රතු ධනවාදය බිහි වෙන තුරු ජනතාව රවටමු ද? ඇත්තට මුහුණ දෙමු ද?

ආණ්ඩුවේ අයවැය යෝජනාවලිය විග්‍රහ කිරීමේදී අප විසින් සලකා බලනු ලබන කාරණා කීපයක් තිබේ.

ඒ අතරින් පළමුවැන්න අපට මේ ආණ්ඩුව වහා පෙරළා දැමීමට හෝ මේ සමාජ ක්‍රමය අවුල් කර දැමීමට හෝ අවශ්‍යතාවක් නැත. ආණ්ඩුවට වසර පහක් රට පාලනය කිරීම සඳහා ජනවරමක් තිබේ. එසේම, සමාජ ක්‍රමය අවුල් කර දැමූ පමණින් සමාජවාදය නිර්මානය වන්නේ නැත. සමාජවාදය යනු ඉබේ හැදෙන එකක් නොව, හැදිය යුතු එකකි. දැන් සමාජවාදීන් ලෙස පෙනී සිටින වාමාංශික පක්ෂ කිසිවකට ඒ සඳහා කටයුතු කිරීමේ ධාරිතාවක් නැත. ඒවායේ නායක කාරකාදීහු අංග සම්පූර්ණ දෙබිඩ්ඩෝ ය. ඔවුන්ට දේශපාලනය හා සැබෑ ජීවිතය දෙකකි. මේ දෙබිඩිකම නැති කර නො ගෙන සමාජ විප්ලවයකට මුල පිරිය නො හැකි ය.

පවත්නා ආණ්ඩුව පත් කර ගත්තේ කෘෘර ඒකාධිපතිත්වයකට එරෙහි දීර්ඝකාලීන අරගලයකිනි. පත් කර ගත් ආණ්ඩුව පරිපූර්ණ එකක් නො වේ. එහෙත්, ඔවුන් සාපේක්ෂ වශයෙන් වඩා ප්‍රජාතන්ත්‍රවාදී බව ක්‍රියාවෙන් ඔප්පු කර තිබෙන බව කුහකයින් නො වන ඕනෑ ම කෙනෙකුට පෙනේ. පෙරටුගාමී පුරවැසි බලවේග ලෙස අප උත්සාහ කළ යුතු වන්නේ ආණ්ඩුවේ සීමා මායිම් තුළ එයින් ඉටු කරවා ගත හැකි උපරිමය ලබා ගන්නට ය. ඒ සඳහා ඔවුන්ට උපකාර කළ යුතු තැන්වලදී උපකාර ද, විවේචනය කළ යුතු තැන්වලදී විවේචනය ද කළ යුතු ය. අපගේ උපායමාර්ගය එයයි.

අයවැය යෝජනා සලකා බැලීමේදී එහි එක් එක් කාරණා සලකා බැලිය යුතුව තිබෙන්නේ සමස්ත සංදර්භය තුළ ය. එම සමස්ත සංදර්භය නිර්මානය වීමේදී මහින්ද රාජපක්ෂගේ අන්ධකාර දශකයේ බලපෑම අති විශාල බව අප අමතක කළ යුතු නැත.

අයවැය සම්බන්ධයෙන් ආණ්ඩුව මුහුණ දෙන ගැටලු තේරුම් ගැනීමේ වගකීමක් පෙරටුගාමී පුරවැසියන්ට තිබේ.

පසුගිය දශක ගණනාවක් තිස්සේ සීමාවකින් තොරව ලබා ගන්නා ලද ණය ආපසු ගෙවීමේ වගකීම රජයට තිබේ. ශ්‍රී ලංකා රජය මේ වන විට විදේශවලට පමණක් ඩොලර් බිලියන 50කට වඩා ණය ය. ඒවා ගෙවීමට රජයේ සමස්ත වියදමෙන් 40%ක් පමණ වෙන් කෙරේ.

ලංකාව මුල් කාලයේදී විදේශ ණය ලබා ගත්තේ මහවැලි සංවර්ධන ව්‍යාපාරය වැනි නිශ්චිත ඉලක්කගත සංවර්ධන ව්‍යාපෘති සඳහා ය. ණයත්, නාස්තිය හා දූෂණයත් අතර සම්බන්ධය මහින්දගේ කාලයේදී උපරිමයට ළඟා විය. දැන් ණය ගැනීම වැඩි වශයෙන් සිදු වන්නේ සංවර්ධන ව්‍යාපෘතිවලට වඩා ගත් ණය ආපසු ගෙවීමට හා එදිනෙදා වියදම් පියවා ගැනීමටයි. මේ ආණ්ඩුව ද ණය ගැනීම අඩු කර නැති බව කිව යුතු ය.

