සයිටම් ජනසතු නො කරනු! දොස්තර සංගමයට දෙනු!

ලාංකීය අවස්ථාවාදී විප්ලවයේ නියමුවා පාදෙනිය

සයිටම් ආයතනය රජයට පවරා ගත යුතු බව කියමින් දොස්තර සංගමය රජයේ විසඳුම් යෝජනා ප්‍ර‍තික්ෂේප කර ඇත. ඉදිරියේදී බදු ගෙවන ජනතාවට තව තවත් වධ දෙන ත්‍ර‍ස්ත ක්‍රියාවල නියැලෙන බවට ද තර්ජනය කර තිබේ.

අහක යන සයිටමයක් රජයට පවරාගෙන එය නඩත්තු කිරීමට තව තවත් මහජනයා බදු ගෙවිය යුතු ය යන යෝජනාව අපූරු එකකි.

රටේ තියෙන මළහත්තිලව් තව තවත් රජයට පවරා ගන්නට පෙර රජය යටතේ තිබෙන මළහත්තිලව් ටික හරියට පවත්වාගෙන යනවා ද යන්න මුලින් සොයා බැලිය යුතු ය.

මූලිකව ම මෙන්න මේ කාරණය බලන්න. ලංකාවේ රජය වැඩියෙන් ම බදු අය කරන්නේ වෙළඳපොළෙනි. ඒ කියන්නේ වක්‍ර‍බදු ය. වක්‍ර‍ බදු අනුපාතිකය 86%ක් පමණ වේ. ඍජු බදු 14%ක් පමණි.

ආදායම් බදු ඍජු බදුවලින් ප්‍ර‍ධාන එකකි. පසුගිය දිනෙක මම මගේ රුධිර පරීක්ෂණ වාර්තාවක් ලබා ගැනීමට මතුගම පිහිටි චැනල් මධ්‍යස්ථානයකට ගියෙමි. එතැන සිටි චැනල් වෛද්‍යවරයෙකු ගොස් කාරයට ගොඩ වුණේ ය. කවුන්ටරයේ සිටි ගැහැණු ළමයි මුලින් පැමිණි මට සේවය කිරීම නවත්වා ලහිලහියේ ගණන් කර රු. 25,000ක් ලියුම් කවරයක දමාගෙන කාරය ළඟට දිව්වෝ ය. ඒ ගනුදෙනු නිසි පරිදි ලේඛනගත වීමක් සිදු වන බව දක්නට නො ලැබිණි.

“ඔච්චර කලබල වෙන්න ඕනැ නැහැ. ඕක හම්බ වෙනකල් එයා යන්නෙ නැහැ," යි එක් ගැහැණු ළමයෙක් ඔලොක්කුවට කීවා ය.

එදා සෙනසුරාදා දිනයකි. මෙම වෛද්‍යවරයා මෙවැනි චැනල් සෙන්ටර් 10කටවත් එදා පමණක් යන්නට ඇත.

සාමාන්‍යයෙන් දිනකට රු. ලක්ෂයකට වඩා උපයන මෙවැනි වෛද්‍යවරු ලංකාවේ ඕනෑ තරම් සිටිති. එහෙත්, ලංකාවේ රජයට මොවුන්ගෙන් හරියට බදු අය කර ගන්නට හෝ හැකියාවක් නැත. නීතිඥවරුන් වැනි තවත් ඇතැම් වෘත්තිකයන් බදු ගෙවනවා තබා ලදුපතක්වත් නිකුත් කරන්නේ නැත.

ඒ නිසා රජය ලේසියට කරන්නේ පාරිභෝගිකයා පිට බදු පටවන එක ය. අප රු. 50ක් වැය කර අන්තර්ජාලයට පිවිසෙන විට රජය එයි රු. 25ක් නිකම් ම සාක්කුවට දා ගනියි. ඒ තරම් මහජනයා සූරා කාලාත්, අඩු තරමේ ආදායම් බදු එකතු කර ගන්නටවත් රජය අසමත් ය.

ලංකාවේ ඊනියා විප්ලවවාදීන්ගේ සිට දොස්තර සංගමය දක්වා සියලු අවස්ථාවාදීන් කියන්නේ මේ මළ ඉලව්, පරපෝෂී රජය ම තව ලොකු කරන්නට ය කියා ය. 

ඔය ජනසතු කරනවා ය කියන රජයට පවරා ගැනීමේ මගුලෙන් ලංකාවේ කිසිවකුට කිසිදු සෙතක් වී නැත. බණ්ඩාරනායකගේ කාලේ ජනසතු කළ ලංගම අපට සලසන සේවාවක් නැති වුණාට ඒක නඩත්තු කරන්නට බදු මුදලුත් දෙන්නට සිදු වී තිබේ. සිරිමාගේ කාලේ වන්දි ගෙවා රජයට පවරා ගත් වතු දැන් නැවතත් කොම්පැනි අතේ ය. ජනසතු කතා තව ඕනෑ තරම් තිබේ.

වැඩිය ඕනෑ නැත. මහජනතාව විසින් විවිධ අරමුණු වෙනුවෙන් පිහිටුවා ගන්නා ලද සමුපකාර සමිති රජයට පවරාගෙන පිහිටුවන ලද විවිධ සේවා සමුපකාර සමිතිවලට සිදු වී ඇති දෙය බලන්න. මහින්ද රාජපක්ෂ සමුපකාර ඡන්ද දිනීම හැර සමුපකාරවල ඇති වෙනත් කිසිදු වැදගත්කමක් තිබේ ද? ඒවා විසින් අවසානයේ සමාජවාදී සංකල්පයක් වන සමුපකාර ව්‍යාපාරය ද විනාශ කර දමන ලදී.

රජයට ඔය මගුල් කරන්නට බැරි ය. බැරි බව නැවත, නැවත මහජන මුදලින් ඔප්පු කරන්නට උවමනා ද නැත.

සයිටම් එක ලාභ නො ලබන ස්වාධීන ආයතනයක් ලෙස පවත්වාගෙන යාම දොස්තර සංගමයට ම භාර දිය යුතු ය. එය ජනසතු ද මොකක් ද එකක් කරන්නට යයි ඉල්ලා සිටින්නේ ඔවුන් ය. මේ රටේ සාමාන්‍ය ජනතාව නම් එහෙම එකක් ඉල්ලා නැත. මොකද, ඔය ජනසතු කියන රජය සතු ඒවා ඇත්තට ම සතු දේශපාලකයන්ට, කොන්ත්‍රාත්කාරයන්ට හා ඒවායේ වැඩ කරන අයට බව මේ රටේ ජනතාව හොඳින් දන්නවා ය.

අපේ බදු මුදල් සයිටම් එකට නො යොදවනු! සයිටම් එක දොස්තර සංගමයට භාර දී ලාභ නො ලබන ස්වාධීන ආයතනයක් ලෙස පවත්වාගෙන යනු!

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.