විමල්ට මෙහෙම වුණේ ඇයි?

ඔබේ දරුවන් වෙනුවෙන් හෝ ආපසු හැරෙන්න විමල්. 

විමල් වීරවංශගේ බිරිඳගේ අක්කා වන තනුජා නිශාන්තිගේ ස්වාමි පුරුෂයා වන බෝඹුවල දිසාවගේ ආනන්ද අශෝක කුමාරට රාජ්‍ය ඉංජිනේරු සංස්ථාවේ අංක KB-6038, HQ-4974, GR-5774, KI-4648, KA-7440 දරණ වාහන ලබා දී තිබුණු බව ප්‍රසිද්ධ විය.

පහත වීඩියෝවේ සිටින්නේ විමල්ගේ බිරිඳගේ අක්කාගේ දුව යයි කියන අයෙකු හා ඇගේ මව ලෙස සැලකිය හැකි අයෙකි. වේදනාවේ රහස තේරුම් ගත හැකි නේ ද?

මෙම වීඩියෝවේ අවසන් හරියේ කතා කරන කාන්තාව ජවිපෙ වෙනුවෙන් පාර්ලිමේන්තුවට බෝම්බ ගැසීම සම්බන්ධයෙන් චෝදනා ලැබූ, ඒ හේතුවෙන් ම සිය බිරිය හා කුඩා දරුවා මරා දැමීමේ කෘර අත්දැකීම ලද ජවිපෙ හිටපු මහජන නියෝජිතයකු වූ අජිත් කුමාරගේ සොයුරියක විය හැකි ය. විමල් වීරවංශ විවාහ වී සිටින්නේ අජිත් කුමාරගේ තවත් සොයුරියක් සමග ය. විමල්ගේ පවුල් ගස ද එසේ මෙසේ වල් ගසක් නො වේ.

තක්කඩින්ගේ අවසන් නවාතැන ජාතිවාදය ය යන කියමනට තවත් සාක්කියක් කුමට ද? මෙම වීඩියෝවේ සිටින කාන්තාව අවසානයේදී පොලිසියට කියන්නේ යාපනයට ගොස් ගහන්නට ය කියා ය. ඒ කියන්නේ සොරුන් වුණත් සිංහලයන්ට එරෙහිව කටයුතු නො කළ යුතු ය. පොලිසිය කළ යුත්තේ දෙමළුන්ට ගැසීම ය.

උදය ගම්මන්පිල තර්ක කරන්නේ විමල් වීරවංශ වාහන අවභාවිතයට අනුබල දුන් බවට කිසිදු සාක්ෂියක් නැති බවයි. එසේ නම්, මෙම වාහන නිකුත් කළේ හුදෙක් ම නිලධාරීන් තමන්ගේ කැමැත්ත පරිදි විය යුතු ය. මෙම වාහන අවභාවිතාවන් කළ පුද්ගලයන් ද අත්අඩංගුවට ගත යුතු ය. ඉංජිනේරු සංස්ථාවේ මෙවැනි වංචා ගණනාවක් හෙළිදරව් වී බොහෝ කල් ය. වාහන අවභාවිතාවට අමතරව, විමල් වීරවංශගේ ගෝලයන් ගණනාවකට සහ ඔවුන්ගේ බිරියන්ට, ඥාතීන්ට කිසිදු වැඩක් නො කර ගෙදර සිටියදී වැටුප් පවා ගෙවන ලදී.

විමල් වීරවංශ සිය දේශපාලනයේ ආරම්භක සමයේදී අප සමග එක්ව සිටියේ ය. කැරැල්ලක් සම්බන්ධයෙන් කිසිදු කලෙක අත්අඩංගුවට පත් නො වූ විමල් වීරවංශ ජවිපෙ දේශපාලන මණ්ඩලයෙන් මහින්දගේ සමීප කවයට පිවිස, ජාතිවාදයට මුවා වෙමින් මහජන දේපල සොරකම් කිරීමට අනුබල දී රිමාන්ඩ් භාරයට පත් වීම මා නම් දකින්නේ අපගේ පැරණි මිතුරකුට සිදු වූ මහා ඛෙදවාචකයක් ලෙස ය. 

පක්ෂයේ වැඩ කිරීම සඳහා බයිසිකල් හොරකම් කරන්නට සිදු වූ හා ඒ නිසා දණ්ඩනයට ලක් වූ මිතුරන් ඇසුරු කළ අතීතයක් විමල්ට තිබිණි. අතීතයේ විමල් ඇසුරු කළ ඒ හිතවතුන් තව දුරටත් ජවිපෙ සිටියත් නැතත්, යම් ජීවන පරමාදර්ශ රැක ගනිමින් තවමත් එවැනි අහිංසක ජීවිත ගත කරන බව විමල් නො දන්නවා විය නො හැකි ය.  

මේ වනාහි මුල්‍ය අපරාධ විමර්ශන කොට්ඨාසයේ ඉතා මන්දගාමී පරීක්ෂණයක ප්‍රතිඵලයකි. මෙම පරීක්ෂණය ද සිදු වී තිබෙන්නේ ඉතා අකාර්යක්ෂම අයුරින් නිසා විමල්ට ඇප හා නිදහස ලබා ගැනීම දුෂ්කර නො වනු ඇත.