මෙවැනි සංදර්භයක් තුළ ආණ්ඩුවට නත්තල් සීයා කෙනෙකු වීමේ හැකියාවක් නැති බව වටහා ගැනීමේ වගකීමක් ජනතාවට නැද්ද? 

ආණ්ඩුවට කළ හැකි දේ අතර තිබෙන ප්‍ර‍ධාන කාර්යයක් වන්නේ රාජ්‍ය වියදම් අවම කර ගනිමින් රාජ්‍ය සේවයේ කාර්යක්ෂමතාව ඉහළ නැංවීමයි. පුළුල්ව විහිදුණු ධනේශ්වර රාජ්‍යයක් ගොඩනැගීම වෙනුවෙන් සමාජවාදීන් පෙනී සිටින්නේ ඇයි ද යන්න තේරුම් ගත නො හැකි කාරණයකි. රාජ්‍ය අංශය පුළුල් වෙන්නට, වෙන්නට ධනේශ්වර ආණ්ඩුවේ බලපෑම ද වැඩි වේ. එසේම, ජනතාව මත පැටවෙන බදු බර ද අති විශාල වේ. දූෂණය ද ඉහළ යයි. 

රාජ්‍ය අංශය ම මේ වන විට ආර්ථිකයට දැවැන්ත බරකි. දේශපාලකයාගේ සිට ඇට මහත්තයා දක්වා නිකමුන්ගෙන් පිරි රාජ්‍ය අංශයට වැටුප්, විශ්‍රාම වැටුප්, බදු සහන ආදිය ගෙවන්නේ දෙයියන් දුන් සල්ලිවලින් නො වේ. ලංකාවේ ආර්ථිකයේ බර දරා සිටින්නේ මේ කිසිදු වරප්‍රසාදයක් නො ලැබෙන මැද පෙරදිග රැකියා කරන ගැහැනු, පිරිමි, ඇඟලුම් කම්හල් කම්කරුවන් හා වැවිලි කම්කරුවන් ආදීන් බව නිරන්තරයෙන් සිහිපත් කළ යුතුව තිබේ.

පීඩිත පංතික ව්‍යාපාර සටන් කළ යුත්තේ මේ ජනතාවන් වෙනුවෙන් මිස ඔවුන් සූරා කන ධනපති,  දේශපාලක හා නිලධාරි පැළැන්තිය වෙනුවෙන් නො වේ.

නිකම් සිට මහජන මුදලින් පඩි හා විශ්‍රාම වැටුප් කන්නට රජයේ සේවයට බැඳීම අධෛර්යවත් කළ යුතු ය. රජයේ සේවය කාර්යක්ෂම කළ යුතු ය. විශ්‍රාම වැටුප් අහෝසි කිරීමට ඉඩ නො දිය යුතු ය. එහෙත්, රජයේ සේවකයන්ගේ විශ්‍රාම වැටුප සමාජ ආරක්ෂාවක් නැති පීඩිතයන්ට බරක් විය යුතු නැත. ඒ නිසා විශ්‍රාම වැටුප් විධිමත් කළ යුතු ය.

එසේම, රජයේ සේවකයන්ට ලබා දෙන වරප්‍රසාද රජයේ සේවයේ කාර්යක්ෂමතාව සමග සම්බන්ධ කළ යුතු ය. බදු සහන ආදී වරප්‍රසාද භුක්ති විඳිමින් ජනතාව පෙළන රජයේ සේවය වෙනුවට වචනයේ පරිසමාප්ත අරුතින් ම සේවයක් වන රාජ්‍ය අංශයක් ගොඩනැගිය යුතු ය.

මෙම කරුණු ටික පෙරදැරි කරගෙන ඔබ දෙස ම බලන්න. ඔබ පෙනී සිටින්නේ කුමක් වෙනුවෙන් ද? ලංකාවේ වාමාංශිකයන් හා විප්ලවවාදීන් යයි කියන අය පෙනී සිටින්නේ කවුරුන් වෙනුවෙන් ද?

පීඩිත පංතික ව්‍යාපාර යයි තමන් හඳුන්වා ගන්නා පක්ෂ, කල්ලි, කණ්ඩායම් මේ මොහොතේ පෙනී සිටින්නේ මධ්‍යම පංතියේ කාර් සිහිනය වෙනුවෙනි. පෞද්ගලිකව මෝටර් රියක් හිමි කර ගත හැකි මට්ටමට රට දියුණු වෙනවාට අපි කැමති ය. එහෙත්, පීඩිතයන්ට තිබෙන මූලික ප්‍රශ්නය කාර් නො වේ.

