2014-02-28

ඉන්දියාවේ 29වන ප්‍රාන්තය තෙලන්ගානා නමින් බිහි වෙන වගයි

ඉන්දියාවේ දකුණු දිග ද්‍රවිඩ ප්‍රාන්ත රාජ්‍ය හතරෙන් එකක් තමයි ආන්ද්‍රා ප්‍රදේශ්. ආන්ද්‍රා කියන්නේ ලංකාවේ ජන වහරටත් සම්බන්ධ ප්‍රදේශයක්. අන්ඩර දෙමළ කියන වචනය බිඳී ඇවිත් තිබෙන්නේ ආන්ද්‍රා දෙමළ යන යෙදුමෙන් ය කියා කියනවා.

අනෙක් ද්‍රවිඩ රාජ්‍ය තුන තමයි, තමිල්නාඩුව, කේරළය හා කර්නාටකය.

ආන්ද්‍රා දෙමළ කියා හඳුන්වන්නට පුළුවන් භාෂාව වන්නේ තෙළිඟු බසයි. ලංකාවේ අහිගුණ්ඨික මිනිස්සු කතා කරන භාෂාවත් තෙළිඟු මුලයක් සහිත යයි විශ්වාස කරනවා.

තෙලන්ගානා කියන්නේ ආන්ද්‍රා ප්‍රදේශ් ප්‍රාන්ත රාජ්‍යයට අයත් කලාප තුනෙන් එකක්. අනෙක් කලාප දෙක තමයි, වෙරළබඩ ආන්ද්‍රා හා රයලසීමා කලාප. 1950 දශකයේදී ඉන්දියාවේ ප්‍රාන්ත රාජ්‍ය ගොඩනැගීමේ ක්‍රියාවලියේදී ආන්ද්‍රා ප්‍රදේශ් ප්‍රාන්තය ගොඩනැගුවේ කලින් තිබුණු ආන්ද්‍රා රාජ්‍යය හා කලින් පැවති හයිද්‍රාබාද් රාජ්‍යයේ තෙළිඟු බස කතා කරන ජනතාව ජීවත් වන ප්‍රදේශ එකට යා කරලායි.

ඉන්දියාව නිදහස් රාජ්‍යයක් වන්නට කලින් තෙලන්ගානා අයත් වුණේ මුස්ලිම් නිසාම්වරුන් විසින් පාලනය කරන ලද හයිද්‍රාබාද් රාජ්‍යයටයි. නිදහස ලබද්දී මුලින් හයිද්‍රාබාද් නිසාම් පාලකයා ඉන්දීය සංගමයට එක් නො වී නිදහස්ව සිටින්නට උත්සාහ කළත් පසුව ඉන්දීය රජය එම කොටස ඉන්දියාවට බලෙන් සම්බන්ධ කරගත්තා. තෙලන්ගානාව ආන්ද්‍රා ප්‍රදේශ් ප්‍රාන්ත රාජ්‍යයට යා කිරීම මුල සිට ම මතභේදයට තුඩු දුන් කාරණයක් වුණා. 

තෙලන්ගානාවේ ඉතිහාසය තුළ ‍ඉන්දීය කොමියුනිස්ට් පක්ෂය විසින් මෙහෙයවන ලද ගැමි ගොවි කැරැල්ලක් පිළිබඳවත් සඳහන් වෙනවා. 1946 සිට 51 දක්වා දිග්ගැසුණු මෙම ගැමි ගොවි කැරැල්ලේ අරමුණ ඉඩම් හිමියන් වෙතින් ගොවියන් වෙත ඉඩම් අයිතිය ලබා ගැනීමයි. ගොවියන් 4000ක් පමණ දිවි පිදූ මේ කැරැල්ලේදී ගම් 3000ක් විතර නිදහස් කර ගත්තා. ගොවියෝ මේ ගම්වල සමාජවාදී කොමියුන පවා පිහිටුවා ගත්තා. ඉඩම් හිමියන්ට එරෙහිව ඇරඹුණු මෙම කැරැල්ල පසුව පාලක නිසාම්වරයාටත් එරෙහි අරගලයක් බවට පත් වුණා. ඉන්දීය කොමියුනිස්ට් පක්ෂයේ ගරිල්ලා හමුදා මේ අරගලයට නායකත්වය දුන්නා. 