විමල් සිය අත්අඩංගුවට ගැනීම ගැන දොස් පවරන්නේ මීට කලින් වතාවක විදේශ ගමන් බලපත්‍ර වංචාවක් සම්බන්ධයෙන් ඔහු අත්අඩංගුවට පත් වන්නට නියමිතව සිටියදී බේරා යැවීමට මැදිහත් වූ රනිල් වික්‍රමසිංහට ය.

රාජ්‍ය සේවයට දේශපාලන ඇඟිලි ගැසීම් සිදු වීම වළක්වා ගන්නට අවශ්‍ය පසුබිම මේ වන විට නිර්මානය වී තිබේ. රාජ්‍ය සේවකයන් කළ යුතුව තිබෙන්නේ එම පසුබිම භාවිතා කරමින් ඇඟිලි ගැසීම් වළක්වා ගැනීම හා නීත්‍යානුකූලව වැඩ කිරීම මිස ඇඟිලි ගසන තෙක් බලා සිටීම නො වේ. රාජ්‍ය සේවය යහපත් අන්දමින් වෙනස් කිරීමේ මූලික වගකීම ඇත්තේ රාජ්‍ය සේවකයන්ට හා ඔවුන්ගේ වෘත්තීය සමිතිවලට ය. රාජ්‍ය සේවයේ ස්වාධීනත්වය ගොඩනගා ගැනීම දේශපාලකයන්ගෙන් බලාපොරොත්තු විය යුතු දෙයක් නො වේ.

එහෙත්, අවාසනාවට එය සිදු වන්නේ නැත. වෘත්තීය සමිති කරන්නේ රාජ්‍ය සේවය ප්‍රතිසංස්කරණය කිරීමට රජය පැත්තෙන් ඉදිරිපත් වන යම් කිසි යෝජනාවක් තිබේ නම් එයට එරෙහි වීම පමණි. රාජ්‍ය සේවකයන්ගේ පැත්තෙන් කිසිවක් සිදු වන බවක් නො පෙනේ. රජය යනු දේශපාලකයන්ගේ බූදලයක් නො වේ. රජය ජනතාවට අයත් දෙයකැයි අපි විශ්වාස කරන්නේ නැත. මන්ද, රජය එය භාවිතා කරන්නේ මහජන මුදල් අවශෝෂණය කර ගැනීමට පමණි. රජයේ හිමිකරුවන් වන්නේ ප්‍රධාන වශයෙන් ම දේශපාලකයන් හා රජයේ සේවකයන් ය. තමන්ගේ යැපුම් මාධ්‍යය වන රජය හරියට ගොඩනගා ගැනීමට රජයේ සේවකයන් මහන්සි විය යුතු ය. එය නඩත්තු කිරීම වෙනුවෙන් ජනතාව උසුලා සිටින අධික ණය හා බදු බර යම් දුරකට හෝ සාධාරණීකරණය කිරීමට රජයේ සේවකයන් උත්සාහ කළ යුතු ය.

රාජපක්ෂ පවුලේ සිට විමල් වීරවංශලා හරහා බැඳුම්කර සිද්ධිය දක්වා යුක්තිය පමා වීම රාජ්‍ය අංශයේ අකාර්යක්ෂමතාව කදිමට නිරූපණය කරයි.

විමල් වීරවංශට ඇප ඉල්ලා සිටිමින් අධිකරණයට ඉදිරිපත් කරන ලද එක් හේතු කාරණාවක් වන්නේ විමල්ගේ දියනියගේ මානසික තත්වයයි. විමල් ජවිපෙ සමග සම්බන්ධ වන්නේ වර්තමානයේ ඔහුගේ දරුවන් බඳු ළමයකු ලෙසයි. ඒ වකවානුවේ විමල්ගේ පවුල වනාහි ඉතා දිළිඳු, කුල පීඩිත පවුලකි. විමල්ගේ දියනියට අද තිබෙන සැප සම්පත්වලින් අංශු මාත්‍රයක් විමල් කියන ළමයාට තිබුණේ නැත. එහෙත්, ඔහුට වඩා නිරවුල් මනසක් තිබිණි. ඔහුගේ දිළිඳු මව වරෙකත්, පියා වරෙකත් සොරකම් සම්බන්ධයෙන් සිරගත වන තත්වයකට ඔහු මුහුණ දුන්නේ නැත. 

විමල්ලා මේ රටේ අනාගතය විනාශ කරන්නේ තමන්ගේ දරුවන්ගේ ද මානසිකත්වය සමගයි. ධනය නො තිබුණත්, ඔහු ළඟ බොහෝ සුන්දර දේ තිබිණි. එක් විරු සමරුවකට ඔහු ඇතුළු පිරිස විසින් රහසේ නිර්මානය කර, ප්‍රදර්ශනය කරන ලද හැඟීම්බර සමරු නිර්මානයක් තවමත් මගේ සිතේ ඇඳී තිබේ. 

එදා සිටි අව්‍යාජ විමල් මෙවන් මහජන දේපල සොරකු වීම ගැන වගකිව යුත්තේ විමල් පමණක් නො වේ. 

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.