ඔවුන්ට පෝෂණය අවශ්‍ය ය.
නිවාස අවශ්‍ය ය.
රැකියා අවශ්‍ය ය.
දරුවන්ට අධ්‍යාපනය අවශ්‍ය ය.
සෞඛ්‍ය පහසුකම් අවශ්‍ය ය.
සමාජ ආරක්ෂාව අවශ්‍ය ය.
ගමනාගමනයට පොදු ප්‍රවාහන පහසුකම් අවශ්‍ය ය.
............................................

ආණ්ඩුව අවධානය යොමු කළ යුත්තේ ඒ වෙනුවෙන් ය. සහනාධාර දිය යුත්තේ අත්‍යවශ්‍ය අය වෙනුවෙනි. පොදුවේ සමාජයේ මිළ දී ගැනීමේ හැකියාව වර්ධනය කිරීම හා නිදහස් වෙළඳපොළ මෙහිදී ප්‍ර‍බල සාධක දෙකකි. ආණ්ඩුව නිදහස් වෙළඳපොළ මත යම් පාලනයක් ද පවත්වාගෙන යයි. එය ඔවුන් හඳුන්වන්නේ සමාජ වෙළඳපොළ ක්‍ර‍මයක් ලෙසයි. 

ලෝකයේ පවතින්නේ ධනේශ්වර ක්‍ර‍මයකි. ලංකාවට පමණක් සමාජවාදී වන්නට බැරි ය. හැම රෙද්දට ම නව ලිබරල්, නව ලිබරල් කිය කියා නැටුවාට මේ සමාජවාදීන්ට විකල්ප නැත. වාදයන් පසෙක තබා බැලූ කල ලංකාව සංවර්ධනය වෙන්නට නම් දේශීය හා විදේශීය ආයෝජකයන් දිරි ගැන්විය යුතුව තිබේ. ඒ වෙනුවෙන් ශ්‍ර‍ම වෙළඳපොළ ලිබරල් කරන්නට ද සිදු වේ. කම්කරු පංතියට එහි අහිතකර විපාක නැති බවක් මම නො කියමි. එහෙත්, සැබෑ කම්කරු පංතිය හා ගතානුගතික වෘත්තීය සමිති ව්‍යාපාරය අතර සම්බන්ධය අවම ය. ලංකාවේ වෘත්තීය සමිති යනු මධ්‍යම පංතික අවයවයකි. ඒවායේ නායකයන් කම්කරුවන් හඳුනන්නේවත් නැත. විදේශ ශ්‍ර‍මිකයන්, ගෘහ සේවකයන්, සාප්පු සේවකයන්, සනීපාරක්ෂක සේවා සමාගම් කම්කරුවන්, ඉදිකිරීම් කම්කරුවන්, ඇඟලුම් කම්කරුවන්, වතු කම්කරුවන් වැනි සැබෑ වැඩ කරන ජනතාවට දැනටත් ඔය වෘත්තීය අයිතිවාසිකම් කිසිවක් නැත. ඔවුන් සිතන්නේ රස්සාව ගැන මිස වෙනත් කරුණු ගැන නො වේ. පෞද්ගලික අංශයේ සෑම මට්ටමක ම පාහේ සේවකයන්ගේ තත්වය මීට වෙනස් නො වේ. 

මේ රටේ වාමාංශිකයන් සිතන්නේ ආණ්ඩු තිබෙන්නේ ජනතාවගෙන් බදු අය නො කර, ධනවතුන්ගේ හා පීඩිතයන්ගේ මුදල් මංකොල්ල කා, මධ්‍යම පංතියට නිකම් ඉඳිමින් ගන්නට වැටුප්, විශ්‍රාම වැටුප්, තීරු බදු රහිත වාහන, ගෙවල් ආදිය සපයන සරදියෙල් කෙනෙක් කියා ය. 

ඔවුන්ගේ සමාජවාදී පරමාදර්ශ වන චීනය, වියට්නාමය වැනි රටවල ආර්ථික ප්‍ර‍තිපත්ති හදාරන්න. මොවුන් බලයට පැමිණියහොත් කරන්නේ එයයි. ඒ වනාහි ප්‍ර‍ජාතන්ත්‍ර‍වාදයෙන් තොර, ඒකාධිපති රතු ධනවාදයකි. රතු නව ලිබරල්වාදයක් ලෙස ද එය හඳුන්වන්නට පුළුවන. ඔවුන්ට ඒ සඳහා පාර කපා දෙන්නට මේ රටේ ජනතාව සිය ජීවිත කාලකන්නි කර ගත යුතු නැත. 

අප විකල්ප වෙනුවෙන් අරගල කළ යුතු ය. එහෙත්, ජනතාවගේ ජීවිත කාලකන්නි නො කරන මූලික කොන්දේසිය ආරක්ෂා කර ගත යුතු ය. 