ඉන්දීය ආණ්ඩුව නිසාම්වරුන්ට එරෙහි යුද ක්‍රියාමාර්ගයක් ඔස්සේ හයිද්‍රාබාද් රාජ්‍යය ඉන්දීය සංගමයට සම්බන්ධ කර ගැනීමේ මෙහෙයුමක් දියත් කළේත් මේ කාලයේමයි. 1948දී හයිද්‍රාබාද් රාජ්‍යය ඉන්දීය සංගමයට සම්බන්ධ කර ගැනුණා. එහිදීත් දස දහස් ගණනක් මිනිස්සු මිය ගියා. එයින් බහුතරය නිසාම්වරයාට පක්ෂ මුස්ලිම්වරු. තෙලෙන්ගානා කැරැල්ලේ ප්‍රතිඵලයක් ලෙස, ආන්ද්‍රා ප්‍රදේශ් ආණ්ඩුව ඉඩම් ප්‍රතිසංස්කරණ සඳහා යම් යම් ක්‍රියාමාර්ග ගත්තා.

තෙලන්ගානාව ලංකාවට වඩා ලොකු භූමි භාගයක්. එහි වර්ග ප්‍රමාණය වර්ග කිලෝ මීටර් 114,840ක්. ජනගහණය තුන්කෝටි පනස් ලක්ෂයකට වැඩියි. ආන්ද්‍රා ප්‍රදේශ් කලාප තුනෙන් වැඩි ම භූමි ප්‍රමාණයක් හා ජනගහණයක් හිමි තෙලෙන්ගානාවටයි. තෙලන්ගානාව වියළි උණුසුම් දේශගුණයක් තිබෙන ප්‍රදේශයක්. එහි ඉඩම්වලින් වැඩි හරියක් වැසි ජලයෙන් පෝෂණය වන ඒවායි. තෙලන්ගානාහි ප්‍රධාන වගාවන් වන්නේ කපු, වී හා බඩඉරිඟුයි. ස්වාධීන ප්‍රාන්ත රාජ්‍යයක් වූ පසු තෙලන්ගානාවේ ආර්ථික බලාපොරොත්තු තබා තිබෙන්නේ තොරතුරු තාක්ෂණය හා බෙහෙත් නිෂ්පාදනය සම්බන්ධයෙනුයි.

තෙලෙන්ගානාව ආන්ද්‍රා ප්‍රදේශ් රාජ්‍යයෙන් වෙන් විය යුතු ය යන මතය ප්‍රවර්ධනය කළ අයගේ මූලික තර්කය වුණේ ආන්ද්‍රා ප්‍රදේශ්හි සෙසු කොටස් දෙකට සාපේක්ෂව තෙලන්ගානාවට ප්‍රාන්ත රාජ්‍යය තුළ සම තැන නො ලැබුණ බවයි. ආන්ද්‍රා ප්‍රදේශ්හි කලාප තුනෙන් විශාලම එක වූ තෙලන්ගානාව රාජ්‍ය ආදායමෙන් 76%කටම දායක වුණා. ආන්ද්‍රා ප්‍රදේශ් හරහා ගලන ක්‍රිෂ්ණා ග‍ඟේ ජල පෝෂක ප්‍රදේශවලින් 68.5%ක් ද ගෝදාවරී ග‍ඟේ ජල පෝෂක ප්‍රදේශවලින් 69%ක් ද පිහිටා තිබෙන්නේ තෙලන්ගානාවේ. ඒත් ජලය, අයවැය ප්‍රතිපාදන, රැකියා ආදිය බෙදා දීමේදී තෙලන්ගානාවට අසාධාරණයක් සිදු වන බවයි, තෙලන්ගානාව නිදහස් ප්‍රාන්තයක් බවට පත් කර ගත යුතුයි කියා අරගල කළ ජනයාගේ දුක්ගැනවිල්ල වුණේ.


නිදසුනක් ලෙස ආන්ද්‍රා ප්‍රදේශ් රජයේ සේවකයන් අතර තෙලන්ගානා වැසියන් සිටින්නේ 20%ක් පමණක් බව මේ ප්‍රශ්නය ගැන ලියන මහාචාර්ය ජයශංකර් පවසනවා. ඔහු පෙන්වා දෙන පරිදි තෙලන්ගානා වැසියන් විසින් ආන්ද්‍රා ප්‍රදේශ් රාජ්‍යයේ මහ ඇමති පදවිය හොබවා තිබෙන්නේ පනස් වසරක ඉතිහාසය තුළ වසර හයහමාරක කාලයක් පමණයි. ඒත්, අනෙක් කලාප දෙක වන රයලසීමාහි වැසියන් වසර 27ක් ද, වෙරළබඩ ආන්ද්‍රා ප්‍රදේශ් කලාපයේ වැසියන් 24 වසරක් ද අන්ද්‍රා ප්‍රදේශ් මහ ඇමති පදවිය දරා තිබෙනවා. 

