උදයන්ට මෙතරම් ගහන්නේ ඇයි? උදයන්ට ගහනකොට ඩයස්පෝරා අඬන්නේ ඇයි?

යාපනය නගරය කේන්ද්‍ර කරගෙන පළවන උදයන් පුවත්පතට නැවතත් ප්‍රහාරයක් එල්ල කර තිබේ. මේ එම පුවත්පතට එල්ල කරන ලද කෙළවරක් නැති ප්‍රහර මාලාවක තවත් එකකි. 

තුන්දෙනෙකුගෙන් යුත් කණ්ඩායමක් අද උදේ පහට පමණ පුවත්පත් කාර්යාලයේ මුද්‍රණ අංශයට බලහත්කාරයෙන් ඇතුළු වී සේවකයන්ට අවි පෙන්වා මරණ තර්ජන කර, යන්ත්‍රවලට වෙඩි තබා, අනතුරුව ගිනි තබා තිබේ. ප්‍රධාන මුද්‍රණ යන්ත්‍රය ඇතුළු යන්ත්‍රවලට අලාභ හානි වී තිබේ. පුද්ගලයෝ කිසිවෙක් තුවාල ලබා නැත.

මෙය සිදුවන්නේ දසදහස් ගණනින් හමුදා යොදවා 'ආරක්ෂා' කර තිබෙන යාපනය නගරය මැදයි. අප්‍රේල් 3දා උදයන් පුවත්පතේ කිලිනොච්චි කාර්යාලයටද පහර දෙන ලදී. කිලිනොච්චි වනාහි හමුදා අධිආරක්ෂක කලාපයක් වැනි නගරයකි. 

උදයන් පුවත්පතට එල්ල කරන ලද ප්‍රහාර හේතුවෙන් මේ වන විට මාධ්‍යකරුවන් ගණනාවක් ඇතුළු සේවකයෝ රැසක් මිය ගොස් හා තුවාල ලබා තිබේ. මේ ප්‍රහාරවලට එරෙහිව නීතිය ක්‍රියාත්මක වී තිබෙන්නේ ඉතා අවම වශයෙනි. කිසිවෙක් නීතිය හමුවේ වරදකරුවෝ වී ඇති බවකි වාර්තා වී නැත. 

උදයන් පුවත්පත යුද්ධය මැද වාර්තාකරණය සිදු කළ ආකාරය සුවිශේෂය. කොටි සංවිධානය විසින් යාපනය නගරය පාලනය කරන ලද, දැඩි ආර්ථික සම්බාධක පනවා තිබුණු යුගයේ, උග්‍ර කඩදාසි හිඟයක් මැද පවා උදයන් පුවත්පත පවත්වාගෙන යන ලදී. 

උදයන් පුවත්පත නිරතුරුවම උතුරේ දෙමළ වැසියන්ට සිදු වන අසාධාරණකම් පිළිබඳ වාර්තා කරයි. එම පුවත්පත ලංකාවේ ආණ්ඩුවට පාලනය කරගත නොහැකි ප්‍රධාන ධාරාවේ ජනමාධ්‍යයකි. නුදුරු අනාගතයේදී උතුරු පළාත් සභාව සඳහා මැතිවරණ පැවැත්වීමට රජය සූදානම් වන සංදර්භයක් තුළ, උදයන්ට දිගින් දිගටම ප්‍රහාර එල්ල කිරීම පිටුපස ඇති උපායමාර්ගය හඳුනාගැනීමේදී සන්ඩේ ලීඩර් පුවත්පත නිදර්ශනයක් ලෙස සැලකිය හැකිය. දිගින් දිගටම එම පුවත්පතට විවිධාකාරයෙන් පහර දී එය දුර්වල කිරීමෙන් අනතුරුව ආණ්ඩුවේ හිතවතකු මගින් එය මිළ දී ගන්නා ලදී. 

උදයන් පුවත්පතේ හිමිකරු වන්නේ දෙමළ ජාතික සන්ධානයේ යාපනය දිස්ත්‍රික් පාර්ලිමේන්තු මන්ත්‍රී ඊ. සරවනබවන්ය. 

මෙම ප්‍රහාරය පිටුපස සිටින්නේ ආරක්ෂක අංශ හෝ දා ආණ්ඩුවේ මැර කල්ලි හෝ නොවේනම් මෙම සිද්ධියට එරෙහිව නීතිය ක්‍රියාත්මක වනු ඇතැයි බලාපොරොත්තු විය හැකිය. නැතිනම් උදයන්ට පහර දී ගත්තේ උදයන්ම බව කියන පුවත්ද හෙට වනවිට ඇසෙන්නට පුළුවන. 

දෙමළ ඩයස්පෝරාවට බැලමෙහෙ කරන රාජ්‍ය නොවන මාධ්‍ය සංවිධාන වහා නින්දෙන් අවදි වී අධික ලෙස ක්‍රියාත්මක ‍වන ආකාරයෙන් පෙනෙන දෙයක් වන්නේ මෙම සිද්ධිය වැනි දේ කෙරෙහි ඔවුන්ගේ ඇති අධික ආශාවයි. 

ආණ්ඩුවේ බලලෝභී මුග්ධ ක්‍රියාමාර්ග ලංකාව දෙකඩ කිරීමට බලා සිටින දෙමළ ජාතිවාදීන්ට කෙතරම් උපකාරී වී තිබේද යන්න මෙම සිද්ධිය පදනම් කරගෙන ජාත්‍යන්තරව සිදු වන ප්‍රචාරයන් තුළින් මනාව පැහැදිලි වේ. 

උදයන් පුවත්පතේ වෙබ් අඩවියට මෙතැනින් පිවිසිය හැකිය.

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න