පහත පළ වන්නේ මේ රටේ වරප්‍ර‍සාද, සුබසාධනය, සමාජාරක්ෂාව අවම කම්කරු ප්‍ර‍ජාවක් ගැන ලිපි දෙකකි. 




මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.

Comments

  1. You see the problem as it is , very well tailored and well explained. You haven't taken in to account the factors such as influnece of global economic thrust and influence of regional super powers

    ReplyDelete
  2. පැරා,

    බොහෝ කලකට පසු 100% එකගවිය හැකි ලිපියක්.
    අපේ වාමන්ශිකයන්ට මොලේ පෑදෙන්නේ වයසට යනකොටයි.
    ඔබ ගැන සතුටුයි, තවම වාමාංශික නාකි කොටසක් සිටිනවා 1970 ගණන් වල
    අදහස් වල ගැලී සිටින.

    මෙන්න මේක තමයි සිදුවිය යුත්තේ පුරවැසියන් ලෙස දැන්වත් පටන් ගත යුතුයි.
    නිවැරදි දේ සිදු කිරීමට රජයට බලකිරීමට.

    ReplyDelete
  3. නිදහස් අධ්‍යාපනය යනු නොමිලේ රජය ගානේ උගන්වා විශ්ව විද්‍යලයට ගියපසු මහපොල සහනාධාරද දී . උපාදිය ගත් පසු රජයේ විශාම වැටුප් සහිත රැකියාවක් දීම බව ද අවධාරණය කල යුතුය. එබැවින් තමන් කැමැති ආයතනයට මුදල් ගෙවා අධ්‍යාපනයක් ලබා ගැනීම පහත්කොට සලකා එයට වැට බැඳීමද නිදහස් අධ්‍යපනයේ ප්‍රමුඛ අංගයක් ලෙස අර්ථ දැක්විය යුතුය.!

    ReplyDelete
  4. This comment has been removed by the author.

    ReplyDelete
  5. "මේ රටේ වාමාංශිකයන් සිතන්නේ ආණ්ඩු තිබෙන්නේ ජනතාවගෙන් බදු අය නො කර, ධනවතුන්ගේ හා පීඩිතයන්ගේ මුදල් මංකොල්ල කා, මධ්‍යම පංතියට නිකම් ඉඳිමින් ගන්නට වැටුප්, විශ්‍රාම වැටුප්, තීරු බදු රහිත වාහන, ගෙවල් ආදිය සපයන සරදියෙල් කෙනෙක් කියා ය."
    හරියටම හරි

    ReplyDelete
    Replies
    1. +++++++++++++++++++++++++++


      මුළු ළිපියම කෙටියෙන් එතන තියෙනවා..

      ලංකාවේ වමෙන් තියෙන විශාළම ප්‍රයෝජනය තමයි පුක හෝදන එක...

      හැබයි උන්ට හොඳ බිස්නස් එකක් කරන්න පුළුවන්.. උද්ඝෝෂණ, පෙලපාලී, හර්තාල්, උපවාස වගේ දේවල් ඉවෙන්ට් මැනේජ්මන්ට් වලට ඇතුලත් කරලා කොම්පැනි පටන් ගත්තා නම්.. කැම්පස් යන ගොන්නු ටිකක් ඉන්නවනේ කොයි කවදත් සුවේච්ඡාවෙන්ම ඉල්ලගෙන කන.. ඩැමේජ් වැඩි උනොත් පේමන්ට් එක ඉන්ක්‍රීස් වෙන විදියට ගිවිසුමක් ගහලම බිස්නස් එක පටන් ගතා නම් හරි..

      උදා හරණයක් විදිය ඒ කියන්නේ මරණයක් උනොත් පක්ෂයෙන් ලක්ෂයක් වගේ ගානක්.. මොකෝ ජනධිපති තුමා පොටෝ ගහලත් දෙන්නේ එච්චරනේ.. එතකොට අර ඉවෙන්ට් ඕගනයිසර් ඒක ගෙවන්න ඕන..

      හැබයි මචෝ මේ උපදෙස් දුන්නා කියලා.. උඹලා එහෙම මට ඔය පසුගාමී පක්සොවල කරෙක සභාවට අරකට මේකට කතා කරනවා එහෙම නෙමෙයි ඕං ඈ..

      Delete
    2. විප්ලවවාදී පක්ෂ විසින් දැනටමත් පෝස්ටර් ගැසීමේ කොම්පැනි පවත්වාගෙන යනු ලැබේ.

      Delete
    3. අන්න දියුණු වෙන මිනිස්සු...

      Delete
    4. වාමාංශිකයින් සිතන ආකාරයට වඩා වැදගත් වන්නේ ආණ්ඩුව කටයුතු කරන ආකාරයයි. ආණ්ඩුව සිතන්නේ ජනතාවගේ බදු මුදල් එකතුකරගෙන තමන්ට සුදු කෙලිය හැකි බවත් ඒ මුදල් වංචා කරගත හැකි බවත්ය.