තෙලන්ගානා නිදහස වෙනුවෙන් අරගල කළ ක්‍රියාධරයන් පෙන්වා දුන්නේ වසර පනහක් තිස්සේ ම මෙම අසාධාරණයන් දුරලීම සඳහා ගත් ක්‍රියාමාර්ග අසාර්ථක වූ බවයි. එහි ප්‍රතිඵලයක් ලෙස තෙලන්ගානාව පසුගාමී තත්වයක තිබෙන බවත්, ස්වාධීන ප්‍රාන්ත රාජ්‍යයක් බවට පත් වු‍ණහොත් තමන්ගේ ප්‍රදේශය සංවර්ධනය කර ගැනීම සඳහා වැඩි අවස්ථාවක් ලැබෙන බවත් ඔවුහු තර්ක කරනවා. 

තෙලන්ගානා වැසියන්ගේ දේශපාලන හිමිකම් වෙනුවෙන් දියත් වූ තෙලන්ගානා රාෂ්ට්‍ර සමිතියේ නායත්වයෙන් යුත් ව්‍යාපාරය තුළ 2010 සිට 2012 දක්වා කාලය තුළ තරුණ මිනිසුන් 300ක් පමණ සිය දිවි නසාගෙන තිබෙනවා. ඉන් 16දෙනෙක් සිරුරට ගිනි තබාගෙන සිය දිවි නසා ගත්තා. තෙලන්ගානා සටන සිවිල් නීති කඩ කිරීමේ ව්‍යාපාර,සහයෝගය නො දීමේ ව්‍යාපාර, වර්ජන ආදියෙන් සමන්විත දිග්ගැසුණු අරගලයක්. ඒත්, එහි සන්නද්ධ අරගලයක් තිබුණේ නැහැ. කුල පීඩනයට එරෙහිව සටන් කරන දලිත් ජනයාත් මෙම අරගලය තුළ ක්‍රියාකාරීව සිටියා. මෙම ප්‍රශ්නයට තිරසාර විසඳුමක් ලෙස සමාජ ක්‍රමයේ වෙනසක් යෝජනා කළ සමාජවාදීහු ද මේ අරගලයේ සිටියා.

2013 ජුලි 30දා පාලන කොංග්‍රස් පක්ෂයේ කෘත්‍යාධිකාරී කමිටුව තෙලන්ගානාව ආන්ද්‍රා ප්‍රදේශ් රාජ්‍යයෙන් ස්වාධීන ප්‍රාන්ත රාජ්‍යයක් බවට පත් කළ යුතු යයි මධ්‍යම රජයට යෝජනා කරන්නට නිර්දේශ කළා. 2013 ඔක්තෝබර් 03දා මධ්‍යම ආණ්ඩුවේ කැබිනට් මණ්ඩලය තෙලන්ගානාව ස්වාධීන ප්‍රාන්ත රාජ්‍යයක් බවට පත් කිරීමේ යෝජනාව සම්මත කළා. ඒ අනුව තෙලන්ගානාව ඉන්දියාවේ 29වන ප්‍රාන්ත රාජ්‍යය බවට පත් වෙනවා. 2013 දෙසැම්බර් 11දා, ඉන්දීය මධ්‍යම ආණ්ඩුව තෙලන්ගානා පනත් කෙටුම්පත ආන්ද්‍රා ප්‍රදේශ් රාජ්‍ය සභාවට යොමු කළේ ඒ පිළිබඳ සභාවේ අදහස් ලබා ගන්නටයි. ඉන්දීය ව්‍යවස්ථාව අනුව, නව ප්‍රාන්ත රාජ්‍ය හා ස්වාධීන ප්‍රදේශ නිර්මානය කිරීමේ බලය හිමි වන්නේ මධ්‍යම ආණ්ඩුවටයි. තෙලන්ගානාව නිදහස් ප්‍රාන්තයක් බවට පත් කිරීමේ මධ්‍යම ආණ්ඩුවේ යෝජනාව ක්‍රියාත්මක කරන්නට ප්‍රාන්ත රාජ්‍ය සභාවේ අනුමැතිය අවශ්‍ය නැහැ. 


