබුවේ පසුගිය 30දා ය. 


ලෝක නීතිය හා සදාචාරය අනුව, කුමන තත්වයක් යටතේ හෝ රටක ජනතාව මරා දැමීමට හා පොදු සම්පත් සොරකම් කිරීමට ඒ රටේ හෝ වෙනත් රටක පාලකයන්ට අයිතියක් නැත. එය ඇමරිකාව වැනි බලවත් රටවලට මෙන් ම ලයිබීරියාව වැනි දිළිඳු රටවලට ද පොදුවේ ක්‍රියාත්මක විය යුතු ය. ඇමරිකාවට එරෙහිව නීතිය ක්‍රියාත්මක නො වුණා ය කියා වෙනත් රටවල පාලකයන්ට ද එවැනි අපරාධ සම්බන්ධයෙන් මුක්තිය ලබා ගැනීමට අයිතියක් නිර්මානය නො වේ. 


දුබල රටවලට ලෝක නීතියට බලවත් රටවල් අවනත කර ගැනීමට හැකි වන්නේ තම අවකාශය තුළ ලෝක නීතියට ගරු කෙරෙන තත්වයක් නිර්මානය කිරීමෙනි. 


ඒ අතින් ඊජිප්තුව හා ලයිබීරියාව වැනි රටවල හිටපු පාලකයන් සම්බන්ධයෙන් ගන්නා ලද පියවර යහපත් ලෝකයක් වෙනුවෙන් ගැනුණු ඉදිරි පියවර ලෙස සැලකිය යුතු ය.


තම පාලනයට යටත් වැසියන් මරා දැමීමේ හා මහජන දේපල කොල්ල කා සැප විඳීමේ හිමිකමක් රාජ්‍ය පාලකයනට හා ඔවුන්ගේ පවුල්වලට ඇති ය යන අදහසක් විශේෂයෙන් ම ලෝකයේ දිළිඳු ම රටවල පාලකයන් අතර තහවුරු වෙමින් තිබේ. 


ඔවුන් සිය ක්‍රියා සාධාරණීකරණය කර ගන්නේ එවැනි ක්‍රියාවල යෙදෙන බලවතුන්ට මුවා වෙමිනි. විශේෂයෙන් ම ඇමරිකාව ප්‍රමුඛ බටහිර රටවල් බින් ලාඩන්ගේ ත්‍රස්තවාදය ඔස්සේ ලෝක නීතිය හා සදාචාරය පිළිබඳ සම්මතයන් බිඳ දැමූ අතර එයට මුවා වෙමින් දිළිඳු රටවල පාලකයන් කරන්නේ එම ක්‍රමවේද හා උපාය භාවිතා කරමින් තමන්ගේ ම යටත්වැසියන් මරා දැමීමයි. 


මෙය වහා නතර විය යුතු ය. ලෝක නීතිය හා සදාචාරය යළි ස්ථාපිත විය යුතු ය. සියලු මිනීමරු හා දූෂිත පාලකයෝ දඬුවම් ලැබිය යුත්තා හ. 

මේ ලිපියට ඔබ කැමති නම් වෙන අයත් එක්කත් බෙදා ගන්න