      මාතලන්ලා, පැරාලා වාමාංශිකයින් පෙන්වමින් සිදුකරමින් සිටින්නේ ආණ්ඩුවේ දුෂණයන් ආරක්ෂා කිරීමය.

      Delete
  6. /මේ රටේ වාමාංශිකයන් සිතන්නේ ආණ්ඩු තිබෙන්නේ ජනතාවගෙන් බදු අය නො කර, ධනවතුන්ගේ හා පීඩිතයන්ගේ මුදල් මංකොල්ල කා, මධ්‍යම පංතියට නිකම් ඉඳිමින් ගන්නට වැටුප්, විශ්‍රාම වැටුප්, තීරු බදු රහිත වාහන, ගෙවල් ආදිය සපයන සරදියෙල් කෙනෙක් කියා ය. /

    +++++++++++++++++++++++++++++++++++++++++

    ReplyDelete
    Replies
    1. වාමාංශිකයින් සිතන ආකාරයට වඩා වැදගත් වන්නේ ආණ්ඩුව කටයුතු කරන ආකාරයයි. ආණ්ඩුව සිතන්නේ ජනතාවගේ බදු මුදල් එකතුකරගෙන තමන්ට සුදු කෙලිය හැකි බවත් ඒ මුදල් වංචා කරගත හැකි බවත්ය.

      Delete
    2. එවැනි දූෂණවලට එරෙහිව සටන් කළ යුතු ය. එවැනි දූෂණ සිදු නො වේ යයි ගැරන්ටියක් දෙන්නට බැරි ය. එහෙත්, දැන් තිබෙන්නේ මහින්ද රාජපක්ෂලාගේ කාලේ තිබුණු තත්වය නො වේ. ඔබට තිබෙන ප්‍ර‍ශ්නය සුබවාදී ලෙස බලන්නට බැරිකම වන්නට පුළුවන. මොනවා වුණත් අපට ආණ්ඩු කරවා ගන්නට සිදු වන්නේ මුන්ට කියලා ය. වාමාංශික බුවාලා කියලාත් වෙනසක් නැත.

      Delete
    3. /අපට ආණ්ඩු කරවා ගන්නට සිදු වන්නේ මුන්ට කියලා ය. වාමාංශික බුවාලා කියලාත් වෙනසක් නැත. /

      වාමාංශික බූවලා සන්දර්ශන හැර වෙනත් පාලනයක් දන්නේ නැත, යමක් හරියට ඉගෙනගත් / පරිපාලනයක් කළ එකෙක්වත් උන් අතර නැත, උන් පාලනයක් ඉගෙන ගන්න කොට අපේ රාජ්‍ය නිළධාරීන් අපිව පුම්බලා උඩ ඇරී.

      Delete
    4. සුභවාදීව බැලීමට තරමට සිදුවී ඇත්තේ කුමක්ද?
      මොනවා වුනත් මුන්ට කියා ආණ්ඩු කරවා ගැනීමට අවශ්‍යව ඇත්තේ පැරාලාටය.

      අප ආණ්ඩුව විශ්වාස තබා බලා සිටිය යුතුද?
      ආණ්ඩුව කල යුත්තේ මෙයයැයි යොජනා ඉදිරිපත්කර ඒවා ඔවුන් විසින් ඉටු කරනතුරු බලා සිටීමද?

      නැතහොත් සමාජය වෙනස් කිරීම සදහා ජනතාව පෙළගැස්වීමට කිසියම් හෝ සංවිධානයක් ගොඩනැංවිය යුතුද?

      Delete
    5. වාමාංශික දේශපාලනය වැරදි බව පැවසිමෙන් ආණ්ඩු හොද වන්නේ නැත. පැරාලාට සමාජය පිලිබදව ඉගෙන ගැනීමට යම් අවකාශයක් ලැබුනේ වාමාංශික දේශපාලනය මගිනි.

      වාමාංශික දේශපාලනය කළ පුද්ගලයන් සමග තිබෙන ගැටලුන් නිසා ධනවාදය හොද වන්නේ නැත. වාමාංශික දේශපාලන පක්ෂ තුලද අනෙකුත් පක්ෂවල මෙන් අවස්ථාවාදීන්, වංචාකාරයන් හා බොරුකාරයන් නොමැතියැයි පැවසීමට අවශ්‍ය නැත. එම පක්ෂ තුලද සමාජයේ පවතින අගතීන් ඒ ආකාරයටම ඇතිවිමේ අවධානම සැමදවසකම ඇත. ඒ සියලු අභියෝගයන් සමග අරගල කරමින් මිනිසුන් සංවිධානය කිරීම හැර මොනවා වුනත් මුන්ට කියා ආණ්ඩු කරවා ගැනීම අපට අවශ්‍ය නැත.