2014 පෙබරවාරි 18දා තෙලන්ගානා පනත ඉන්දීය පාර්ලිමේන්තුව වන ලෝක් සභාවේ සම්මත වුණා.  ඒ සඳහා කොංග්‍රස් ආණ්ඩුවට භාරතීය ජනතා පක්ෂයේ ද සහයෝගය ලැබුණා. පෙබරවාරි 20දා එය රාජ්‍ය සභාවේ සම්මත වුණා. පනත ජනාධිපති විසින් අනුමත කර ගැසට් කිරීමෙන් පසුව තෙලන්ගානාව නිදහස් ප්‍රාන්ත රාජ්‍යයක් බවට පත් වෙනවා.තෙලන්ගානා ප්‍රාන්ත රාජ්‍යය පිහිටුවන දිනය ඉන්දීය මධ්‍යම ආණ්ඩුව තවම තීරණය කරලා නැහැ. ප්‍රාන්ත රාජ්‍ය දෙක අතරේ බලතල, සම්පත් ආදිය බෙදා ගැනීමේ සංකීර්ණ කාර්යයක් මධ්‍යම ආණ්ඩුුව ඉදිරියේ තිබෙනවා.


පැරණි ආන්ද්‍රා ප්‍රදේශ්හි ප්‍රධාන නගර දෙක තමයි, හයිද්‍රාබාද් හා විසාකාපට්නම්. තෙලන්ගානාවෙන් වෙන් වුණ අලුත් සීමාන්ද්‍රා ප්‍රාන්ත රාජ්‍යයට අගනුවරක් නිර්මානය කරගන්නා තෙක් වසර 10ක කාලයක් ‍හයිද්‍රාබාදය මේ ප්‍රාන්ත රාජ්‍ය දෙකේ ම පොදු අගනගර‍ය ලෙස පවතීවි. 

අලුත් තෙලන්ගානා ප්‍රාන්ත රාජ්‍යය 84%ක් හින්දු බහුතරයකින් සමන්විත රාජ්‍යයක්. ප්‍රධාන සුළු ජනවර්ගය වන්නේ 12.4%ක් වන මුස්ලිම්වරුයි. එහි ප්‍රධාන භාෂාව වන්නේ ජනගහණයෙන් 76%ක් දෙනාගේ භාෂාව වන තෙළිඟු බසයි. මුස්ලිම් අය අතර උර්දු බස භාවිතා වෙනවා. 

තෙලන්ගානාව නිදහස් ප්‍රාන්ත රාජ්‍යයක් බවට පත් කිරීමට එරෙහි සීමාන්ද්‍රා දේශපාලන ව්‍යාපාර තෙලන්ගානා ප්‍රශ්නය ඉන්දීය ශ්‍රේෂ්ඨාධිකරණය වෙත ගෙන යන්නට උත්සාහ කරනවා.

තෙලන්ගානා ප්‍රශ්නය ධනවාදය විසින් නිර්මානය කර තිබෙන විෂමතාවන්ට එරෙහි ලෝක ප්‍රජාතන්ත්‍රවාදී අරගලයේ කොටසක් ලෙස ඉන්දියාවේ වාමාංශික සිවිල් සමාජ කණ්ඩායම් විසින් අර්ථකථනය කර තිබෙනවා.

ඒත්, ගතානුගතික මාක්ස්වාදී කොමියුනිස්ට් පක්ෂය මේ පිළිබඳව දරන ස්ථාවරය වෙනස් එකක්. ඔවුන් කියන්නේ ‍තෙලන්ගානා නිදහස විසින් ඉන්දියාව පුරාම බෙදුම්වාදී රැල්ලක් ඇති කරාවි ය කියායි. ඒත්, සුභාෂ් චන්ද්‍රබෝෂ් අනුගමනය කරන ෆෝවර්ඩ් බ්ලොක් නම් වාම ජාතිකවාදී සංවිධානය නම් කියන්නේ මෙවැනි කුඩා රාජ්‍යවල ඉල්ලීම් පිළිබඳ සොයා බලා ඒවාට තිරසාර විසඳුම් ලබා දීම සඳහා නැවත වතාවක් රාජ්‍ය ප්‍රතිසංවිධානය කිරීමේ කමිටුවක් පත් කළ යුතුව තිබෙන බවයි.

(ජනරළ පුවත්පත වෙනුවෙන් ලියන ලදී)

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න
Read in English blog.parakum.com