ඉක්බිති සියලු වැඩ කරන ගැහැණු හේමමාලාවෝ වූ හ

මුහුළ දරා වැඩමවු පෙර සිරි දළදා

බිතු සිතුවම් රූ විය ගං තෙරදි එදා

රත්නසිරින් රන් මලකින් කළ පුබුදා

හේමමාලි නම් ඇය ලොව සදන ළඳා

- අජිත් පැරකුම් ජයසිංහ

මෙම කවිය ලියන්නට සිතුණේ රත්න ශ්‍රී විජේසිංහයන්ගේ දියණිය වන ප්‍රාර්ථනා සම්මානි ෆේස්බුක්හි පළ කර තිබූ ඇගේ මව් පියන්ගේ හිරිමල් තරුණ වියේ සේයාරුවක් දැකීමෙනි.

රත්න ශ්‍රී වස්සානේ කාව්‍ය සංග්‍රහය සිය බිරිය වන හේමමාලිට පිදුවේ මෙසේ ය.

හේමමාලීට-------

කිරි ශිරා සියක් ඉල්පී
කෘශ ළැමට ඇදී එත්මැයි
පියයුරෝ දෙදෙන හොරැහින්
බිම බලාගෙන හඬත්මැයි
ලේ කඳුළු බිංදු නොසිඳී
ලැම දුකින් තෙත් කරත්මැයි
හාමතේ නොලා දෙදරුන්
රක්ෂා කෙරෙත්මැයි

නුඹ වින්ද දුකින් උපනෙන්
මේ කවි මගේද නොදනිම්
ලොව තනන දෑත් නොතකා
මෙය ඉතින් කාට පුදදෙම්

රත්න ශ්‍රී සිය ඔහු සමග ජීවිතයේ දුක් කම්කටොලු බෙදා හදා ගත් හේමමාලි ගැන ලියූ මේ කවිය සියලු වැඩ කරන, බර උසුලන ගැහැණුන් වෙනුවෙන් ලියන ලද උපහාර කවියකි. ඒ හේමමාලි වැඩ කරන ගැහැනුන්ගේ සදාතනික සංකේතය වී හමාර ය.

මා මෙම ඡායාරූපය දුටුවේ වමේ අපි නමින් තමන් හඳුන්වා ගන්නා සංවිධානයක් විසින් මෙම බ්ලොග් අඩවියේ පළ කර තිබූ නිර්නාමික දීර්ඝ කමෙන්ට් දෙකක් දැකීමෙන් පසුව ය. කවිය ලියවෙන්නට ඇත්තේ ද ඒ ආවේග සමගයි.

මගේ බිරිය වීම හා පාඨිකාවක් වීම හැර මෙම බ්ලොග් අඩවිය සමග වෙනත් සම්බන්ධයක් නැති ගැහැනියක සම්බන්ධයෙන් තුච්ඡ කතා කීමෙන් ඒ වමේ යයි කියන අය උත්සාහ කරන්නේ මා බිඳ වට්ටන්නට බව මම දනිමි. අන් කිසිදු ක්‍රමයකින් ඔවුන්ට මා උකටලී කිරීමට බැරි වූ කල මගේ බිරිය, දරුවන් වැනි සංවේදී නිල ඇල්ලීම මට තේරුම් ගත හැකි ය. ඒවා කියවන කල කම්පනයට පත් නො වන්නට හැකියාවක් මට නැත.

මේවා කරන අය වනාහි අප සමග ගැටුම් ඇති ලංකාවේ සිටින වාමාංශිකයන් යයි අපි නො සිතමු. කෙතරම් මතවාදීව ගැටුණත්, ලංකාවේ ජීවත් වන අත්දැකීම් සහිත වාමාංශිකයන් මෙම තිරිසනුන්ට වඩා සංස්කෘතික ය.

වමේ අපි (අන්තර්ජාතික වාම විප්ලවීය දේශපාලනයක ලාංකීය සන්ලකුණ) වැනි නාමපුවරු භාවිතා කරමින් මේ නින්දිත ක්‍රියා කරන්නේ බටහිර රටක ජීවත් වන්නට ඇති හීනමානී පෙරේතකම නිසා හේතු ඇතිව හෝ නැතිව ලංකාවෙන් පළා ගොස්, ලංකාවට ඇවිත් කරන්නට දෙයක් නැති නිකමුන් වීම නිසා, ලංකාවට එන එක වළක්වා ගැනීම තම දේශපාලනයේ පදනම කර ගත් කාලකණ්ණි පිරිසකි. 

නූතන වාමාංශිකයන් පැවත එන්නේ සාර්ගේ පවුල පමණක් නො ව සුරතල් බල්ලා ද මරා දැමූ ලෙනින්ගේ පරපුරෙන් වීම නිසා වමට අත තැබූ කල එවැනි දේ බලාපොරොත්තු විය යුතු ය.

මා ඉහත කළ ප්‍රකාශය ලෙනින් විසින් සමාජයට කරන ලද සාධනීය දායකත්වයට අවමානයක් නො වේ. එහෙත්, වර්තමානයේදී අභාවයට යමින් සිටින 'වමේ අපි' වැනි කොටස්වලට ස්පර්ශ වන්නේ ඒ සාධනීය දේ නො වේ.    

රොමානොව්ගේ බල්ලාත් මරා දැමූ පරපුරෙන් පැවත එන 'වමේ අපි' වැනි බල්ලන්ට සන්නස්ගල කරන මෙම ප්‍රකාශය විශේෂයෙන් ම අදාළ ය.  

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.