      Delete
  7. පැරා - ඔබ නිතරම kiyanna.lk ප්‍රෙමා්ට් කරන්නේ ඇයි?

    ReplyDelete
    Replies
    1. පැරාට "ලියන්න" උදව් කරනවා ඇති.. දැන් පැරත් ධනවාදී පොරක් නේ..

      Delete
  8. "ඒවායේ නායක කාරකාදීහු අංග සම්පූර්ණ දෙබිඩ්ඩෝ ය. ඔවුන්ට දේශපාලනය හා සැබෑ ජීවිතය දෙකකි." මුලට “ඒවායේ“ කියල තියන වචනය වෙනුවට "වර්තමාන සියලුම පක්ෂවල" කියල දැම්ම නම් වැඩිය හරි.

    ReplyDelete
  9. අදහසක් ලෙස ඔබ විසින් කියන කරුණු වඩාත් තාර්කික හා නිවරදි වන අතර ප්‍රශ්නය ඇත්තේ එවැනි වැඩපිලිවෙලක් ක්‍රියාත්මක කලයුත්තේ කෙලෙසද යන්න පිලිබදවය. ඔබ කියන පරිදිම පිඩිත ජනතාවට පෝෂණ අවශ්‍යතාවයන්,නිවාස අවශ්‍යතාවයන්, රැකියා අවශ්‍යතාවයන්,දරුවන්ගේ සහ ඔවුන්ගේ අධ්‍යාපනය අවශ්‍යතාවයන්,සෞඛ්‍ය පහසුකම්, සමාජ ආරක්ෂාව, ගමනාගමනයට පොදු ප්‍රවාහන පහසුකම් සහ තවත් බොහෝ මුලික දේවල් අවශ්‍යව ඇත. ගැටලුව වන්නේ ඒ කිසිදු ප්‍රශ්නයක් විසදීමට මෙම අයවැය තුලින් කිසිදු යොජනාවක් ඉදිරිපත්කර නොතිබිමය

    සමාජවාදය හෙට නිර්මාණය කිරීමටද නොහැකිය. සමාජවාදය නිර්මාණය කිරීම දේශපාලන පක්ෂයකට අවශ්‍යවු මොහොතේදි කල හැක්කක් නොවේය. සමාජයක් වෙනස් කල යුත්තේ එම සමාජයේ සිටින මිනිසුන් විසින්ය. ඔබ එම මිනිසුන්ට යොජනා කරණුයේ රනිල් මෛත්‍රී යහපාලන නඩයට වසර පහක් දී බලා සිටින ලෙසය මේ ආණ්ඩුවට මොකක් හෝ කර ගන්නට බැරිවු විටදි තව කෙනෙක් හොයාගමු යන්නය. එමෙන්ම ඔබට දැඩි විශ්වාසයක් තිබුනාට අපටනම් මහින්ද ඇතුලු හොර නඩයට වඩා වෙනසක් මෙය තුලින් දැකිමට නොහැකිය. එමෙන්ම මහින්දගේ ආණ්ඩුව අමාරුවෙන් පෙරලුවා කියමින් සමාජවාදය ගොඩනැගිම වෙනුවෙන් සමාජය සංවිධානය කිරීම පමා කිරීමේ අවශ්‍යතාවයක් නැත.

    රාජ්‍ය අංශය රටට බරක් ලෙස ප්‍රකාශ කලද දැනට සිටින රජයේ සේවකයින්ගේ සේවය ඵලදායිලෙස යොදාගැනීම සදහා කිසිදු වැඩපිලිවලක් රජය විසින් යොජනා කරන්නේ නැත. රජය ඒ වෙනුවට රජයේ සේවය තවදුරටත් අකාර්යක්ෂම කිරීම පමණක් කරන්නේය. රාජ්‍ය සේවය විධිමත්ලෙස සකස්කල යුතුව ඇත. කිසිදු අවශ්‍යතාවයක් නොමැතිව ආයතනවලට සේවකයින් පුරවනු ලබන්නේ දේශපාලකයිනය. පැරා හොදයි කියන ආණ්ඩුවද කරමින් සිටින්නේ එයමය. ප්‍රශ්නය තිබෙන්නේ පවතින ආණ්ඩු මේ කිසිදු ගැටලුවක් සදහා විසදුම් සෙවිමකින් තොරව යන්නේ කොහේද මල්ලේ පොල් උත්තර දීමය. නිල ඇදුම් වෙනුවට වවුචර් ලබාදීම ඒ සදහා එක් උදාහරණයක්ය. පොදු ප්‍රවාහනය ශක්තිමත් නොකර පෞද්ගලික වාහන භාවිතය දුර්වල කිරීම තවත් උදාහරණයක්ය.

    ජනතාවගෙන් බදු මුදල් එකතු නොකර වියදම් කිරීමට නොහැකිබව සැබැවක්ය. කර්මාන්ත සදහා බදු පැනවුවද එයින් පිඩා විදින්නේත් පහල පාන්තික ජනතාවමය. එමෙන්ම රජයක් විසින් බදු නොවන ආදායම් උත්පාදනය කිරීමද කල යුතුය. පැරා දන්නා සමාජවාදය කුමක්වුවද
    සමාජවාදය යනු බදු එකතු කිරීම අවසන් කිරීමේ දීශානතියක් සහිත සමාජ ක්‍රමයක්ය.

    අවසාන වශයෙන් ලිවිමට ඇත්තේ පැරා ලියා තියෙන දෙවල් ක්‍රියාත්මක කරවන්නේ කොහොමද යන්නය.
    අප ආණ්ඩුව විශ්වාස තබා බලා සිටිය යුතුද?
    ආණ්ඩුව කල යුත්තේ මෙයයැයි යොජනා ඉදිරිපත්කර ඒවා ඔවුන් විසින් ඉටු කරනතුරු බලා සිටීමද?

    නැතහොත් සමාජය වෙනස් කිරීම සදහා ජනතාව පෙළගැස්වීමට කිසියම් හෝ සංවිධානයක් ගොඩනැංවිය යුතුද?

    ReplyDelete
    Replies
    1. /සමාජවාදය යනු බදු එකතු කිරීම අවසන් කිරීමේ දීශානතියක් සහිත සමාජ ක්‍රමයක්ය./

      හික් ...
      අනේ ප්‍රදීප් මංගල මල්ලියේ, ඔය සමාජවාදයට දැන් අවුරුදු 100 ක් විතර පරණ ස්ටෝරියක්නේ, ඔය ක්‍රමය ගැන ප්‍රස්ට්හෑන්ඩ් එක්ස්පීරියන්ස් තියෙන අය කොච්චරක් නම් සිංහල බ්ලොග් ලියනවද? පොඩ්ඩක් එයාලට ඇහුන්කන් දිපන්කෝ, එයාල හොඳ අවංක මිනිස්සු, එයාලත් ස්වෙච්චාවෙන්, අවංකවම ඔය සමාජවාදේ වෙනුවෙන් වැඩ කරන්න, ඒ රටවල ඉගෙන ගන්න ගිය මිනිස්සු එයාල ලියල තියන දේ වත් කියවල බලපන්.

      Delete
    2. බොහොම කාර්යක්ෂම විදිහට බදු මත පදනම් වූ ආර්ථික ක්‍රමය අවසන් කළ සමාජවාදී පාලන තන්ත්‍රයක් එක රටක තිබ්බා, ඒ කාම්බෝජයේ, පොල්පොට් ගේ පාලන කාලයේ.

      Delete
    3. සමාජය වෙනස් කරන්නට හදනවා නම් හැදිය යුත්තේ ජනතාවගේ ප්‍ර‍ජාතාන්ත්‍රික සංවිධානයකි. කළ යුතු වෙනස තීරණය කළ යුත්තේ ජනතාව මිස පොත් නොවේ. එය සිදු විය යුත්තේ මහජන සංවාදයක් හරහා ය. අපි මේ කරන්නේ එයයි. ඔබ මේ සහභාගි වී සිටින්නේ ද එයටයි. සමාජවාදය යනු කුමක් ද යන්න ද අපි නැවත සොයා ගත යුතු ය.

      අනෙක් කාරණය බදු අහෝසි කරන්නට නම් රජය අහෝසි කළ යුතු ය. ඒ මගුල කරන්නට සමාජවාදී ආණ්ඩුවක් චීනය කියන පරිදි අවුරුදු 1000ක් විතර පවතින්නට ඕනෑ නැත. රජය ක්ෂය කිරීම දැන් සිට ම ආරම්භ කරන්නට පුළුවන. හැම රෙද්දම ආණ්ඩුවෙන් සිඟාකෑමෙන් එය කරන්නට බැරි ය. මහජනතාව සංවිධානය වී සංවිධාන මගින් මහජන ආයතන ආරම්භ කළ යුතු ය.

      Delete
    4. කලයුතු වෙනස තිරණය කල යුත්තේ ජනතාවය. පොත් යනු ඒ සදහා භාවිතාකල හැකි අතීත අත්දැකිම්ය.සකස්කල යුතුව ඇත්තේ ජනතාවගේ ප්‍ර‍ජාතාන්ත්‍රික සංවිධාන ව්‍යුහයක්ය. රජය පමණක් නොව පක්ෂයද දියකර හැරිය යුතුය. ඔබගේ ඉහත සියලු කරුණු සමග කිසිදු විරෝධක් නැත.

      රජය ක්ෂයවීම ධනවාදයතුලදීම සිදුකල හැකිය. ගැටලුව තියෙන්නේ ආණ්ඩුව සිදුකරමින් සිටින්නේ එය නොවේය. ආණ්ඩුවට රාජ්‍ය සේවය විධිමත් කිරිමේ අවශ්‍යතාවයක් පෙනෙන මානයේ නැත. එමෙන්ම සිදුකරන වැඩපිලිවෙලක් ක්‍රියාත්මක කල යුත්තේ නැවත ආපස්සට ගැනීමට නොහැකිවන ආකාරයකටය.

      තවද යොජනා සකස් කිරීමෙන් සමාජයක් වෙනස් වන්නේද නැත උදාහරණයක් ලෙස දැනටම ග්‍රාමීය මට්ටමේ ව්‍යාපෘති ක්‍රියාත්මක කල යුත්තේ එම ප්‍රදේශවල තිබෙන ග්‍රාම සංවර්ධන සමිති ආදි සංවිධාන වලිනි එහෙත් සිදුවන්නේ එම සමිති විසින් ගිවිසුම් වලට අත්සන් කිරීම පමණක්මය. සියලු ව්‍යාපෘතින් ක්‍රියාත්මක කරනුයේ එම ප්‍රදේශවල සිටින කොන්ත්‍රාත් කරුවන්ය. මෙය රජය ක්ෂය කර මහජනතාව සම්බන්ධ කර ගැනීමේදි සිදුවන ක්‍රියාවලියය. වාමාංශික ව්‍යාපාරයන්ට විරුද්ධ වීම වෙනුවට දැනට සිදුකර තිබෙන වෙනස්කම්වත් ඵලදායිලෙස සිදුකර ගැනීම වෙනුවෙන් වෙහෙසෙන්න



      Delete
    5. ඔය ග්‍රාම සංවර්ධන සමිති හරහා ව්‍යාපෘති ක්‍රියාත්මක කරවීම, ප්‍රජා සහභාගීත්වය වගේ දේවල් එහෙම වාමශිකයනගේ වැඩ කියල එයාලට ලනුණු දාන්න එපා. ඒවා අර අධිරාජ්‍යවාදී ලෝක බැංකුව, මූල්‍ය අරමුදල, ආසියානු බැංකුව, ලෝක ආහාර අරමුදල, එන්ජීඕ වගේ විදේශ ගැති බලවේග ගෙනාපුවා, ඒ කාලේ වාමාංශිකයෝ දිවි හිමියෙන් කෑගැහුවා ඒවාට එරෙහිව.

      යහපාලනය ආවෙක් එහෙම තමා, 2002 අවුරුද්දේ එන්ජීඕ වක් පලාත් පාලන ආයතනයකුත් එක්ක කල යහපාලන ව්‍යාපෘතියක මම ඉන්ටවීව් ගිහින් තියෙනවා.

      Delete
    6. රජය පමණක් නොව මහජනතාව ද දූෂිත ය. ප්‍රජා සංවිධාන ගිවිසුම් අත්සන් කර කොන්ත්‍රාත්කරුවන් ලවා වැඩ කරවා ගන්නට හේතුව එයයි. දූෂණය ගොවි සංවිධානය දක්වා හෝ ඉන් පහළටත් විහිදී ඇත. එයට මහජනතාවගෙන් විශාල පිරිසක් හවුල් ය.

      ආණ්ඩුව ගැන ප්‍රදීප් මංගල කියන දේ බොරු යයි මම නො කියමි. එහෙත්, සම්පූර්ණයෙන් ම නිශේධාත්මක වීම වැරදි ය. ඔවුන් ලවා වැඩ කරවා ගත හැකි වන්නේ අප ඔවුන් වෙත එල්ල කරන පීඩනයේ තරමට ය.

      Delete
  10. This comment has been removed by the author.

    ReplyDelete

Post a Comment

මාතෘකාවට අදාළ නැති හා වෛරී අදහස් ඉවත් කිරීමට ඉඩ ඇති බව කරුණාවෙන් සලකන්න.

Popular posts from this blog

තේරවිලි: සුපුන් සඳක් ඇත. මැදින් හිලක් ඇත.

පාසල් අධ්‍යාපනය ගැන කතා තුනක්

හමුදා කුමන්ත්‍රණ ගැන ලෝකෙට දුරකථනයෙන් කිව්වෙ බීලා වෙන්න ඇති -ෆොන්සේකා